މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މިއަހަރު ދައްކަން ޖެހޭ ޓެކްސް ގެ މުހިންމު ސުން ގަޑި ތަކެއް ހާމަކޮށްފިއެވެ.

މިގޮތުން މީރާއިން ބުނީ މި މަހުގެ 28 ވަނަ ދުވަހަކީ މި އަހަރުގެ ނޮވެމްބަރު މަހުގެ ޖީއެސްޓީ ބަޔާން ހުށަހަޅައި ފައިސާ ދެއްކުމުގެ ސުންގަޑިގެ އިތުރުން އެއާޕޯޓު ޓެކްސް ވެސް ދައްކަން ޖެހޭ ދުވަސް ކަަމަށެވެ.

އެހެންކަމުން ޖީއެސްޓީއަށް ރަޖިސްޓަރީކޮށްފައިވާ ފަރާތްތަކުން ޖީއެސްޓީ ބަޔާން ހުށަހަޅާއިރު، ކަނޑައެޅިފައިވާ މުއްދަތުގެ ތެރޭގައި ޕްލާސްޓިކް ކޮތަޅުގެ ފީގެ ގޮތުގައި ނަގާފައިވާ އަދަދުތައް ޓެކްސް ބަޔާނުގައި ހިމަނައި، އެ ފައިސާވެސް އެ އޮތޯރިޓީއަށް ދައްކަން ޖެހޭނެ ކަމަށް މީރާއިން ބުނެ އެވެ. 

Advertisement

މީގެ އިތުރުންވެސް މި ޑިސެންބަރު މަހުގެ 28 ވަނަ ދުވަހަކީ މި އަހަރުގެ ނޮވެމްބަރު މަހުގެ ގްރީން ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑީގެ ގޮތުގައި މީރާއިން ކަނޑައަޅާފައިވާ ތާރީޚެވެ.

އަދި މި ހިނގާ މަހުގެ 31 ވަނަ ދުވަހަކީ އަންނަ އަހަރުގެ ފުރަތަމަ ކުއާޓަރުގެ ޓޫރިޒަމް ލޭންޑް ރެންޓް ދެއްކުމުގެ ސުންގަޑި ކަމަށް އެ އޮތޯރިޓީން ބުނެ އެވެ.މީރާއިން ބުނީ މި ހުރިހާ ޓެކުހެއްގެ ޓެކްސް ބަޔާންވެސް އެ އޮތޯރިޓީގެ އޮންލައިން ޕޯޓަލް "މީރާކަނެކްޓް" މެދުވެރިކޮށް ފައިސާ ދެއްކޭނެ ކަމުގަ އެވެ.

އަދި މި މުއްދަތުގެ ތެރޭގައި އެއްވެސް ވިޔަފާރި މުއާމަލާތެއް ހިންގާފައި ނުވާ ފަރާތްތަކުން "ވާރުޕޭ" މެދުވެރިކޮށް ޖީއެސްޓީ ސުން-ބަޔާން ހުށަހެޅޭނެ ކަމަށް ވެސް އެ އިދާރާއިން ބުނެއެވެ.

މީގެ އިތުރުންވެސް މީރާއިން ވަނީ އަންނަ އަހަރުގެ ޓެކްސް ތާރީޚުތައްވެސް އެ އިދާރާގެ ވެބްސައިޓުގައި އާންމު ކޮށްފައެވެ.

ޓެކްސް ބަޔާން ތައްޔާރުކުރުމަށް އަދި ހުށަހެޅުމަށް އެއްވެސް އެހީތެރިކަމެއް ބޭނުންވާނަމަ، ލަސް ނުކޮށް އެ އޮތޯރިޓީން އެހީތެރިކަން ހޯދުމަށް މީރާއިން ވަނީ އެދިފައެވެ.