ސްޕެޝަލް އިކޮނޮމިކް ޒޯން (އެސްއީޒެޑް)ގައި އިންވެސްޓް ކުރެވޭނެ އެންމެ ދަށް އަގަކީ 100 މިލިއަން ޑޮލަރު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ކަނޑައަޅުއްވައިފިއެވެ.

ރައީސް ޑރ.މުއިއްޒު މިފަދައިން ކަނޑައަޅުއްވާފައި މިވަނީ ދިވެހިރާއްޖޭގައި ޤާއިމްކުރާ ސްޕެޝލް އިކޮނޮމިކް ޒޯންގައި ހިންގިދާނެ އިޤްތިޞާދީ މަސައްކަތްތަކާއި އެއިން ޒޯނެއްގައި ހިމެނޭ ޖުމްލަ އިންވެސްޓްމަންޓްގެ އެންމެ ކުޑަމިންގަނޑު ކަނޑައަޅުއްވައި މިއަދު ނެރުއްވި ގަރާރުގައެވެ.

ގެޒެޓުގައި އާންމުކޮށްފައިވާ މި ގަރާރުގައިވާ ގޮތުން، އެސްއީޒެޑްގައި 9 ދާއިރާ އަކުން އިންވެސްޓް ކުރުމަށް ވަނީ ހަމަޖެހިފައެވެ. އެއީ 9 ދާއިރާ އަކީ:

1. އެކްސްޕޯޓަށް އިސްކަންދީގެން ހިންގާ މެނިފަކްޗަރިން އެކި ބާވަތުގެ މަސައްކަތް

2. ޓްރާންޝިޕްމަންޓް ޕޯޓް، އިންޓަނޭޝަނަލް ލޮޖިސްޓިކްސް، ޕޯޓް، އެއާޕޯޓް ބަލްކް ބްރޭކިން، ބަންކަރިން އަދި ޑޮކިން ސާވިސަސް

3. ޔުނިވަސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް

4. ދުނިޔޭގެ ފެންވަރުގެ އިންފޮމޭޝަން ކޮމިޔުނިކޭޝަން ޓެކްނޮލޮޖީ (އައިސީޓީ) ޕާކް، އައިސީޓީއާ ގުޅޭ ފެސިލިޓީތައް

5. އިންޓަނޭޝަނަލް ފައިނޭންޝަލް ސާވިސަސް، އިންޓަނޭޝަނަލް ޓްރޭޑް ސެންޓަރުތައް

6. އިއާދަކުރަނިވި ހަކަތައިގެ ދާއިރާ

7. ރާއްޖޭގައި ނެތް ނެޓްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް

8. ފުޑް ސެކިއުރިޓީ

9. ގޭސް އެކްސްޕްލޮރޭޝަން މަސައްކަތް  

މީގެ ކުރިން އެސްއީޒެޑްގައި އިންވެސްޓްކުރެވޭނެ އެންމެ ދަށް އަގަކީ 150 މިލިއަން ޑޮލަރުކަމުގައި ވީނަމަވެސް ރައީސް ޑރ.މުއިއްޒު މި ގަރާރު ނެރުއްވާފައިވަނީ ގާނޫނު ނަމްބަރު 2014 / 24 އިން ބާރު ލިބިގެންނެވެ. އެ ގާނޫނުގެ 22 ވަނަ މާއްދާގައި ބަޔާންކޮށްފައިވާ ގޮތުން ސްޕެޝަލް އިކޮނޮމިކް ޒޯންގައި ކުރެވޭނެ އެންމެ ކުޑަ އިންވެސްޓްމަންޓުގެ މިންބަރު ބޯޑް އޮފް އިންވެސްޓްމަންޓުގެ ލަފާގެ މަތިން ކޮންމެ އަހަރެއްގެ ފެބްރުއަރީގެ ކުރިން މުރާޖައާކޮށް އާއްމު ކުރަން ޖެހެ އެވެ.

އެންމެފަހުން މި އިންވެސްޓްމަންޓުގެ އަދަދު ކަނޑައަޅާފައިވަނީ 31، ޖެނުއަރީ 2018 ގައި ކުރީގެ ރައީސް ޔާމީން އެވެ. ނަމަވެސް މި ގާނޫނުގެ ދަށުން ރާއްޖެއަށް އިންވެސްޓްމަންޓް ގެންނަން ނިމިދިޔަ ސަރުކާރުން މަސައްކަތެއް ނުކުރެ އެވެ. ރައީސް ޑރ. މުއިއްޒު ވަނީ ރިޔާސީ އިންތިހާބުގެ ކެމްޕޭންގައި އެސްއީޒެޑް ގާނޫނު ތަންފީޒުކޮށް، އިންވެސްޓްމެންޓްތަކަށް ފުރުސަތު ހުޅުވާލާނެ ކަމަށް ވިދާޅުވެފައެވެ.