މޯލްޑިވްސް ކަރެކްޝަނަލް ސާވިސްގެ އަމާޒަކީ ދެވަނަ ޓާމުގެ ކިޔެވުން ފެށުމުގެ ކުރިން މާލެ ޖަލު ހުސްކުރުން ކަމަށް އެ އިދާރާގެ އެސިސްޓެންޑް ކޮމިޝަނަރު މުޙައްމަދު އާސިފް ވިދާޅުވެއްޖެ އެވެ. 

އޭނާ އެފަދައިން ވިދާޅުވެފައިވަނީ މިނިސްޓްރީ އޮފް ހޯމްލޭންޑް ސެކިއުރިޓީއާއި ކަރެކްޝަން ސާވިސް އަދި ފުލުހުންގެ ޚިދުމަތް ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. 

އާސިފް ވިދާޅުވީ މާލެ ޖަލު ހުސްކުރުމުގެ މަސައްކަތަކީ މޯލްޑިވްސް ކަރެކްޝަނަލް ސާވިސްއިން މިވަގުތު އެންމެ އިސްކަމެއްދީގެން ކުރަމުންދާ މަސައްކަތް ކަމަށެވެ. 

Advertisement

ދަރުމަވަންތަ ސްކޫލާއި އިންވެގެން މާލޭ ޖަލު ހުރުމާއި ގުޅިގެން ދަރުމަވަންތަ ސްކޫލްގައި ކިޔަވާ ދަރިވަރުންނަށް ދިމާވާ ބައެއް ނޭދެވޭ ކަންތައްތަކާއި ގުޅިގެން މާލޭ ޖަލު ހުސްކުރުމުގެ މަސައްކަތް މިހާރު ކުރިއަށްދާކަން ފާހަގަކުރައްވާ އާސިފް ވިދާޅުވީ، ޤައިދީން ބަދަލުކުރުމުގެ މަސައްކަތުގެ ދަށުން މިހާރު މާފުށީ ޖަލުގެ ބައެއް ޔުނިޓްތަކުގައި ތިބި ޤައިދީންނަށް ބައެއް ބަދަލު ގެނެސް، އެ ޖަލުގައި އިތުރު ޖާގަތައް މިހާރު ހަދަމުން ދާކަމަށެވެ.

އޭގެ އިތުރުން އައްސޭރި ޖަލުގައި ވެސް އިތުރު ޖާގަތައް ހަދާ، މަލޭ ޖަލުގައި ތިބި ޤައިދީން އެ ޖަލުތަކަށް ބަދަލުކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ. 

އެ މަސައްކަތުގެ އިތުރުން މޯލްޑިވްސް ކަރެކްޝަނަލް ސާވިސްގެ 5 އަހަރުގެ އެކްޝަން ޕްލޭނު ހެދުމުގެ މަސައްކަތް ވެސް އެ އިދާރާއިން މިހާރު ކުރަމުން ދާ ކަމަށް އާސިފް ވަނީ ވިދާޅުވެފަ އެވެ. 

އެގޮތުން ކޯޓު ކޭސްތަކާއި ބޭސްފަރުވާއަށް މާލެ ގެންނަ ޤައިދީން އެތަނުގައި ބޭތިއްބޭނެ އިންތިޒާމް ހަމަޖެސުމަށް އެތަނުގެ ބައެއް މަރާމާތުތައް ކުރިއަށް ގެންދާކަމަށް ވެސް އާސިފު ފާހަގަކުރެއްވި އެވެ.