އިންނަމާދޫގައި މިހާރު ކުރިއަށްދާ ރ.އަތޮޅު ފުޓްސަލް ޗެލެންޖް 2023 ގައި މިރޭ ކުޅެވުނު ދެވަނަ މެޗުގައި ގްރޫޕް ބީގެ އުނގޫފާރާއި ދުވާފަރު ވާދަކުރި މެޗު ފަސޭހަކަމާއި އެކު 8-1 ގެ ތަފާތުބޮޑު ނަތީޖާއަކުން ދުވާފަރުން ކާމިޔާބުކޮށްފިއެވެ.

ދެޓީމުގެ ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅެވުނު މިމެޗުގެ ވަރަށް ކުރީކޮޅު ދުވާފަރުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ މުހައްމަދު އިސާމް އެވެ. އަދި އެޓީމުގެ ދެވަނަ ލަނޑު ފުރަތަމަ ހާފުގެ 12 ވަނަ މިނެޓުގައި ކާމިޔާބުކޮށްދިނީ މޫސާ މުޒާހް އެވެ.

މިއީ އުނގޫފާރުގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ދުވާފަރު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ދުވާފަރު ޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު މި ހާފުގައި އެޓީމުން ވަނީ އިތުރު 6 ލަނޑު ކާމިޔާބުކޮށްފައެވެ. އެގޮތުން މިހާފުގައި އެޓީމުގެ މުހައްމަދު އަލީ އަދި ހަސަން މާއިދު މިއީ ކޮންމެ ކުޅުންތެރިއެއް ދެލަނޑު ކާމިޔާބުކުރިއިރު، އެޓީމުގެ އަނެއް ދެލަނޑު ކާމިޔާބުކޮށްދިނީ އިސްމާއިލް އަހުމަދު އަދި މުހައްމަދު އިސާމް އެވެ.

މިމެޗުގައި އުނގޫފާރު ޓީމުން ކާމިޔާބުކުރި ހަމައެކަނި ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ އާތިފް އިގްބާލް އެވެ. މިއާއެކު މެޗުގެ ކުޅުން ނިމިގެންދިޔައީ 8-1 ގެ ނަތީޖާއަކުން ދުވާފަރު ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ދުވާފަރު ޓީމުގެ މުހައްމަދު އިސާމް އެވެ.

މިމެޗުން ލިބުނު ތިން ޕޮއިންޓާއެކު ގުރޫޕް ބީގެ އެއްވަނައިގައި މިވަގުތު އޮތީ ދުވާފަރު ސްޕޯޓްސް ކުލަބެވެ. މިގުރޫޕްގައި ދުވާފަރު އަދި އުނގޫފާރުގެ އިތުރުން ދެން ހިމެނެނީ ރަސްމާދޫ ސްޕޯޓްސް ކުލަބެވެ.

ޗެންޕިއަން ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ، މިއަހަރުގެ މުބާރާތުގައި ޖުމްލަ 7 ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ސެމީ ފައިނަލަށް ހޮވޭގޮތަށެވެ. 
މި މުބާރާތުގައި މާދަމާ ވެސް ތިން މެޗު ކުޅުމަށް ހަމަޖެހިފައިވާއިރު، ހަވީރު 16:30 ގައި ފަށާ މެޗުގައި ގުރޫޕް އޭގެ އިންނަމާދޫ އިން ނުކުންނާނީ އިނގުރައިދޫ އާއި ދެކޮޅަށެވެ. އަދި މާދަމާ ރޭ 20:00 ގައި ފަށާ މެޗުގައި ބައްދަލުކުރާނީ ގުރޫޕް އޭގެ އަލިފުށީ ރެކްރިއޭޝަން ކުލަބާއި ޓީމު މަޑުއްވަރީ އެވެ. އަދި 21:00 ގައި ކުޅޭ ގްރޫޕް ބީގެ މެޗުގައި ރަސްމާދޫ ސްޕޯޓްސް ކުލަބު ނުކުންނާނީ އުނގޫފާރު ފުޓްސަލް ޓީމާއި ދެކޮޅަށެވެ.