ސިޔާސީ ގޮތުން ރަސްމާލެ އާއި ބެހޭގޮތުން ދެކެވެމުންދާ ވާހަކައަށް ރައްދު ދެއްވަން ބޭނުންފުޅުނުވާ ކަމަށާއި ބޭނުންފުޅުވަނީ ރަސްމާލެ ތަރައްގީ ކުރުމުގެ އަމާޒަށް ވާސިލުވާން ކަމަށް އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ޕީއެސްއެމްގެ ރާއްޖެމިއަދު ޕްރޮގްރާމްގައި މިރޭ ވާހަކަފުޅު ދައްކަވަމުން ފަޒުލް ވިދާޅުވީ ސިޔާސީ ގޮތުން ލަފާކުރާ ވާހަކައަކަށް މާބޮޑު ރައްދު ދެއްވަން ބޭނުންފުޅުނުވާ ކަމަށާއި ބޭނުމަކީ ރައީސް ޑރ.މުއިއްޒުގެ އަމާޒަށް ވާސިލުވުމަށް މަސައްކަތްކުރުން ކަމަށެވެ.
"ސިޔާސީ ގޮތުން ވާހަކަ ދައްކަންޏާ ދައްކަންވީ. އެކަމަކު އަޅުގަނޑުމެން މި އަންނަނީ އަމާޒެއްގައި. މަގްސަދެއްގައި. ރައްޔިތުންތަކަކަށް އުންމީދެއް ދީގެން އެ އުންމީދު ހާސިލްކުރުމަށް ޓަކައި. އެހެންވީމަ އަދި ސިޔާސީ ގޮތުން ދައްކާ ވާހަކައަކަށް އިރާދަ ކުރެއްވިއްޔާ އަޅުގަނޑުމެންގެ އަމާޒެއް އެއްކައިރިއެއް ނުވާނެ. އަޅުގަނޑުމެންގެ އަމާޒު ދާނީ ސީދަލަށް އިރާދަ ކުރެއްވިއްޔާ. "
ފަޒުލް ވިދާޅުވިއެވެ.
މީގެ އިތުރުން ފަޒުލް ވިދާޅުވީ ސިޔާސީ ގޮތުން ވާހަކަ ދައްކާނަމަ، ދައްކަވާނެ ވަރުގެ މައުލޫމާތު އެބަހުރި ކަމަށެވެ. އެގޮތުން 76 ހެކްޓަރަކާ އަޅާމިކިޔާލަނީ 1093 ހެކްޓަރުގެ މަޝްރޫއަކާ ކަމަށް ފަޒުލް ވިދާޅުވިއެވެ.
ސަރުކާރު ބަދަލުވަމުން ނުވަތަ ކެންޕޭންތެރޭގައި ހިއްކަމުން ދިޔަ ހުޅުމާލެ ފޭސް 3 ގެ މަޝްރޫއުއަށް އިޝާރާތް ކުރައްވަމުން ފަޒުލް ވިދާޅުވީ ހުޅުމާލެއިން 10 ހެކްޓަރާއި ތިލަފުށިން ދޫކޮށްލި 10 ހެކްޓަރާ އެކު ޖުމްލަ 20 ހެކްޓަރު ގެއްލިގެން ދިޔަ ކަމަށެވެ. މިކަމުގެ ސަބަބުން ރައްޔިތުންނަށް ލިބުނީ ހަމައެކަނި 76 ހެކްޓަރުކަމަށް ވެސް އޭނާ ވިދާޅުވިއެވެ. އަދި މީގެ އިތުރުން އަގުނުކޮށް އޮތް ތާކުން ވެސް ކުރީ ސަރުކާރުގެ ސަބަބުން 60 ހެކްޓަރު ރައްޔިތުންނަށް ގެއްލިފައިވާ ކަމަށް ވެސް ފަޒުލް ވިދާޅުވިއެވެ.
ފަޒުލް ވިދާޅުވީ ސިޔާސީ ގޮތުން ދެއްކޭނެ މިފަދަ ކިތަންމެ ވާހަކައެއް އެބަހުރި ކަމަށާއި މިހެން އަންނަ މައުލޫމާތުތަކާ މެދު ރައްޔިތުން ފުންކޮށް ވިސްނާލަން ޖެހޭ ކަމަށެވެ. އަދި ރައްޔިތުންގެ ބޯހިޔާވަހިކަމުގެ ހުވަފެނުގައި ރައީސް ޑރ.މުއިއްޒު ކުލަ ޖައްސަވައިދެއްވާނެ ކަމުގައި ވެސް ފަޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
