މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދުމަށް ފުށިދިއްގަރުފަޅު ހިއްކައިގެން ތަރައްގީކުރާ "ރަސްމާލެ ސިޓީ" ތަރައްގީކުރާނީ ތިމާވެއްޓާއި ރައްޓެހި އެކޯ ސިޓީގެ ގޮތުގައި ކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާ ޑރ މުއިއްޒު މިފަދައިން ވިދާޅުވެފައިވަނީ ފުށިދިއްގަރުފަޅު ހިއްކުމުގެ ރަސްމިއްޔާތު އިފްތިތާހުކުރުމަށް ބޭއްވި ހަފްލާގައި، އެ މަޝްރޫއާއި ގުޅޭގޮތުން ވާހަކަފުޅުދައްކަވަމުން ނެވެ.
ރައީސުލްޖުމްހޫރިއްޔާ ޑރ މުއިއްޒު ވިދާޅުވީ ފުށިދިއްގަރުފަޅު ހިއްކައިގެން ތަރައްގީކުރުމަށް ނިންމާފައިވާ ރަސްމާލެ ސިޓީ ހިއްކަން ނިންމާފައިވަނީ ސޭފް އައިލެންޑެއްގެ ހުންނަ މިންގަނޑުތަކާއި އެއްގޮތަށް ކަމަށެވެ. އަދި އެ ރަށަކީ ފެހިކަން ގަދަ މާހައުލެއްގެ ގޮތުގައި ބިނާކުރައްވަން ގަސްދުކުރައްވާކަމަށް އެމަނިކުފާނު ވިދާޅުވި އެވެ.
އެގޮތުން ރައީސުލްޖުމްހޫރިއްޔާ ވިދާޅުވީ ރަސްމާލެ އަކީ "ޒީރޯ ކާބަން ސިޓީއަކަށް" ހައްދަވާނެ ކަމަށެވެ.
އެ ރަށުގައި ދުއްވާ އުޅަނދު ފަހަރަކީ ވެސް ތިމާވެއްޓާއި ރައްޓެހި އުޅަނދުތަކަށް ހައްދަވާނެ ކަމަށާއި، އެ ރަށުގައި ގާއިމްކުރާ ހުރިހާ ފެސެލިޓީއެއްގައި ބޭނުންކުރާނީ އިޔާދަކުރަނިވި ހަކަތަކަމުގައި ކަނޑައަޅާ، އެގޮތަށް އެ މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ.
ރަސްމާލެ ވެގެންދާނީ ރާއްޖޭގައި އެންމެ ފުރަތަމަ ގާއިމްކުރާ އެކޯ ސިޓީއަށް ކަމަށް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ.
"ފެހިކަން ގަދަ ވަރަށް ހިތްގައިމު މާހައުލެއް ލިބިގެންދާ ތަނަކަށް މިތަން ވެގެންދާނީ. އަޅުގަނޑުމެން ގަސްދުކުރަނީ މިތާގައި ގާއިމްވެގެންދާ ސިޓިއަކީ ޒީރޯ ކާބަން ސިޓީއަކަށް ހެދުން...މިތަނުގައި ހުންނަ ހުރިހާ ފެސިލިޓީސްއެއް ގެދޮރާއި ހުރިހާ ކަމެއްގައި ރިނިއުބަލް އެނާޖީގެ އެކިއެކި ވަސީލަތްތައް ބޭނުންކޮށްގެން މުޅިތަން އަޅުގަނޑުމެން ހިންގާނީ. ފެހި އެންވަޔަރުމެންޓަލް ފްރެންޑްލީ އެކޯ ސިޓީއަކަށް މިތަން ހަދާނަން"
ރައީސް ޑރ މުހައްމަދު މުއިއްޒު
ރައީސުލްޖުމްހޫރިއްޔާ ޑރ މުއިއްޒު އިތުރަށް ވިދާޅުވީ ފުށިދިއްގަރުފަޅު ހިއްކުމުގެ މަޝްރޫއަކީ ރާއްޖޭގައި މިހާތަނަށް ހިންގާ ބިން ހިއްކުމުގެ އެންމެ ބިޔަ މަޝްރޫއުއަށް ކަމަށެވެ.
އެގޮތުން އެ މަޝްރޫއުގެ ދަށުން 8 މަސްތެރޭ 1150 ހެކްޓަރުގެ ބިން ހިއްކާ ނިންމާނެކަމަށް އެމަނިކުފާނު ވިދާޅުވި އެވެ. އެއީ ހުޅުމާލޭގެ ފޭސް އެކަކާއި ދޭއް އެއްކޮށްލީމާ ވާ ވަރަށްވުރެ ތިން ގުނަ ބޮޑު ސަރަހައްދެއްކަމަށް ރައީސުލްޖުމްހޫރިއްޔާ ސިފަކުރެއްވި އެވެ.
ރަސްމާލެ ތަރައްގީކުރާއިރު، ގުޅިފަޅާއި، ގިރާވަރު ފަޅުގެ މަސައްކަތްތައް ވެސް ހުއްޓާނުލާ ކުރިއަށް ގެންދަވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ މުއިއްޒު ވަނީ ދެއްވާފަ އެވެ.
އޭގެ އިތުރުން ރައީސުލްޖުމްހޫރިއްޔާ ވިދާޅުވީ މި މަޝްރޫއުތައް ނިންމާ ރައްޔިތުންނަށް ބޯހިޔާވަހިކަން ދޭން ފެށުމުން މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމަށް ޤަބޫލުކުރައްވާ ކަމަށެވެ.
Advertisement
This content is created and paid for by advertisers and does not involve Voice Journalists
