ސ. ގަމުގެ ދެކުނު ފަރާތަށް އިހި ނަގަން ގޮސް އުޅެނިކޮށް މިދިޔަ ބުރާސްފަތި ދުވަހު ގެއްލުނު ސ މަރަދޫ، ކުރެދުމާގެ މުހައްމަދު ނައީޝް (18އ) ހޯދުމަށް ބޮޑު ސަރަހައްދެއް ކަނޑުގެ މަގުންނާއި ވައިގެ މަގުން ބަލާފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

ނައީޝް ގެއްލުނު ކަމުގެ ރިޕޯޓު ކޮށްފައިވަނީ ބުރާސްފަތި ދުވަހުގެ ރޭ 22:45 ހާއިރުއެވެ. 

ނައީޝް ހޯދުމުގެ މަސައްކަތުގެ އެންމެ ފަހުގެ އަދާހަމަ ހިއްސާކުރަމުން އެމްއެންޑީއެފް އިން ބުނީ، ނައީޝް ހޯދުމަށް އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑް ފޯރތު ސްކޮޑްރަންއިން ކުރިއަށްގެންދާ އޮޕަރޭޝަންގައި ވައިގެމަގުން 23.46 ސްކޮޔަރ ނޯޓިކަލް މޭލު، ކަނޑުމަގުން 490 ސްކޮޔަރ ނޯޓިކަލް މޭލު އަދި ޑައިވްކޮށްގެން 1 ސްކޮޔަރ ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ.

އެގޮތުން މި އޮޕަރޭޝަނުގައި ގަމުގެ ފުއްޓަރު ފަރާތް ބަލާ ހޯދުމަށް ހުކުރު ދުވަހު ހެނދުނު 10:25 އިން ފެށިގެން ދިވެހި ސިފައިންގެ ޑައިވަރުންގެ ޓީމެއް ވެސް ހަރަކާތްތެރިވަމުން އަންނަ ކަމުގައި އެމްއެންޑީއެފުން ބުނެއެވެ. 

އިހި ނަގަން އުޅުމުގެ ތެރޭގައި ނައީޝް ގެއްލުނު ސަރަހައްދަކީ މީގެ ކުރިން ވެސް މަރަދޫ އަދި ފޭދޫން ވެސް އެތައް ބަޔަކު މަސް ހިފާށާއި އެހެން ކަންކަމަށް ގޮސް އުޅުމުގެ ތެރޭގައި އެތަނުގެ އޮއެވަރުގެ ސަބަބުން މީހުން ގެއްލިފައިވާ ތަނެއް ކަމަށް މައުލޫމާތު ލިބެއެވެ. އޭނާ ހޯދުމުގެ މަސައްކަތް އެ ރަށު އާއްމުން ވެސް ދަނީ ކުރަމުންނެވެ.