ރައްޔިތުންގެ މަޖިލީހުގެ މެންބަރުންނަށް މުސާރަ އާއި ކޮމިޓީ އެލަވަންސްގެ ގޮތުގައި މަހަކު 100،000 ރުފިޔާ ލިބޭ ގޮތަށް މުސާރަ ބޮޑުކުރަން މާލިއްޔަތު ކޮމިޓީން މިއަދު ފާސްކޮށްފިއެވެ.

ރައްޔިތުންގެ މަޖިލީހުން މުސާރަ ކަނޑައަޅާ މަގާމުތަކުގެ މުސާރަ ބޮޑުކުރުމުގެ ކަންކަން މިއަދު މާލިއްޔަތު ކޮމިޓީގައި ކުރިއަށް ދިޔައިރު، އެންމެ ފުރަތަމަ ހުށަހެޅީ އަސާސީ މުސާރައިގެ ގޮތުގައި 57،000ރ. އާއި ލިވިން އެލަވަންސް ގޮތުގައި 82،000 ރުފިޔާ މެންބަރުންނަށް ކަނޑައެޅުމަށެވެ.

ނަމަވެސް ކޮމިޓީގެ މެންބަރުންގެ މެދުގައި އޮފް ދަ ރެކޯޑުގައި ބައެއް މަޝްވަރާއަށް ފަހު އަސާސީ މުސާރަ ވަނީ 55،000ރ. އަށް ބަދަލުކޮށް، މި ބަދަލާ އެކު މާލިއްޔަތު ކޮމިޓީގެ އިއްތިފާގުން ވަނީ މެންބަރުންގެ މުސާރަ 80،000ރ. އަށް ބޮޑުކުރަން ފާސްކޮށްފައެވެ. އެހެންކަމުން ކޮމިޓީ އެލަވަންސަށް ދޭ 20،000ރ. ހިމަނައިގެން މެންބަރެއްގެ މުސާރައިގެ ގޮތުގައި 100،000 ރުފިޔާ ޖެހެއެވެ.

މި ކޮމިޓީން މުސާރަ ބޮޑުކުރަން ފާސްކުރި ގޮތަކީ:

1. ރައީސުލްޖުމްހޫރިއްޔާ 120،000ރ.

2. ރައީސުލްޖުމްހޫރިއްޔާގެ ނައިބު - 93،000ރ.

3. ވަޒީރުން - 72،000ރ.

4. ރައްޔިތުންގެ މަޖިލިސް މެންބަރުން - 80،000ރ.

5. މަޖިލީހުގެ ރައީސް - 90،000ރ.

6. މަޖިލީހުގެ ނައިބު ރައީސް - 88،000ރ.

7. އުއްތަމަ ފަނޑިޔާރު - 91،000ރ.

8. ގަވަރުނަރު - 74،000ރ.

9. އޮޑިޓާ ޖެނެރަލް - 74،000ރ.

10. ޕްރޮސެކިއުޓާ ޖެނެރަލް - 74،000ރ.

11. މޭޔަރު - 46،000ރ.

12. ޑެޕިއުޓީ މޭޔަރު- 40،500ރ.

13. ސިޓީ ކައުންސިލް މެންބަރުން 35،000ރ.

14. އަތޮޅު ކައުންސިލް ރައީސް 33،000ރ.

15. ރަށު ކައުންސިލް ރައީސް 25،500ރ.

16. ރަށު ކައުންސިލް ނައިބުން 20،000ރ.

17. ރަށު ކައުންސިލަރުން 18،000ރ.

މާލިއްޔަތު ކޮމިޓީން މިއަދު މުސާރަތައް ބޮޑުކުރަން ފާސްކުރި ނަމަވެސް މިކަމާ މެދު ފަހުގެ ނިންމުން ނިންމާނީ ކޮމިޓީ ރިޕޯޓަށް ބަހުސްކުރުމަށްފަހު މަޖިލީހުގެ ތަޅުމުންނެވެ.

މަޖިލިސް މެންބަރުންގެ މުސާރަ ބޮޑުކުރުމުގެ މަޝްވަރާގައި ބައެއް މެންބަރުން ވަނީ އަންނަ ދައުރުން ފެށިގެން މި ބަދަލަށް އަމަލުކުރަން ހުށަހަޅުއްވާފައެވެ.

މަޖިލިސް މެންބަރުންނަށް ކުރިން ލިބެނީ ކޮމިޓީ އެލަވަންސާއެކު 80،000ރ އެވެ.