މާލޭގެ ބިމުން މާލޭގެ ރައްޔިތުންނަށް ހައްލުތަކެއް ހޯދަދޭން ޖެހޭ ކަމަށް ދަ ޑިމޮކްރެޓްސްގެ ޓިކެޓްގައި މާލޭގެ މޭޔަރ ކަމަށް ވާދަކުރައްވާ، ގަލޮޅު އުތުރު ދާއިރާގެ ކައުންސިލް މެންބަރު މުޙައްމަދު ސައިފް ފާތީޙް ވިދާޅުވެއްޖެއެވެ.

ސައިފް މިހެން ވިދާޅުވީ ކެމްޕޭނު ލޯންޗްކުރުމަށް އެޕާޓީގެ ހަރުގޭގައި ރޭ ބޭއްވި ޖަލްސާގައި ދެއްކެވި ވާހަކައިގައެވެ.

ސައިފް ވިދާޅުވީ މާލެއާއި މެދު ވިސްނާ ވިސްނުން ބިނާ ކުރައްވަނީ މައިގަނޑު ދެ ހަޤީޤަތެއް ޤަބޫލު ކޮށްގެން ތިބެ ކަމަށެވެ.

އޭގެ ތެރެއިން ފުރަތަމަ ޤަބޫލު ކުރުމަކީ މާލޭގެ މައްސަލަތައް ހައްލުކުރަން މަޑުކޮށް ލަސްކުރެވެން ނެތްކަން ކަމަށެވެ.

އެގޮތުން އެތައް ބަޔަކު މަސްތުވާތަކެތީގެ ވަބާގައި ޖެހިގެން އެބަދާ ކަމަށާއި އެތައް ބައެއްގެ އާއިލާ ތައް ރޫޅިގެން ދާ ކަމަށެވެ. އަދި އެތައް ބައިވަރު ގުޅުންތަކެއް ކަފާސްވެ ހަލާކުވެގެން އެބަދާ ކަމަށެވެ.

ދެވަނަ ޤަބޫލު ކުރުމެއް ކަމަށް ސައިފް ވިދާޅުވީ މާލެގެ ބިމުން މާލޭގެ ރައްޔިތުންނަށް ހައްލު ހޯދައި ދިނުމުގެ ވާހަކައެވެ.

ސައިފް ވިދާޅުވީ އޭނާގެވެސް މަންމަ ބައްޕަ ފަރާތުންވެސް މާލެ ދޫކޮށް ދާނެ ރަށެއް ފަޅެއްވެސް ނެތް ކަމަށެވެ.

“އަޅުގަނޑުމެން ޤަބޫލުކުރަން އެބަޖެހޭ މާލޭގެ ރައްޔިތުންނަށް މާލޭގެ ބިމުން އެބަ ހައްލުތަކެއް ހޯދައިދޭން ޖެހޭ ކަން” ސައިފް ވިދާޅުވިއެވެ.

ސައިފް ވިދާޅުވީ އެކަން ކުރެވޭނީ މާލެ ރީއޮގަނައިޒް ކޮށްގެން މާލޭގެ އިންތިޒާމްތައް ބަދަލުކޮށްގެން ކަމަށެވެ. އަދި ހަމައެކަނި ކޮންމެވެސް ތަނެއްގައި އޮތް ފަޅެއް ފަރެއް ހިއްކައިގެން އެތަން އާބާދުވުމުގެ އިންތިޒާރުގައި މާލޭމީހުންގެ އުމުރު ނަގައިލަން ނުޖެހޭ ކަމަށްވެސް ސައިފް ވިދާޅުވިއެވެ.

މީގެ އިތިުރަށް ސައިފް ވިދާޅުވީ ސިޓީ ކައުންސިލްގެ މި އިންތިޚާބުގައި ޑިމޮކްރެޓްސް އިން ހުށައަޅަނީ އެވިދާޅުވާފަދަ ބަދަލުތައް އަވަސްގޮތެއްގައި ގެނެސްދެވޭނެ ގޮތްތައް ކަމަށެވެ.