މިސްކިތްތައް ހަދާ ކުންފުނިތަކަށް ސަރުކާރުން ނުދައްކާ ހުރި 22 މިލިއަން ރުފިޔާ ހަމަޖައްސައިދީފިއެވެ.

އިސްލާމިކް މިނިސްޓްރީން ބުނީ ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވެރިކަމާއި ހަވާލުވެވަޑައިގެން އިރު މިސްކިތް އިމާރާތްކުރުމުގެ މަސައްކަތްކުރި 20 ކުންފުންޏަކަށް ދައްކަންޖެހޭ 22 މިލިއަން ރުފިޔާގެ ބިލްތަކަށް ފައިސާ މިހާރު ވަނީ ހަމަޖައްސަވާފައި ކަމަށެވެ.

އިތުރަށް އެ މިނިސްޓްރީން ބުނީ އަމާޒަކީ ވީ އެންމެ އަވަހަކަށް ހުރިހައި ކުންފުނި ތަކުގެ ބިލްތަކަށް ފައިސާ ދީ, ހުއްޓިފައިވާ މިސްކިތްތަކުގެ މަޝްރޫޢުތައް އަވަހަށް ނިންމުން ކަމަށެވެ.

Advertisement

ރައީސް ޑރ.މުއިއްޒުގެ ސަރުކާރުން ވަނީ  މިސްކިތްތަކުގެ އާބާތުރަ ފިލުވައި ރީތިކޮށް ބެލެހެއްޓުމަށް 15 މިލިއަން ރުފިޔާ ހަމަޖައްސަވާފައެވެ. މިއީ އެކަމަށް ކަނޑައެޅި ބަޖެޓުގެ ތިން ގުނަ ބޮޑު އަދަދެކެވެ.

މިސްކިތް ތަކުގެ އާބާތުރަ ފިލުވައި، ރީތިކޮށް ބެލެހެއްޓުމަށް ޓަކައި ކޮންމެ އަހަރަކު ދައުލަތުގެ ބަޖެޓުން އެކަމަށް ކުރެވޭ ހަރަދު މިހާތަނަށް ވުރެ ތިން ގުނަ އިތުރު ކުރުމަކީ ރައީސް ޑރ.މުއިއްޒުގެ ހަފްތާ 14 ގެ މަގު ޗާޓުގައި ހިމަނުއްވާފައިވާކަމެކެވެ.

މީގެ އިތުރުންވެސް މެދު ނުކެނޑި މިސްކިތް ތަކުގެ ހާލަތު ދެނެގަނެވޭނެ ނިޒާމެއް ގާއިމް ކުރުމުގެ މަސައްކަތް ވެސް ހަފްތާ 14 ގައި އެމަނިކުފާނު ވަނީ ހިމަނުއްވާފައެވެ.