ސީލައިފް ގްލޯބަލްގެ ވެރިމީހާ އަހުމަދު މޫސާ މުހައްމަދު (އަންމަޓީ) ފުރުން މަނާކުރުމަށް މޯލްޑިވްސް އިމިގްރޭޝަންގެ މައްޗަށް ހައި ކޯޓުން އަމުރުކޮށްފިއެވެ.

އަންމަޓީގެ މައްޗަށް ވަނީ ހުޅުމާލޭގައި ފްލެޓްތަކެއް އަޅަން، އެޑްވާންސަށް އެ ފުލެޓް ގަންނަން ބޭނުންވާ މީހުން އަތުން ފައިސާނަގާ، އެ ފައިސާއަށް ހިޔާނާތްތެރިވިކަމުގެ ދައުވާ ކޮށްފައެވެ.އަންމަޓީގެ މައްޗަށް ހިޔާނާތުގެ 42 ދައުވާއެއް ވަނީ ކޮށްފައިވީނަމަވެސް މިހުރިހާ ދައުވާއަކަށް އޭނާ ވަނީ އިންކާރު ކޮށްފައެވެ.

މިކަމާއި ގުޅިގެން ހައި ކޯޓުން ނެރުނު އަމުރުގައި ބުނެފައިވަނީ މިމަހުގެ 6 ވަނަ ދުވަހުން ފެށިގެން 26 ވަނަ ދުވަހުގެ 23:00 އަށް އޭނާ ފުރުން މަނާކުރުމަށް އޮތް "ފުރުން މަނާކުރުމުގެ އަމުރު މުރާޖައާ ކޮށް ނިންމި ގޮތް" އިސްތިއުނާފު ކުރުމަށް ސަރުކާރުން ހުށައަޅާފައިވާކަމަށެވެ. އަދި ސަރުކާރުން ހުށައަޅާފައިވަނީ އެ އަމުރު ބާތިލް ކުރުމަށް ކަމަށްވެސް ހައި ކޯޓުގެ އަމުރުގައި ވެއެވެ.

އެހެން ނަމަވެސް އަންމަޓީގެ މައްސަލަ އަކީ ކޯޓުގައި ހިންގަމުންދާ މައްސަލައަކަށް ވެފައި، އޭނާ ފުރައިގެން ގޮސްފިނަމަ ކޯޓުގެ އިސްތިއުނާފީ މައްސަލައިގެ މަގްސަދު ގެއްލިގެން ދާނެތީ މިކަމުގައި އިންސާފު ދެމެހެއްޓުމަށްޓަކައި ކޯޓުން ވަކިގޮތެއް ކަނޑައަޅައި އަންގަންދެން އަންމަޓީ ރާއްޖެއިން ބޭރަށް ފުރުން މަނާ ކުރުމަށް އިމިގްރޭޝަންގެ މައްޗަށް ކޯޓުން ވަނީ އަމުރު ނެރެފައެވެ.

މީގެކުރިން 16 ޖޫން 2021 ގައި ކޯޓުން ޝަރީއަތް ނިމެންދެން އޭނާގެ ޕާސްޕޯޓާއި ޓްރެވަލް ޑޮކިއުމެންޓްތައް ހިފެހެއްޓުމަށް މޯލްޑިވްސް އިމިގްރޭޝަންގެ މައްޗަށް ހައިކޯޓުން ވަނީ އަމުރުކޮށްފައެވެ. އެހެން ނަަމަވެސް މި މަހުގެ 7 ވަނަ ދުވަހު ކްރިމިނަލް ކޯޓުން މައްސަލަ ބެލުމަށްފަހު ވަނީ އަންމަޓީގެ ޕާސްޕޯޓް ދޫކޮށްލުމަށް އަމުރުކޮށްފަ އެވެ.

އެ އަމުރުގެ ރައުޔުގައި ކުރިމިނަލް ކޯޓުން ބުނެފައިވަނީ އޭނާގެ މައިބަދައިގެ އޮޕަރޭޝަނެއް ކުރުމަށް ޑޮކްޓަރު ލަފާދީފައިވާކަމަށް ކޯޓަށް ހުށަހަޅާފައިވާ މެޑިކަލް ރިޕޯޓު ތަކުން އެނގެން އޮންނަ ކަމަށެވެ. އެއީ ސީރިއަސް އޮޕަރޭޝަނަކަށް ވުމާއިއެކު ސްރީލަންކާގައި ދިރިއުޅޭ އޭނާގެ އާއިލާ ކައިރީގައި ހުރެގެން ފަރުވާ ލިބުމުގެ ފުރުސަތު ފަހިކޮށްދިނުމަށް، އޭނާ ފުރުން މަނާކުރަން ނެރެފައިވާ އަމުރު ވަގުތީ ގޮތުން ސަސްޕެންޑްކުރަން ނިންމާފައިވާ ކަމަށް އެ އަމުރުގައި ބުނެފައިވެއެވެ.