ރާއްޖޭގައި މިވަގުތު ތިބި ބަންގްލަދޭޝްގެ މަސައްކަތު މީހުންގެ އަދަދު ލައްކަ އަކަށް ނާރާ ކަމަށް ދާޚިލީ ސަލާމަތާއި ބެހޭ ވުޒާރާގެ ވަޒީރު ކެޕްޓަން (ރިޓަޔާޑް) ޢަލީ އިޙްސާން ވިދާޅުވެއްޖެއެެވެ.
ރޭ އެވުޒާރާއިން ބޭއްވި ނޫސްވެރިންގެ ބައްދަލުވުމުގައި އިޙްސާން ވިދާޅުވީ މިހާރު ރާއްޖޭގައި ތިބި ބަންގްލާދޭޝް މީހުންގެ ޢަދަދަކީ 90624 ކަމަށެވެ.
އެހެން ކަމުން، އެއީ ރާއްޖެއަށް ބޭރު މަސައްކަތުމީހުން ގެނައުމަށް ކަނޑައެޅިފައިވާ ޤަވާއިދާއި ޚިލާފު ޢަދަދު، އެއްލައްކަ އަށްވުރެ މަދު އަދަދަކަށް ވުމުން، އިތުރަށް އެގައުމުން މީހުން ގެނައުމަކީ ޤާނޫނާއި ޚިލާފުވުން ކަމަށް ނުބުނެވޭނެ ކަމަށް ވަޒީރު ވިދާޅުވި އެވެ.
"ލީގަލްކޮށްވިއަސް އިލީގަލްކޮށްވިއަސް ރާއްޖޭގައި ތިބި ޖުމްލަ ޢަދަދަކީ 90624 ބަންގްލަދޭޝަން މީހުން. އެއީ ޤާނުނު ބުނާ އަދަދަށްވުރެ މަދު އަދަދެއް. އެހެންވީމަ މިހާރު ދީފައިވާ ހުއްދައަށް އަދި ޤާނޫނަށް ފުށުނާރާ."
ދާޚިލީ ސަލާމަތާއި ބެހޭ ވުޒާރާގެ ވަޒީރު ކެޕްޓަން (ރިޓަޔާޑް) ޢަލީ އިޙްސާން
އިޙްސާން ވިދާޅުވީ ރިޔާސީ އިންތިޚާބުގެ ކެމްޕޭނު ތެރެއިން ބައްދަލުކުރެވުނު ވިޔަފާރިވެރިންނާއި އަލަށް ވިޔަފާރި ފަށަން ބޭނުންވެފައި ތިބި މީހުންގެ ވަރަށް ބޮޑު ކަންބޮޑުވުމަކަށް ބަންގްލަޑެޝްގް އަންސްކިލްޑް މީހުން ނުގެނެވުން ވެފައި އޮތް ކަމަށެވެ.
އަދި އެމައްސަލައަށް ހައްލު ހޯދައިދިނުމަށް ރައީސް ޑރ މުޙައްމަދު މުޢިއްޒު ވެރިކަަމަށް ހުވާ ކުރެއްވެވި ދުވަހު އިރުޝާދު ދެއްވި ކަމަށް އިޙްސާން ވިދާޅުވިއެވެ.
އިޙްސާން ވިދާޅުވީ ބަންގްލަދޭޝްގެ މަސައްކަތު މީހުން ގެނައުމުގެ ހުއްދަ ދިނީ ބަލަންޖެހޭ ޤާނޫނީ އިޖުރާޢަތްތައް ބަލައި، ދޫކުރެވިފައިވާ ވަރކްޕާމިޓްގެ ޢަދަދުތަކަކަށް ރިޢާޔަތް ކުރުމަށް ފަހުގައި ކަމަށެވެ.
ބަންގްލަދޭޝްއިން މީހުން ގެނައުމަށް ހުޅުވައިލީ މިހާތަނަށް ރާއްޖެއަށް މަސައްކަތު މީހުން އެންމެ ގިނައިން ގެނެވިފައިވަނީ އެޤައުމުން ކަމަށް ވާތީ ކަމަށާއި، އެހެން ޤައުމު ތަކުންވެސް މީހުން ގެނައުމަށް ބަލަންޖެހޭ ކަންކަން ބެލުމަށްފަހު ހުޅުވައިލާނެ ކަމަށް ވަޒީރު އިޙްސާން ވިދާޅުވިއެވެ.
2020 ވަނަ އަހަރު ސެޕްޓެމްބަރު މަހު ޤާނުނަށް ގެނެސްފައިވާ އިސްލާހުގައި ވާގޮތުން، ރާއްޖޭގައި ލޭބަރުންގެ ގޮތުގައި މަސައްކަތްކުރުމަށް އެއް ޤައުމަކުން އެންމެ ގިނަވަގެން އެތެރޭވެވޭނީ 1 ލައްކަ މީހުންނެވެ. އެ ޢަދަދު ހަމަވެފައިވާ ކަމަށްބުނެ ބަންގްލަދޭޝްގެ ރައްޔިތުން ވަޒީފާގެ ބޭނުމުގައި ރާއްޖެ އެތެރެވުން އޭރު އޮތީ މަނާކޮށްފައެވެ.
އެހެން ނަމަވެސް، ރާއްޖެއަށް އަލުން ބަންގްލަދޭޝްގެ، އަންސްކިލްޑް ލޭބަރުން ގެނައުމުގެ ހުއްދަ ދޭން ނިންމައި އެހެން ޤައުމުތަކުން ރާއްޖެއަށް ބިދޭސީން ގެނައުން މަޑުޖައްސާލުމަށް އާދިއްތަ ދުވަހު ދުވަހު ހޯމް މިނިސްޓްރީން ވަނީ ޢިއުލާން ކޮށްފައެވެ. އެކަމާއި ގުޅިގެން އިދިކޮޅު އެމްޑީޕީން ވަނީ ސަރުކާރަށް އަދި މިނިސްޓަރަށް ވަރަށް ބޮޑަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
