މެންބަރުންނަށް ލިބޭ މުސާރައަށްވުރެ ދާއިރާގެ ރައްޔިތުންގެ ހައްޤުގައި ޚަރަދު ކުރާ އެއްޗެއް ބޮޑު ކަމަށް ރައްޔިތުންގެ މަޖިލީހުގެ އަލިފުށި ދާއިރާގެ މެންބަރު އަދި އެމްޑީޕީގެ ޕީޖީ ލީޑަރު މުޙައްމަދު ރަޝީދު ހުސެއިން (ބިގޭ) ވިދާޅުވެއްޖެއެވެ.

ސަރުކާރުގެ އިސްފަރާތްތަކުގެ މުސާރައަށް ގެނައި ބޮޑު ބަދަލާއި ގުޅިގެން ގިނަ ބައެއްގެ ފާޑު ކިޔުން އަމާޒުވެފައިވަނިކޮށް އެމްޑީޕީ ޕީޖީ އިން ބޭއްވި ނޫސްވެރިންގެ ބައްދަލުވުމުގައި މެންބަރު ހުސެއިން ވިދާޅުވީ، މުސާރައިގެ ކުރިއެރުން ދިނުމުގައި ބެލީ މަޖިލީހުން މުސާރަ ކަނޑައަޅާ ހުރިހާ ފަރާތަކަށް އެއްމިންގަނޑެއްގައި ހިފެހެއްޓޭނެގޮތައް އެކަން ކުރުން ކަމަށެވެ.

އަދި މިކަމުގައި އެއްވެސް ފަރާތެއް އިސްތިސްނާކޮށްފައި ނުވާނެ ކަމަށް ވެސް އެނާ ވިދާޅުވިއެވެ.

Advertisement

މެންބަރު ހުސެއިން ވިދާޅުވީ މި މަސައްކަތަކީ މަޖިލީހަށް ޚާއްސަކުރެވިގެން ކުރެވިފައިވާ މަސައްކަތެއް ނޫން ކަމަށެވެ.

މެންބަރު ހުސެއިން ވިދާޅުވީ މުސާރަތަކަށް ބަދަލު ގެނައުމަށް މާލިއްޔަތު ކޮމިޓީއިން މަޝްވަރާކުރީ ރައީސް އޮފީހުން އެ އޮފީހުން އެދޭ ބައެއް ދާއިރާތަކަށް މުސާރަ ބޮޑުކުރުމަށް އެދި ފޮނުވި ސިޓީއަކަށް ވެސް ރިޢާޔަތްކުރައްވާފައި ކަމަށެވެ.

އަދި އެ ސިޓީއާ އެކު ދެން މަސައްކަތް ކުރީ ރައްޔިތުންގެ މަޖިލީހުން މުސާރަ ކަނޑައަޅަންޖެހޭ ހުރިހާ ދާއިރާތަކަށް އެއްހަމައެއްގައި މުސާރަ ކަނޑައެޅުމަށްކަމަށް ވެސް އޭނާ ވިދާޅުވިއެވެ.

މެންބަރު ހުސެއިން ވިދާޅުވީ މަޖިލީހުގައި މެންބަރުންގެ ހައްޤުތައް ހިމާޔަތް ކުރުމާއި ރައްކާތެރިކުރުމާއި ޢިނާޔަތްތަކުގެ ކަންކަން އަބަދުވެސް ކުރިއަށް ދާ ކަމަށާއި، އަދި ވަކިވަކި މެންބަރުން ވެސް އެ ބޭފުޅުންނަށް ދިމާވާ ދަތި ކަންކަމުގެ ވާހަކަ ދައްކަވާކަމަށެވެ.

ރަޝީދު ވިދާޅުވީ މެންބަރުން ފާހަގަކުރައްވާފައިވާ ގޮތުން އެ ބޭފުޅުން ރަށްރަށުގައި އުޅުއްވާފައި މާލެ ވަޑައިގެން ތަންތަނުގައި ކުއްޔަށް އުޅުއްވަނީ ވަރަށް އުނދަގުލުގައި ކަމަށެވެ.

ރައީސް އާއި ނައިބު ރައީސް ހިމެނޭހެން ދައުލަތުގެ އިސްވެރިންގެ މުސާރަ ބޮޑުކުރަން ހުށަހެޅިއިރު މެންބަރުންގެ މުސާރަ 100،000 ރުފިޔާ އަށް އިތުރުކޮށްފައިވުމުން ގިނަ ބަޔަކު އަންނަނީ އެމްޑީޕީއަށް އަމާޒުކޮށް ފާޑުކިޔަމުންނެވެ.