ވެރިކަމާއި ހަވާލުވާ ކޮންމެ ސަރުކާރަކާ އެކު ބަދަލުނުވާ ގައުމީ ޕްލޭނެއް އޮންނަން ޖެހޭކަމަށް ކުރީގެ ބަންޑާރަ ނައިބު އަދި ޕީޕީއެމް/ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ އާއިޝަތު އާޒިމާ ޝަކޫރު ވިދާޅުވެއްޖެއެވެ.
މާލޭގެ މޭޔަރު ކަމަށް ވާދަކުރައްވާ ބައެއް ބޭފުޅުންގެ މެދުގައި މިރޭ ސަންގު ޓީވީގެ ބަހުސްގައި ވާހަކަފުޅުދައްކަވަމުން އާޒިމާ ވިދާޅުވީ ބަދަލުވާ ކޮންމެ ސަރުކާރަކާ އެކު ގައުމުގެ އެންމެ މަތީ މަސްލަހަތުތައް ހިމެނޭ މަސައްކަތްތައް ބަދަލުނުވާނެ ގޮތަށް ގައުމީ ތަރައްގީގެ ސިޔާސަތުތައް އެކުލަވާލަން ޖެހޭކަމަށެވެ.
"ކޮންމެ ސަރުކާރަކާ އެކު ގައުމުގެ އެންމެ މަތީ މަސްލަހަތުތައް ހިމެނޭ ޕްލޭންތައް ބަދަލު ނުވާނެ ގޮތަށް ގައުމީ ތަރައްގީގެ ސިޔާސަތުތައް އެކުލަވާލެވުނީމަ އަޅުގަނޑުމެންނަށް އެ ޕްލޭންތަކާއި އެކުގައި މާލެ މެނޭޖެ ކުރެވޭނެ. އެނޫން ގޮތަކަށް ކަމަށް ވަންޏާ އަޅުގަނޑުމެން އަބަދުވެސް ޖެހޭނީ ޑިމާންޑް ފަހަތުން ދުވާހާ."
އާޒިމާ ވިދާޅުވިއެވެ.
މީގެ އިތުރުން އެކަމަނާ ވިދާޅުވީ ގައުމީ ތަރައްގީގެ ޕްރޮޖެކްޓުތައް ހިންގަން ޖެހޭނީ ފިނޭންސްއާއި ދެތިން އަހަރުގެ ކޮންސްޓްރަކްޝަން ޕްރޮޖެކްޓަކުން ރިއަލް އެސްޓޭޓް ކުންފުނިތައް މުއްސަދި ވާގޮތަށް ނޫންކަމަށެވެ.
މާލެ ސިޓީގެ ގެދޮރުވެރިކަމަށް އޮތް ޑިމާންޑް ގައުމީ ލެވެލެއްގައި ހައްލު ކުރަން ޖެހޭކަމަށް ވެސް ބަހުސްގައި ވާހަކަފުޅު ދައްކަވަމުން އާޒިމާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
