އަންނަ މަހު އޮންނަ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަ ނުކުރެއްވުމަށް އެ އެސޯސިއޭޝަންގެ މިހާރުގެ ރައީސް ބައްސާމް އަދީލް ޖަލީލް ނިންމަވައިފިއެވެ.
އެފްއޭއެމްގެ މީޑިއާ ގުރޫޕަށް މިއަދު ފޮނުވި ނޫސް ބަޔާނެއްގައި ބައްސާމު ވިދާޅުވީ ފުޓްބޯޅަ އެސޯސިއޭޝަން ގައި އެކިއެކި ހައިސިއްޔަތުން އެތައް ކާމިޔާބީއަކާއި އަދި ކުޅިވަރު ކަންކަން ހިނގާ ބީދައިން އެތައް ނާކާމިޔާބިއަކާއި އޭނާގެ ޓީމުން ކުރިމަތިލާފައިވާކަމަށެވެ.
އެގޮތުން ވޭތުވެދިޔަ މުއްދަތުގެ ތެރޭގައި ސަރަހައްދީ މުބާރާތްތަކުން ސީނިއަރ އަދި ޖޫނިއަރ ޓީމުތަކުން ނުހަނު ގިނަ ކާމިޔާބީތަކެއް ހާސިލްކޮށްފައި ކަމަށާއި ފުޓްބޯޅައަށް ހެޔޮ ބަދަލުތަކެއް ގެނެސްދިނުމަށްޓަކައި އެތަކެއް މަސައްކަތެއް ކުރެވިފައިވީ ނަމަވެސް އަދިވެސް ކުރަންހުރި މަސައްކަތް އެބަހުރި ކަމަށް ވަނީ ވިދާޅުވެފައެވެ.
އެގޮތުން ދިވެހި ފުޓްބޯޅައަށް ފާގަތި ދުވަސްތަކެއް ހޯދައިދިނުމަކީ އޭނާގެ ވެސް އުންމީދެއް ކަމަށާއި އެކަން ހާސިލްކުރުމަށް ޓަކައި އޭނާ އެތަކެއް މަސައްކަތެއް ކުރައްވާފައިވާކަމަށް ބައްސާމް ވަނީ ވިދާޅުވެފައެވެ. އަދި ދިވެހި ފުޓްބޯޅަ އައު ޒައާމަތެއްގެ ދަށުން ކުރިއަށް ގެންދިއުމަށް ފުރުސަތު ދިނުމަކީ އެންމެ ރަނގަޅު ކަމެއްކަމުގައި ދެކޭހާލު، ކުރިއަށް އޮތް އެފްއޭއެމްގެ އިންތިހާބުގައި ވާދަނުކުރެއްވުމަށް ނިންމެވީކަމުގައި ބައްސާމް ވިދާޅުވިއެވެ.
މީގެއިތުރުން މިނިވަން އިންސާފްވެރި އިންތިޚާބެއް ބާއްވަން ފުރުސަތު ދިނުމަކީ އޭނާގެ މައްސޫލިއްޔަތެއް ކަމަށް ދެކިވަޑައިގަންނަވާކަމަށް ވެސް ބައްސާމް ވަނީ ވިދާޅުވެފައެވެ.
"އެގޮތުން ކުރިއަށް މިއޮތް އިންތިހާބުގެ ކަންކަން އިލެކްޓޯރަލް ކޮމެޓީގެ ބެލުމުގެދަށުން ކުރިއަށް ގެންދެވޭނެ ވާހަކަ މިފުރުސަތުގައި ފާހަގަކުރަން. އަދި އިދާރާ ހިންގުމުގެ ކަންކަން ނައިބް ރައީސް އާއި ޖެނަރަލް ސެކްރެޓަރީގެ ބެލުމުގެ ދަށުން ހިނގަމުންދާނެ"
އެފްއޭއެމްގެ ރައީސްގެ މަގާމަށް ބައްސާމު އައްޔަނު ކުރެވުނީ 2016 ވަނަ އަހަރު މިހާރު މަހިބަދޫ ދާއިރާގެ މަޖިލިސް މެންބަރު އަހުމަދު ތޯރިގް (ޓޮމް) އާއި ވާދަކުރައްވާ ކުރި ހޯއްދަވައިގެންނެވެ. މިއީ އޭނަ އެފްއޭއެމްގެ ރައީސް ކަމުގައި ހުންނަވާތާ ދެވަނަ ދައުރެވެ.
ބައްސާމަށް ވަނީ ކޮރަޕްޝަންގެ ބޮޑެތި ތުހުމަތުކެއް ކުރެވިފައެވެ. މިގޮތުން އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އެނގޭ ސާފު ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށް ފުލުހުން ވަނީ ބުނެފައެވެ.
ފުލުހުން ވަނީ މިދިޔަ މަހުގެ 22 ވަނަ ދުވަހު އެފްއޭއެމަށް ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި ސާވާ ބެކަޕް އަދި ހާޑް ޑިސްކުތަކެއް ގެންގޮސްފައެވެ.
ދާދި ފަހުން ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ބޭއްވި ނޫސްވެރިންގެ ބައްދަލުވުމުގައި ޕީޖީ ޝަމީމް ވަނީ ބައްސާމް އަދީލް ޖަލީލާއި އެއިދާރާގެ އެހެން ވެރިންނަށް ވެސް ދައުވާ ކުރެވޭ ވަރަށް ހެކި ލިބޭނެ ކަމަށް ވިދާޅުވެފައެވެ.
ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން މީގެ ކުރިން އެފްއޭއެމް އިން ނެރުނު ބާޔާނެއްގައި ބުނެފައިވަނީ އެފްއޭއެމަށް ލިބިފައިވާ އެއްވެސް ފައިސާއަކަށް އެއިދާރާއަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައި ނުވާނެ ކަމަށާއި މިއީ ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއް ކަމަށެވެ.
Advertisement
This content is created and paid for by advertisers and does not involve Voice Journalists
