ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި ކުރިއަށް ގެންދިޔަ "2 ވަނަ ޖީއެސް ވޮލީބޯޅަ ޓޯނަމަންޓް 2023" ގެ ފައިނަލުގައި އަންގާރަދުވަހުގެ ރޭ ތިން ސެޓް އެއް ސެޓުން ޓީމު ހިޔާ ބަލިކޮށް މުބާރާތުގެ ޗެމްޕިއަންކަން ޓީމު ޕާމް އިން ހޯދައިފި އެވެ.

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވިއިރު، މުބާރާތް ކުރިއަށް ގެންގޮސްފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް ފައިނަލުގެ ޖާގައެއް ލިބޭގޮތަށެވެ. އަދި ލީގު ބުރުގެ ދެވަނަ އަދި ތިންވަނަ ޓީމުގެ މެދުގައި ސެމީ ފައިނަލް މެޗެއް ކުޅެ އެމެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބޭގޮތަށެވެ.

އެގޮތުން ލީގު ބުރުގެ އެއްވަަނަ ޓީމުގެ ގޮތުގައި ޓީމު ހިޔާ އިން ފައިނަލުގެ ފުރަތަަމަ ޖާގަ ހޯދިއިރު، ޓީމު ޕާމް ފައިނަލުގެ ޖާގައެއް ހޯދީ ސެމީ ފައިނަލުގައި ވާދަވެރި ކުޅުމަކަށްފަހު ތިން ސެޓު ދެ ސެޓުން ކެލާ ކައުންސިލްގެ ޓީމު ބަލިކުރުމަށްފަހު އެވެ. މީގެ އިތުރުން ލީގު ބުރުގައި ޓީމު ޕާމް އާއި ދެކޮޅަށް ކުޅުނު މެޗު ތިން ސެޓް އެއް ސެޓުން ކާމިޔާބުކުރީ ޓީމް ހިޔާ އިންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފައިނަލް މެޗުގެ ފުރަތަަމަ ސެޓް 23-25 އިން ޓީމު ޕާމް ކާމިޔާބުކުރި ނަމަވެސް ދެވަނަ ސެޓް 22-25 އިން ކާމިޔާބުކުރީ ޓީމް ހިޔާ އެވެ. މިއާއެކު ޖެހިގެންއައި ތިންވަނަ ސެޓުގައި ޓީމު ޕާމް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިސެޓް އެޓީމުން ކާމިޔާބުކުރީ 21-25 އިންނެވެ. އަދި މެޗުގެ ހަތަރުވަނަ ސެޓުގައި ޓީމު ޕާމްގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، މި ސެޓް ފަސޭހަކަމާއި އެކު 13-25 އިން ކާމިޔާބުކޮށް އެޓީމުން ވަނީ މުބާރާތުގެ ޗެމްޕިއަންކަން ހޯދާފައެވެ. އަދި ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ޓީމް ޕާމްގެ ލަޝިންދު މަތުމަލް އެވެ.

މުބާރާތުގެ އެންމެ މޮޅު ހަ ކުޅުންތެރިންނަކީ ލަޝިންދު މަތުމަލް (ޓީމް ޕާމް), މުއައްވަޒު އަބްދުﷲ (ޓީމް ކެލާ), މުބައްޝަރު (ޓީމް ހިޔާ), ކަވިޝްކާ (ޓީމް ކެލާ), މުހައްމަދު އަލީ (ޓީމް ޕާމް), އަދި އިބްރާހީމް އަލީ (ޓީމް ޕާމް) އެވެ.

މުބާރާތުގެ އެންމެ މޮޅު ލިބަރޯއަކަށް ހޮވުނީ މުހައްމަދު އަޒުމީން (ޓީއޯ ސްޕޯޓްސް ކުލަބު) އެވެ. އަދި މުބާރާތުގެ އެންމެ މޮޅު ކޯޗަކީ ޓީމު ޕާމްގެ އަހުމަދު މަތީން އެވެ. އަދި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ޓީމް ޕާމްގެ ލަޝިންދު މަތުމަލް އެވެ.