އުރީދޫ ފަން ރަން ފަދަ އިޖުތިމާޢީ ހަރަކާތް ތަކަކީ، އޭގެ ސަބަބުން ރައްޔިތުންނަށް ވަރަށް ބޮޑަށް ހިތްހަމަޖެހުން ގެނުވާދޭ ހަރަކާތްތަކެއް ކަމަށް ރައީސުލްޖުމުހޫރިއްޔާގެ ނާއިބު، ހުސައިން މުހައްމަދު ލަތީފް ވިދާޅުވެއްޖެއެވެ.
މިއަދު ބޭއްވުނު އުރީދޫ ފަން ރަންގައި ޚާއްސަ މެހެމާނެއްގެ ގޮތުން ބައިވެރިވެ ވަޑައިގެންނެވި، ނާއިބު ރައީސް، ފަން ރަން އަށްފަހު ދެއްވި ޚާއްސަ ބަސްދީގަތުމެއްގައި އެމަނިކުފާނުވަނީ، އެ ދުވުމަށް ދައުވަތު އެރުވި ކަމަށްޓަކައި އުރީދޫއަށް ޚާއްސަ ޝުކުރެއް އަދާކުރައްވާފައެވެ.
"ހަގީގަތުގައި މިފަދަ ހަރަކާތްތަކަކީ، ނޫނީ އިޖުތިމާޢީ ގޮތުން ކުރެވޭ މަސައްކަތްތަކަކީ، ރައްޔިތުންނާ ވަރަށް ގާތް، ވަރަށް ހިތްހަމަޖެހުން ލިއްބައިދޭ ކަމެއް. އެކަން މިއަދު ފެނިގެން ދިޔައީ. އެތައް ބައިވަރު ތުއްތު ކުދިންނާއި، ލޯބި ލޯބި ކުދިންނާއި، އަޅުގަނޑުމެންގެ އެކުވެރި ފެމިލީ ތައް, މިތަނަށް އެއްތަންވެ، ވަރަށް މަޖާކޮށް މީގެ ތެރޭގައި އުޅެވޭތަން މި ފެންނަނީ. އަޅުގަނޑުމެންގެ ތެރެއިން ގޭތެރޭގައި، މަސައްކަތުގެ މައިދާނުގައި ތިބި މީހުން، އެއްތަން ވެލަން ރައްޔިތުން ބޭނުންވެފައޭ ތިބީ."
ނާއިބު ރައީސް ހުސައިން މުހައްމަދު ލަތީފް
ނާއިބު ރައީސް ވިދާޅުވީ، އިޖުތިމާޢީ ގޮތުން ހިންގޭ އެފަދަ ހަރަކާތްތަކަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ ސަރުކާރުން ވަރަށް ބޮޑަށް އެއްބާރުލުން ދެއްވާނެ ކަމަށެވެ.
އަދި އެ ދުވުމުގައި ބައިވެރިވެވަޑައިގެންނެވުމުން ވަރަށް ބޮޑު ހިތްހަމަ ޖެހުމެއް ލިބިވަޑައިގެންނެވިކަންވެސް އެމަނިކުފާނު ފާހަގަކުރެއްވިއެވެ.
މީގެ ތެރޭގައި މިހުރީ، ކުޑަކުދިން މަޖާ ކުރުމާއި، ކުލަ ޖެހުމާއި، އެކި ކަހަލަ ކުޅިވަރުތަކުގައި ބައިވެރިވުމުގެ ފުރުސަތު ހުޅުވިފައި މިއޮތީ.. 6000 އަށްވުރެ ގިނަ ބޭފުޅުން، ތުއްތު ކުދިން އެކި އުމުރުފުރާގެ ބޭފުޅުން މީގައި ބައިވެރިވާ ކަމީ މިކަން ކަމަށް ލިބޭ ތަރުހީބޭ އަޅުގަނޑު ދަންނަވާނީ.
ނާއިބު ރައީސް ހުސައިން މުހައްމަދު ލަތީފް
މިއާއެކު ނާއިބު ރައީސް ވިދާޅުވީ، އުރީދޫ ފަން ރަން އިތުރަށް ފުޅާވެގެން ދިޔުމަކީ އެމަނިކުފާނުގެ އުއްމީދެއް ކަމަށާށ އެކަމަށްޓަކައި ސަރުކާރުން ދޭންޖެހޭ އެއްބާރުލުން ދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
