5 އަހަރަށްފަހު ބަންގްލަދޭޝްއިން މަސައްކަތު މީހުން ގެނައިމުގެ ހުއްދަ ސަރުކާރުން ދީފިއެވެ.

މިނިސްޓްރީ އޮފް ހޯމްލޭންޑް ސެކިއުރިޓީ މިއަދު ކުރި އިއުލާނެއްގައި ބުނެފައިވަނީ މިއަދުން ފެށިގެން ބަނގްލަދޭޝްއިން ދިވެހިރާއްޖެއަށް އަންސްކިލްޑް ލޭބަރުން ގެނެވޭ ގޮތަށް ސަރުކާރުން ހަމަޖައްސަވާފައިވާ ކަމަށެވެ.

އަދި އެހެން ޤައުމުތަކުން ރާއްޖެއަށް އަންސްކިލްޑް ލޭބަރުން މި ވަގުތު ގެނައުން މަޑުޖައްސާލާފައިވާ ކަމަށް ވެސް އެއިޢްލާނުގަައި ބުނެފައިވެއެވެ. ނަމަވެސް މިއަދުގެ ނިޔަލަށް އެކްސްޕެޓް އޮންލައިން ސިސްޓަމަށް އަޕްލޯޑް ކުރެވިފައިވާ ޑޮކިއުމަންޓްތައް ޕްރޮސެސް ކޮށްދޭނެ ކަމަށް ވެސް މިނިސްޓްރީން ވަނީ ބުނެފައެވެ.

Advertisement

ބަންގްލަދޭޝްއިން ދިވެހިރާއްޖެއަށް އަންސްކިލްޑް ލޭބަރުން ގެނައުން މަނާ ކުރީ ރައީސް އިބްރާޙީމް މުޙައްމަދު ޞާލިޙްގެ ސަރުކާރުންނެވެ. އަދި އެ ފުރުސަތު އެހެން ޤައުމުތަކަށް ހުޅުވާލުމުން އެންމެ ގިނައިން ރާއްޖެ އައިސްފައި ވަނީ އިންޑިއާ މީހުންނެވެ.

ރާއްޖޭގައި މަސައްކަތްކުރާ ބިދޭސީންގެ ސަބަބުން ބައެއް ފަހަރު ގިނަ އިޖްތިމާޢީ މައްސަލަތަކެއް އަންނަނީ ކުރިމަތިވަމުންނެވެ. މީގެ އިތުރުން ބިދޭސީން ރާއްޖޭގައި ބޮޑެތި ކުށްތަކަށް އަރައިގަތުމަކީ ވެސް ބޮޑުވެފައިވާ މައްސަލައެކެެވެ.