މެންބަރުންނަށް ލިބޭ މުސާރައަށްވުރެ ދާއިރާގެ ރައްޔިތުންގެ ހައްޤުގައި ޚަރަދު ކުރާ އެއްޗެއް ބޮޑު ކަމަށް ރައްޔިތުންގެ މަޖިލީހުގެ އަލިފުށި ދާއިރާގެ މެންބަރު އަދި އެމްޑީޕީގެ ޕީޖީ ލީޑަރު މުޙައްމަދު ރަޝީދު ހުސެއިން (ބިގޭ) ވިދާޅުވެއްޖެއެވެ.
ސަރުކާރުގެ އިސްފަރާތްތަކުގެ މުސާރައަށް ގެނައި ބޮޑު ބަދަލާއި ގުޅިގެން ގިނަ ބައެއްގެ ފާޑު ކިޔުން އަމާޒުވެފައިވަނިކޮށް އެމްޑީޕީ ޕީޖީ އިން ބޭއްވި ނޫސްވެރިންގެ ބައްދަލުވުމުގައި މެންބަރު ހުސެއިން ވިދާޅުވީ، މުސާރައިގެ ކުރިއެރުން ދިނުމުގައި ބެލީ މަޖިލީހުން މުސާރަ ކަނޑައަޅާ ހުރިހާ ފަރާތަކަށް އެއްމިންގަނޑެއްގައި ހިފެހެއްޓޭނެގޮތައް އެކަން ކުރުން ކަމަށެވެ.
އަދި މިކަމުގައި އެއްވެސް ފަރާތެއް އިސްތިސްނާކޮށްފައި ނުވާނެ ކަމަށް ވެސް އެނާ ވިދާޅުވިއެވެ.
"މިހާރު ދައުލަތުގެ ތިން ބާރުގެ ތެރެއިން އެއްބާރު މަޖިލީހަކީ، އެހެން ނަމަވެސް އަނެއް ދެ ބާރު، ސަރުކާރު ހިންގުމުގެ ބާރާއި ޢަދުލު އިންސާފު ހިންގުމުގެ ބާރުގެ އެންމެ މަތީ އިސްވެރިޔަކަށް މިހާރު ވެސް މުސާރަ މާބޮޑުތަނުން ވެސް ބޮޑުވާނެ މަޖިލިސް މެންބަރަކަށް ވުރެ، މަޖިލސްގެ ރައީސަށްވުރެ ވެސް”
ރައްޔިތުންގެ މަޖިލީހުގެ އަލިފުށި ދާއިރާގެ މެންބަރު މުޙައްމަދު ރަޝީދު ހުސެއިން
މެންބަރު ހުސެއިން ވިދާޅުވީ މި މަސައްކަތަކީ މަޖިލީހަށް ޚާއްސަކުރެވިގެން ކުރެވިފައިވާ މަސައްކަތެއް ނޫން ކަމަށެވެ.
މެންބަރު ހުސެއިން ވިދާޅުވީ މުސާރަތަކަށް ބަދަލު ގެނައުމަށް މާލިއްޔަތު ކޮމިޓީއިން މަޝްވަރާކުރީ ރައީސް އޮފީހުން އެ އޮފީހުން އެދޭ ބައެއް ދާއިރާތަކަށް މުސާރަ ބޮޑުކުރުމަށް އެދި ފޮނުވި ސިޓީއަކަށް ވެސް ރިޢާޔަތްކުރައްވާފައި ކަމަށެވެ.
އަދި އެ ސިޓީއާ އެކު ދެން މަސައްކަތް ކުރީ ރައްޔިތުންގެ މަޖިލީހުން މުސާރަ ކަނޑައަޅަންޖެހޭ ހުރިހާ ދާއިރާތަކަށް އެއްހަމައެއްގައި މުސާރަ ކަނޑައެޅުމަށްކަމަށް ވެސް އޭނާ ވިދާޅުވިއެވެ.
މެންބަރު ހުސެއިން ވިދާޅުވީ މަޖިލީހުގައި މެންބަރުންގެ ހައްޤުތައް ހިމާޔަތް ކުރުމާއި ރައްކާތެރިކުރުމާއި ޢިނާޔަތްތަކުގެ ކަންކަން އަބަދުވެސް ކުރިއަށް ދާ ކަމަށާއި، އަދި ވަކިވަކި މެންބަރުން ވެސް އެ ބޭފުޅުންނަށް ދިމާވާ ދަތި ކަންކަމުގެ ވާހަކަ ދައްކަވާކަމަށެވެ.
ރަޝީދު ވިދާޅުވީ މެންބަރުން ފާހަގަކުރައްވާފައިވާ ގޮތުން އެ ބޭފުޅުން ރަށްރަށުގައި އުޅުއްވާފައި މާލެ ވަޑައިގެން ތަންތަނުގައި ކުއްޔަށް އުޅުއްވަނީ ވަރަށް އުނދަގުލުގައި ކަމަށެވެ.
"އެހެންވީމަ އެހުރިހާ ކަމެއް އެހާ ދަތިކޮށް, މާލޭގައި ވަރަށް ޚަރަދު ކުރައްވައިގެން އުޅެން ޖެހުމުގެ އިތުރުން، ރައްޔިތުންގެ މަޖިލީހަށް ލިބޭނެ ރިސެސްގެ ވަގުތެއް ކޮންމެ ދެތިން މަހުން އެއްމަހު، އެކޮންމެ ވަގުތަކު, އަދި އެއަށްވުރެ ވެސް ގިނައިން ރައްޔިތުންގެ މަންދޫބު ރައްޔިތުންގެ ގާތަށް ވަޑައިގަންނަވަންޖެހޭ، އެކުރާ ކޮންމެ ދަތުރަކީ ވެސް އިންތިހާއަށް ކުރަން ޖެހޭ ޚަރަދުތައް، އެހެންވީމަ މި ހުރިހާ ކަންކަންކަމަކަށް ބަލާއިރު ރައްޔިތުންގެ މަޖިލިސްގެ ގިނަ މެންބަރުންގެ ވާހަކަތަކުން އަޅުގަނޑަށް އެނގެނީ އެ މަހެއްގައި ލިބޭ މުސާރައަށްވުރެ ބޮޑު ހޭދައެއް ރައްޔިތުންގެ ހައްޤުޤައި ކުރަން ޖެހޭކަން”
ރައްޔިތުންގެ މަޖިލީހުގެ އަލިފުށި ދާއިރާގެ މެންބަރު މުޙައްމަދު ރަޝީދު ހުސެއިން
ރައީސް އާއި ނައިބު ރައީސް ހިމެނޭހެން ދައުލަތުގެ އިސްވެރިންގެ މުސާރަ ބޮޑުކުރަން ހުށަހެޅިއިރު މެންބަރުންގެ މުސާރަ 100،000 ރުފިޔާ އަށް އިތުރުކޮށްފައިވުމުން ގިނަ ބަޔަކު އަންނަނީ އެމްޑީޕީއަށް އަމާޒުކޮށް ފާޑުކިޔަމުންނެވެ.
Advertisement
This content is created and paid for by advertisers and does not involve Voice Journalists
