ސަރުކާރުގެ އަމާޒަކީ ފަތުރުވެރިކަމުން ސަރުކާރަށް ލިބޭ އާމްދަނީ 6 ބިލިއަން ރުފިޔާއަށް އިތުރުކުރުން ކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް ވިދާޅުވެއްޖެ އެވެ. 

މިނިސްޓަރު މިފަދައިން ވިދާޅުވެފައި ވަނީ ރާއްޖެ ޒިޔާރަތްކުރި 1.8 މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އިންޓަނޭޝަނަލް އެއާޕޯޓުގައި ކުރިއަށްގެންދިޔަ ޚާއްސަ ހަރަކާތް ނިންމަވާލެއްވުމަށް ފަހު ނޫސްވެރިންނަށް ދެއްވި އިންޓަވިއުއެއްގަ އެވެ. 

މިނިސްޓަރު ފައިސަލް ވިދާޅުވީ މިނިސްޓްރީން މަސައްކަތް ކުރަމުންދަނީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ސަރުކާރަށް ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރު ހެދުމަށް ކަމަށެވެ. 

Advertisement

އެގޮތުން އެ އަމާޒަށް ވާސިލުވުމަށް ޒަމާނީ ފެންވަރަކަށް ވެލާނާ އިންޓަނޭޝަނަލް އެއާޕޯޓު ތަރައްގީކުރުމަށް ފަށާފައިވާ މަޝްރޫއު ކުރިއަށް އޮތް ގާތްގަނޑަކަށް 8 މަހާއި 10 މަސްތެރޭ ނިންމުމުގެ މަސައްކަތް ކުރަމުންދާކަން މިނިސްޓަރު ފާހަގަކުރެއްވި އެވެ. 

އެއާ އެކު މިނިސްޓަރު ވިދާޅުވީ އެ މަސައްކަތް ނިމިގެން ދިއުމާއެކު، ފަތުރުވެރިކަން ފުޅާކުރުމަށް ދާއިރާގެ ސްޓޭކް ހޯލްޑަރުންނާއި ގުޅިގެން ކުރެވޭ މަސައްކަތުން ކާމިޔާބު ނަތީޖާތަކެއް ނެރެދެވިދާނެ ކަމަށް ޤަބޫލު ކުރައްވާ ކަމަށެވެ. 

ފަތުރުވެރިކަމުގެ ސިނާއަތަކީ މިހާރުވެސް ސަރުކާރަށް އެންމެ ގިނައިން އާމްދަނީ ހޯދައިދޭ ސިނާއަތުގެ ގޮތުގައި ފާހަގަކުރައްވާ ފައިސަލް ވިދާޅުވީ ސަރުކާރުން މިހާރު އަމާޒުހިފާފައިވަނީ ފަތުރުވެރިކަމުން ހޯދާ އާމްދަނީ 4 ބިލިއަނުން 6 ބިލިއަން ރުފިޔާއަށް އިތުރުކުރުމަށް ކަމަށެވެ. 

މިނިސްޓަރު ފައިސަލް ވިދާޅުވީ ފަތުރުވެރިކަމުގެ ސިނާއަތުން ހޯދާ އާބާދީ 6 ބިލިއަނަށް އިތުރުކުރުމުގެ އަމާޒުގައި މަސައްކަތް ކުރި ނަމަވެސް، ރައީސުލްޖުމްހޫރިއްޔާ ޑރ މުއިއްޒު ގެންގުޅުވުއްވާ މަސައްކަތުގެ ދުވެއްޔާއެކު އެ އަދަދު އެއަށްވުރެ ވެސް އިތުރު ކުރެވިދާނެ ކަމަށް ގަބޫލުކުރައްވާ ކަމަށެވެ. 

އޭގެ އިތުރުން މިނިސްޓަރު ފައިސަލް ވަނީ ކުރިއަށް އޮތް ތަނުގައި ރިސޯޓު ފަތުރުވެރިކަމާއި އެއްވަރަށް ލޯކަލް ޓުއަރިޒަމްވެސް ފުޅާވެގެންދާނެ ކަމުގެ ޔަގީންކަން ދެއްވާފަ އެވެ.