ޚިދުމަތް ނުލިބި އަހަރަކަށް ވުރެ ގިނަ ދުވަސްވެފައިވާ ގއ.ދެއްވަދޫ އައިސްޕްލާންޓު މަރާމާތުކޮށް އޮޕަރޭޝަނަށް ގެނައުމުގެ މަސައްކަތް އަންނަ ހަފްތާތެރޭގައި ފެށުމަށް ނިންމައިފިއެވެ.

މިކަމާއި ގުޅިގެން ފިޝަރީޒް މިނިސްޓްރީން އެކްސްގައި ކުރި ޕޯސްޓެއްގައި ބުނީ ދެއްވަދޫ އައިސްޕްލާންޓު މަރާމާތުކޮށް މަސްވެރިންނަށް އައިސް ލިބޭނެ ގޮތް ހައްދަވައިދެއްވުމަށް ވަޒީރު އަޙްމަދު ޝިޔާމް ކޫއްޑޫގެ އިސްބޭފުޅުންނާއި މަޝްވަރާކުރައްވާފައިވާ ކަމަށެވެ.

އެގޮތުން ފެށޭ ހަފްތާތެރޭގައި މިފްކޯގެ ކޫއްޑޫ ފިޝަރީސް ކޮމްޕްލެކްސްގެ ޓެކްނީޝަނުންގެ ޓީމަކުން ގއ. ދެއްވަދޫ އައިސްޕްލާންޓު މަރާމަތުކޮށް، އައިސްޕްލާންޓު އޮޕަރޭޝަނަށް ގެނައުމުގެ މަސައްކަތް ފަށާގޮތަށް ހަމަޖެހިފައިވާކަމަށް އެ މިނިސްޓްރީން މައުލޫމާތުދެއެވެ.

Advertisement

ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިނިސްޓަރު ޝިޔާމް ވަނީ ދެއްވަދޫގެ މަސްވެރިންނާއި ކައުންސިލް މެންބަރުންނާ ވެސް ބައްދަލުކުރައްވައި އެފަރާތްތަކުގެ ކަންބޮޑުވުންތަކުގެ އަޑު އައްސަވާފައެވެ.