ތުރުކީވިލާތުގެ ސަރުކާރުގެ ފަރާތުން ޚަރަދުކުރާ ތުރުކީ ސްކޮލާޝިޕް 2024 އަށް ކުރިމަތިލުމަށް މިނިސްޓްރީ އޮފް ހަޔާ ސެކަންޑަރީ އެޑިއުކޭޝަން، ލޭބާ އެންޑް ސްކިލްސް ޑިވެލޮޕްމަންޓް އިން ފުރުސަތު ހުޅުވާލައިފިއެވެ.

އެ މިނިސްޓްރީން ބުނީ  ތުރުކީވިލާތުގެ ސަރުކާރުގެ ހަރަދުގައި އެ ގައުމުގައި ހުރެގެން މަތީ ތައުލީމު ހާސިލްކުރުމުގެ ފުރުސަތު މި ސްކޮލަޝިޕްތަކުން ފަހިވެގެން ދާނެ ކަމަށެވެ.

ކޯހުގެ ދާއިރާތަކުގެ މައުލޫމާތާއި ޝަރުތުތައް ހަޔާ އެޑިއުކޭޝަން މިނިސްޓްރީގެ ވެބްސައިޓުގައި ވަނީ ޝާއިއުކޮށްފައިއެވެ.  

އެ ސްކޮލާޝިޕްތަކުގެ ދަށުން ކިޔެވޭ ކޯސްތަކުން ފުރުސަތު ހުޅުވާލާފައިވާ އަދަދަކީ:

1. ބެޗްލާސް ޑިގްރީ: 15 ދަރިވަރުން

2. މާސްޓާސް ޑިގްރީ: 10 ދަރިވަރުން

3. ޑޮކްޓޯރަލް ޑިގްރީ: ފަސް ދަރިވަރުން

އެޕްލިކޭޝަން ފޯމް ހުށަހެޅޭނީ އަންނަ އަހަރުގެ ޖެނުއަރީ މަހުގެ 7 ވަނަ ދުވަހުގެ 13:30ގެ ކުރިންނެވެ. އޭގެ ތެރެއިން އެ ސްކޮލަޝިޕަށް ނޮމިނޭޓް ކުރެވޭ ކެންޑިޑޭޓުން މިނިސްޓްރީން އެންގުމުން، އަންނަ އަހަރުގެ ފެބްރުއަރީ 20ގެ ކުރިން ސްކޮލަޝިޕްގެ އޮންލައިން އެޕްލިކޭޝަން ހުށަހަޅަންޖެހޭނެއެވެ.

ސްކޮލަޝިޕަށް އެދި ފޯމު ހުށަހަޅާނީ ހަޔާ އެޑިއުކޭޝަން މިނިސްޓްރީގެ ޕޯޓަލް މެދުވެރިކޮށެވެ. ސްކޮލަޝިޕްގެ ދަށުން ޓިއުޝަން ފީ، މެޑިކަލް އިންޝުރެންސް، ދެކޮޅު ޓިކެޓް، އެކޮމޮޑޭޝަން އަދި ސްޓައިޕެންޑް ކޯސް އިންތިޒާމް ކުރާ ފަރާތުން ހަމަޖައްސައިދޭނެ ކަމަށް މިނިސްޓްރީން ބުނެއެވެ.

ރައީސް ޑރ. މުޙައްމަދު މުއިއްޒު މިދިޔަ މަހު ވެރިކަމާ ހަވާލުވެވަޑައިގަތުމަށް ފަހު އެންމެ ފުރަތަމަ ރަސްމީ ދަތުރުފުޅު ކުރެއްވީ ތުރުކީވިލާތަށެވެ. އަދި އެ  ދަތުރުފުޅަށް ފަހު އެމަނިކުފާނު ވަނީ އަންނަ އަހަރުން ފެށިގެން ރާއްޖެއަށް އިތުރު 30 ސްކޮލާޝިޕްގެ ފުރުސަތު ދޭނެ ކަމުގެ ޔަގީންކަން އެ ޤަައުމުގެ ސަރުކާރުން ދެއްވާފައިވާ ކަމަށް ވިދާޅުވެފައިވެއެވެ.