ގއ. ވިލިނގިލި އަދި ދ. ކުޑަހުވަދޫ ޕޮލިސް ސްޓޭޝަނުގެ ބެލުމުގެ ދަށަށް ގެނެސްފައިހުރި ތަކެތީގެ ތެރެއިން އެ ސްޓޭޝަންތަކުގެ ބެލުމުގެ ދަށުގައި ހުރި ބަނގުރާ ނައްތާލައިފިއެވެ.
މި ބަނގުރާތައް ނައްތާލައިފައިވަނީ މިމަހުގެ 14 ވަނަ ދުވަހުއެވެ.
މިކަމާ ގުޅިގެން ފުލުހުން ނެރުނު ނޫސް ބަޔާނެއްގައި ބުނީ ބަނގުރާ ނައްތާލާފައިވަނީ ފުލުހުންގެ ބެލުމުގެދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން ކަމަށެވެ.
މިގޮތުން ވިލިނގިލި ޕޮލިސް ސްޓޭޝަނުން ވަނީ މި އަހަރުގެ ނޮވެމްބަރު މަހުގެ 1 އިން ޑިސެމްބަރު 2 އަށް ކޫއްޑޫ އެއާޕޯޓަށް ފުރަންދިޔަ ފަތުރުވެރިންގެ އަތުން އެއާޕޯޓުގެ އޭވިއޭޝަން ސެކިއުރިޓީން ހިފަހައްޓައި ފުލުހުންނާ ހަވާލުކޮށްފައިވާ 100 ފުޅި ބަނގުރަލާއި 40 ދަޅު ބަނގުރާ ނައްތާލާފައެވެ.
އަދި ކުޑަހުވަދޫ ޕޮލިސް ސްޓޭޝަނުން އެޕްރީލް 2022 އިން ފެށިގެން މި އަހަރުގެ ސެޕްޓެމްބަރު މަހުގެ 1 އިން ޑިސެމްބަރު 2 އަށް ދާލު އެއާޕޯޓަށް ފުރަންދިޔަ ފަތުރުވެރިންގެ އަތުން އެއާޕޯޓުގެ އޭވިއޭޝަން ސެކިއުރިޓީން ހިފަހައްޓައި ފުލުހުންނާ ހަވާލުކޮށްފައިވާ 58 ފުޅި ބަނގުރަލާއި 166 ދަޅު ބަނގުރާ ވަނީ ނައްތާލާފައެވެ.
މިމަހުގެ 5 ވަނަ ދުވަހު ވެސް އެކި މައްސަލަތަކުގައި ފުލުހުންގެ ބެލުމުގެދަށަށް ގެނެސްފައި ހުރި ބްރޭންޑެޑް ފުޅީގެ 298 ފުޅި، 200 ޕެޓް ފުޅި އަދި 936 ބިޔަރު ދަޅުގެ އިތުރުން އެހެނިހެން ތަކެތީގެ ގޮތުގައި 12 އައިޓަމެއް ދޫނިދޫގައި ވަނީ ނައްތާލާފައެވެ.
Advertisement
This content is created and paid for by advertisers and does not involve Voice Journalists
