ސަރުކާރުގެ އިސްވެރިންގެ މުސާރައަށް އިތުރުކުރަން ނިންމެވި މިންވަރު އިޖުތިމާއީ ފަންޑަކަށް ހަދިޔާކުރައްވަން ރައީސް ޑރ.މުޙައްމަދު މުޢިއްޒު ނިންމެވި ނިންމެވުމަށް ތާއީދުކުރައްވާ ދަޚިލީ ވަޒީރު ޢަލީ އިޙްސާން ވެސް އެގޮތަށް އަމަލުކުރައްވަން ނިންމަވާފައިވާކަން ހާމަކުރައްވައިފިއެވެ.

ރައީސުލްޖުމްހޫރިއްޔާ އާއި ނާއިބު ރައީސް އަދި ވަޒީރުންގެ މުސާރަ ބޮޑުކުރަން ރައްޔިތުންގެ މަޖިލިހުގެ މާލިއްޔަތު ކޮމިޓީން އިއްޔެ ވަނީ ފާސްކޮށްފައެވެ.

އެ ނިންމެވުމަކީ ސަރުކާރުން އެދިގެން ނިންމަވާފައިވާ އަދި އެމަނިކުފާނު ތާއީދުކުރައްވާ ނިންމެވުމެއް ނޫން ކަމުގައި ވިދާޅުވެ ރައީސް ޑރ މުހައްމަދު މުއިއްޒު ވަނީ މުސާރަ ބޮޑުކުރާން ބޭނުން ވެސް ނުވާކަމަށް ވެސް ވިދާޅުވެފައެވެ. އަދި ބޮޑުކުރި މުސާރަ ކުޑަކުދިންގެ ހިޔާފަދަ އިޖުތިމާޢީ ފަންޑަކަށް ހަދިޔާ ކުރަން ނިންމާފައިވާކަމަށް އެމަނިކުފާނު ވަނީ ވިދާޅުވެފައެވެ.

މިއާއި ގުޅިގެން ދާޚިލީ ވަޒީރު އިހްސާން ކުރެއްވި ޓުވީޓެއްގައި ބުނެފައިވަނީ، ރައީސްގެ ނިންމެވުމަށް ފުރިހަމައަށް ތާއީދުކުރައްވައި އެމަނިކުފާނަށް ލިބިވަޑައިގަންނަވާ މުސާރައިގެ ކުރިއެރުން އިޖުތިމާއީ ފަންޑަކަށް ހަދިޔާކުރައްވަން ނިންމަވާފައިވާ ކަމަށެވެ.

މިއަދު ގެނައި ބަދަލު ފާސްވެއްޖެ ނަމަ އެފަރާތްތަކަށް މުސާރައަކަށް ލިބޭނެ މިންވަރަކީ؛ 

ރައީސުލްޖުމްހޫރިއްޔާ 120،000ރ.

ރައީސުލްޖުމްހޫރިއްޔާގެ ނައިބު - 93،000ރ.

ވަޒީރުން - 72،000ރ.

ރައްޔިތުންގެ މަޖިލިސް މެންބަރުން - 80،000ރ.

މަޖިލީހުގެ ރައީސް - 90،000ރ.

މަޖިލީހުގެ ނައިބު ރައީސް - 88،000ރ.

އުއްތަމަ ފަނޑިޔާރު - 91،000ރ.

ގަވަރުނަރު - 74،000ރ.

އޮޑިޓާ ޖެނެރަލް - 74،000ރ.

ޕްރޮސެކިއުޓާ ޖެނެރަލް - 74،000ރ.

މޭޔަރު - 46،000ރ.

ޑެޕިއުޓީ މޭޔަރު- 40،500ރ.

ސިޓީ ކައުންސިލް މެންބަރުން 35،000ރ.

އަތޮޅު ކައުންސިލް ރައީސް 33،000ރ.

ރަށު ކައުންސިލް ރައީސް 25،500ރ.

ރަށު ކައުންސިލް ނައިބުން 20،000ރ.

ރަށު ކައުންސިލަރުން 18،000ރ.

މާލިއްޔަތު ކޮމިޓީން މުސާރަތައް ބޮޑުކުރަން ފާސްކުރި ނަމަވެސް މިކަމާ މެދު ފަހުގެ ނިންމުން ނިންމާނީ ކޮމިޓީ ރިޕޯޓަށް ބަހުސްކުރުމަށްފަހު މަޖިލީހުގެ ތަޅުމުންނެވެ.