ރައްޔިތުންގެ މަޖިލީހުގެ މެންބަރުންގެ މުސާރަ ކޮމިޓީ އެލަވަންސާ އެކު 100،000 ރުފިޔާއަށް ބޮޑުކުރުން ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު އިފްހާމް ހުސައިން ދިފާއުކުރައްވައިފި އެވެ.
މި ކަން ދިފާއުކުރައްވަމުން އިފްހާމް ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ މެންބަރުން ގެންދަވަނީ އެ ބޭފުޅުންގެ ދާއިރާއަށް އެތަކެއް ގުރުބާނީއެއް ވެވަޑައިގަންނަވަމުން ކަމަށެވެ.
"އަޅުގަނޑަށް އެނގިފައިވާ ގޮތުގައި މެންބަރުން ދަނީ އެމީހުންގެ ދާއިރާއަށްޓަކައި ބޮޑެތި ގުރުބާނީތަކެއް ވަމުން. މުހިންމު ދުވަސްތައް ފާހަގަކުރުމުން ފެށިގެން ވަކިވަކި ގޭބިސީތައް އަޕްގްރޭޑްކުރުމާ ހަމައަށް އަގުހުރި އެހީތެރިކަމެއް މެންބަރުން ދަނީ ފޯރުކޮށްދެއްވަމުން. އެމީހުންގެ މުޅި މުސާރަ ޚާއްސަވަނީ ރައްޔިތުންނަށް ޚިދުމަތް ކުރުމަށް."
އިފްހާމް ވިދާޅުވިއެވެ.
އިފްހާމް މިފަދައިން ވިދާޅުވި ނަމަވެސް ސިޔާސީ އެތައް ބޭފުޅުންނާއި ރައްޔިތުން ވެސް ދަނީ މެންބަރުންގެ މުސާރަ ބޮޑުކުރުމާ މެދު ނުރުހުން ފާޅުކުރަމުންނެވެ.
އެގޮތުން ރައީސުލްޖުމްހޫރިއްޔާއާއި ރައީސުލްޖުމްހޫރިއްޔާގެ ނާއިބު އަދި ވަޒީރުންގެ މުސާރަ ބޮޑުކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމީ ރައީސުލްޖުމްހޫރިއްޔާގެ އެދިވަޑައިގަތުމަކާ ގުޅިގެން ނޫން ކަމަށާއި އަދި އެއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތާއީދުކުރައްވާ ނިންމެވުމެއް ނޫން ކަމަށް ސަރުކާރުން ވަނީ ހަާމަކޮށްފައެވެ.
އަދި މުސާރައަށް އިތުރުވާ ބައި އިޖުތިމާއީ ފަންޑަކަށް ހަދިޔާ ކުރައްވާނެ ކަމަށް ރައީސް ޑރ.މުއިއްޒު ވިދާޅުވެފައިވާއިރު، މި ނިންމެވުމަށް ސަރުކާރުގެ އެހެނިހެން އިސްވެރިން ވެސް ވަނީ އެއްބާރުލުން ދެއްވާފައެވެ.
މީގެ އިތުރުން މި ނިންމުމާ ދެކޮޅަށް ދަ ޑިމޮކްރެޓްސް އިން ތްރީ ލައިން 'ރެޑް' ވިޕެއް ނެރެފައިވާއިރު، މާލިއްޔަތު ކޮމިޓީގައި ހިމެނިވަޑައިނުގަންނަވާ މަޖިލީހުގެ އެހެން ބައެއް މެންބަރުން ވެސް ގެންދަވަނީ މި ނިންމެވުމާ ދެކޮޅު ހައްދަވަމުންނެވެ.
Advertisement
This content is created and paid for by advertisers and does not involve Voice Journalists
