ޕޮލިސް ކޮމިޝަނަރުގެ މަގާމަށް ކުރިމަތިލުމަށް ހުޅުވާލި މުއްދަތުގައި، އެކަމަށް އެދި ކުރިމަތިލައްވާފައިވަނީ ދެ ބޭފުޅުންކަމަށް މިނިސްޓްރީ އޮފް ހޯމްލޭންޑް ސެކިއުރިޓީން ހާމަކޮށްފިއެވެ.

ހޯމްލޭންޑް ސެކިއުރިޓީގެ މިނިސްޓަރު އަލީ އިހުސާން ވިދާޅުވީ ޕޮލިސް ކޮމިޝަނަރުގެ މަގާމަށް ހުށަހެޅުއްވުމުގެ މުއްދަތު މިއަދުގެ މެންދުރު 12 ޖެހުމާ ހަމައަށް ހަމަވެފައިވާއިރު، އެ މަޤާމަށް އެދި ހުށަހަޅުއްވާފައިވަނީ އެސިސްޓެންޓް ކޮމިޝަނަރު އަލީ ޝުޖާއު އާއި އެސިސްޓެންޓް ކޮމިޝަނަރު އިސްމާއީލް ނަވީން ކަމަށެވެ. 

އެ ދެބޭފުޅުންގެ ނަން މިހާރު ޕޮލިސް ބޯޑަށް ފޮނުއްވާފައިވާ ކަމަށާއި، އެކަމަށް ގޮތެއް ނިންމަވާނީ ޕޮލިސް ބޯޑުންކަމަށް މިނިސްޓަރު އިހުސާން ވިދާޅުވިއެވެ. 

މީގެ އިތުރުން މިނިސްޓަރު ވިދާޅުވީ ޕޮލިސް ކޮމިޝަނަރަކު އައްޔަންކުރުމުގެ ޕްރޮސެސްއަކީ ވަރަށް ދިގު ޕްރޮސެސްއެއްކަމަށާއި، ވަރަށް ގިނަ ކަންކަން މި މަރުހަލާގެ ތެރޭގައި ބައްލަވާނެ ކަމަށެވެ. 

ޕޮލިސް ކޮމިޝަނަރުގެ މަގާމަށް ބޭފުޅަކު އައްޔަން ކުރަނީ އެ މަގާމަށް ކުރިމަތިލައްވާ ބޭފުޅުންނާ ޕޮލިސް ބޯޑުން އިންޓަވިއުކޮށް، ގާބިލްކަން ވަޒަން ކުރުމަށް ފަހު ކަމަށް ގާނޫނުގައި ބަޔާންކޮށްފައި އޮވެއެވެ.

ފުލުުހުންގެ ހިދުމަތުގެ ގާނޫނު ބުނާގޮތުން ޕޮލިސް ކޮމިޝަނަރު ކަމަށް އައްޔަންކުރަން ޖެހެނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީ ރޭންކުގެ ބޭފުޅެކެވެ.

އެ މަޤާމަށް ބޭފުޅަކު އައްޔަންކުރާނީ ޕޮލިސް ބޯޑުން ވަޒަންކޮށް، މިނިސްޓަރަށް ހުށަހަޅާ ނަންތަކުގެ ތެރެއިން މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާ ކަމަށް ވެސް ފުލުހުންގެ ގާނޫނުގައި ބަޔާންކޮށްފައިވެއެވެ.