ރާއްޖޭގެ އެހެން ރަށްތަކުން ވެސް ފައިލޭރިއާ އަށް ޓެސްޓުކުރަން ނިންމާފައިވާ ކަމަށް ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ބުނެފިއެވެ.

އެއިދާރާއިން މިފަދައިން ނިންމީ ޑިސެންބަރު 1 އަދި 2 ވަނަ ދުވަހު ކުޅުދުއްފުށީގައި ހިންގި ބިދޭސީ މަސައްކަތްތެރިންގެ ސްކްރީނިން ކޭމްޕުގެ ތެރޭގައި ޓެސްޓް ކުރެވުނު ބައެއް ބިދޭސީ މަސައްކަތްތެރިންގެ ތެރެއިން 19 މީހެއްގެ ގައިން ފައިލޭރިއާ ފެނުމާއި ގުޅިގެންނެވެ.

ފައިލޭރިއާ އަށް ޕޮސިޓިވް ވެފައިވާ ފަރާތްތަކެއް ފެނުމާއި ގުޅިގެން ބަލި ކޮންޓްރޯލް ކުރުމާއި ބެހޭގޮތުން އެޗްޕީއޭއިން މިއަދު ނެރުނު އިއުލާނުގައި ވަނީ މި ބަލި ކޮންޓްރޯލް ކުރުމަށް ކަނޑައަޅާފައިވާ ކަންކަން ބަޔާންކޮށްފައެވެ.

Advertisement

އޭގެ ތެރޭގައި ހިމެނެނީ މިހާތަނަށް ސްކޭން ކުރި 295 ބިދޭސީންގެ އިތުރުންވެސް އިތުރު ފަރާތްތަށް ސްކްރީން ކުރުމެވެ. އޭގެ ތެރޭގައި ކުޅުދުއްފުށީ ރައްޔިތުންގެ ތެރެއިން ވެސް ރެންޑަމް ސާމްޕަލް ނެގުމަށް ވަނީ ހަމަޖެހިފައެވެ.

ޓެސްޓް ކުރުމުގެ އިތުރުން، އެ އިދާރާއިން ވަނީ ފައިލޭރިއާއާ ގުޅޭގޮތުން ހޭލުންތެރިކުރުމުގެ ޕްރޮގްރާމެއް ކުރިއަށް ގެންދިއުމަށް ވެސް ނިންމައިފައެވެ. މި ޕްރޮގްރާމްގެ ތެރެއިން ކުޅުދުއްފުށި ހޮސްޕިޓަލުގެ ޓާސްކް ފޯސްއަށް މައުލޫމާތު ފޯރުކޮށްދިނުމާއި، ބިދޭސީންނަށް މައުލޫމާތު ދިނުމުގެ ސެޝަނެއް ކުރިއަށް ގެންދިއުމުގެ އިތުރުން ބައްޔާ ބެހޭ ރަނގަޅު މައުލޫމާތު ފޯރުކޮށްދިނުމުގެ މަގުސަދުގައި މީޑިއާގައި މަސައްކަތް ކުރާ ނޫސްވެރިންނަށް ހާއްސަކޮށްގެން މައުލޫމާތު ދިނުމަށްވެސް ވަނީ ހަމަޖެހިފައެވެ. މީގެ އިތުރުންވެސް މާލެ ސަރަހައްދުގެ އަދި އަތޮޅު ހޮސްޕިޓަލުތަކުގައި ސިއްހީ ހިދުމަތްތެރިންނަށް މައުލޫމާތު ދިނުމާއި، ހެލްތު މިނިސްޓްރީގެ ދަށުން ހިންގާ ހުރިހާ ތަނެއްގައި މި ބައްޔާއި ބެހޭ ގޮތުން މުވައްޒަފުންނަށް މައުލޫމާތުދިނުމަށް ހަމަޖެހިފައިވާ ކަމަށް އެޗްޕީއޭ އިން ބުނެއެވެ.

ބިދޭސީންގެ މެދުގައި ބައްޔާއި ބެހޭގޮތުން ހޭލުންތެރި ކުރުމަށް ބިދޭސީންނަށް މައުލޫމާތު ފޯރުކޮށްދިނުމަށް އެ ފަރާތްތަކަށް އެނގޭ ފަދަ ބަހަކުން ޕޯސްޓަރު، ވީޑިއޯ އަދި ފޮޓޯ ތައްޔާރު ކުރުމަށް ހަމަޖެހިފައިވާ ކަމަށް ވެސް އެޗްޕީއޭ އިން ބުނެއެވެ. އަދި ފައިލޭރިއާއާ ގުޅުންހުރި ގައިޑްލައިނެއް ތައްޔާރުކޮށް، ސާވައިލެންސް އާއި ރިޕޯޓިން އިތުރަށް ހަރުދަނާ ކުރަންވެސް އެއިދާރާއިން ވަނީ ނިންމާފައެވެ.

ފައިލޭރިއާ އަކީ އާއްމުކޮށް ހަޑި ފެނުގައި އާލާވާ ކިއުލެކްސް އޭ ކިޔާ މަދިރީގެ ބާވަތަކުން ފެތުރޭ ބައްޔެކެވެ. މިބަލީގެ އާންމު އަލާމާތަކީ ފައި ދުޅަވުން ނަމަވެސް، މި ބަލި ޖެހުމަށްފަހު އެތައްދުވަހެއް ވަންދެން ވެސް ބަލީގެ އެއްވެސް އަލާމާތެއް ނުފެނި ހުރެއެވެ. އަދި ބަލިޖެހޭތާ ގިނަ ދުވަސްތަކަކަށްފަހު ހުންއައުމާއި ހަށިގަނޑުގެ އެކި ބައިތައް ދުޅަވުމާއި ހަންގަނޑު ބޯވުން ފަދަ އަލާމާތްތައް ބަލިމީހާގެ ކިބައިން ފެނެއެވެ.

ފައިލޭރިއާ އަކީ ރާއްޖޭން މީގެ ކުރިން ނައްތާލެވިފައިވާ ބައްޔެކެވެ.