ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ މިނިސްޓަރުންނަށް ރުހުން ދިނުމާއި ގުޅޭ ގޮތުން، މަޖިލީހުގެ ކޮމިޓީން އެކުލަވާލި ރިޕޯޓްގައި ފުރިހަމަ ނުވާ ކަންކަން ހުރި ކަމަށް ބުނެ، މައްސަލަ އެޖެންޑާ އިން ނަގައި، ރިޕޯޓް އަނބުރާ ކޮމިޓީއަށް ފޮނުވާލައިފިއެވެ. 

މަޖިލީހުގެ މިއަދުގެ ޖަލްސާގެ އެޖެންޑާގައި އޮތީ މިނިސްޓަރުންނަށް ރުހުން ދިނުމަށް ވޯޓަށް އެހުމުގެ މައްސަލަ ކަން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް މުހައްމަދު އަސްލަމް އިއުލާން ކުރެއްވުމާއި އެކު ތުޅާދޫ ދާއިރާގެ މެންބަރު ހިސާން ޙުސައިން ވަނީ ނިޒާމީ ނުކުތާ ނަންގަވައި އެގޮތަށް އެކަން ނުކުރެވޭނެ ކަމަށް ވިދާޅުވެފައެވެ. 

މިކަމުގެ ތަފްސީލަށް ވަޑައިގަންނަވަމުން ހިސާން ވިދާޅުވީ، ސަރުކާރުން އުފައްދަވާ މިނިސްޓްރީ ތަކާއި ކުންފުނި ތަކުގެ މެންޑޭޓަކީ މަޖިލީހުން ދިރާސާކޮށް ފާސް ކުރަންޖެހޭ ކަންކަން ކަމަށާ، އަދި މިހާތަނަށްވެސް ސަރުކާރުގެ މިނިސްޓްރީތަކުގެ މެންޑޭޓް މަޖިލީހަށް ހުށަހެޅި ފާސްކޮށްފައި ނުވާ ކަމަށެވެ. 

އަދި މިނިސްޓަރުންނަށް ރުހުން ދިނުމުގައި، އެ މިނިސްޓަރުންގެ މިނިސްޓްރީގެ މެންޑޭޓް ތަކަށް ބަލަންޖެހޭއިރު، މެންޑޭޓް ފާސް ނުކުރާ މިނިސްޓްރީ ތަކެއްގެ މިނިސްޓަރުންނަށް ރުހުން ދެވޭނެ ގޮތެއް ނޯންނާނެ ކަމަށް އޭނާ ވިދާޅުވި އެވެ. 

މީގެ އިތުރުން، މަޖިލީހުން ރުހުންދޭ ކޮމިޓީ ރިޕޯޓު ގައި ރައްޔިތުންގެ މަޖިލީހުން ރުހުން ދިނުމަށް، ނުވަތަ ނުދިނުމަށް ބަޔާން ކޮށްފައިވާން ޖެހޭއިރު، އެ ރިޕޯޓްގައި އެފަދައިން ބަޔާންކޮށްފައި ނެތް ކަމަށް ވެސް ހިސާން ވިދާޅުވި އެވެ. 

ހިސާންގެ ނިޒާމީ ނުކުތާ ބަލައިގަނެ، މަޖިލީހުގެ މެޖޯރިޓީ ލީޑަރ އަދި މައިނޯރިޓީ ލީޑަރާއި މަޝްވަރާ ކުރެއްވުމަށްފަހު، އަސްލަމް ވަނީ، ކޮމިޓީ ރިޕޯޓު ގައި ފުރިހަމަ ނުވެ ހުރި ކަންކަން ފުރިހަމަ ކުރުމަށްޓަކައި، ރުހުން ދިނުމާއި ގުޅޭ މައްސަލަ އެޖެންޑާއިން ނަންގަވައި، އެ ރިޕޯޓް، މަޖިލީހުގެ ސަރުކާރުގެ މައްސޫލިއްޔަތު އަދާކުރާ މިންވަރުބަލާ ކޮމެޓީއަށް އަލުން އަނބުރާ ފޮނުއްވާފައެވެ.