މިދިޔަ ނޮވެމްބަރު މަހު ކުޑަކުދިންނަށް ކުރާ އަނިޔާގެ 221 މައްސަލައެއް ހުށަހެޅިފައިވާ ކަމަށް ޗައިލްޑް އެންޑް ފެމިލީ ޕްރޮޓެކްޝަން ސާވިސަސް އިން ބުނެފިއެެވެ.

ސީއެފްޕީސީ އިން އާންމުކޮށްފައިވާ މިދިޔަ މަހުގެ ތަފާސްހިސާބުތައް ދައްކާގޮތުން މިދިޔަ މަހު ކުޑަކުދިންނަށް ކުރާ އަނިޔާ އާއި ގުޅޭ 221 މައްސަލައެއް ވަނީ ހުށަހެޅިފައެވެ.

އޭގެ ތެރޭގައި ޖިންސީ ގޯނާގެ 29 މައްސަލައަކާއި ޖިސްމާނީ އަނިޔާގެ 20 މައްސަލައެއް ވެސް ހިމެނެއެވެ. ނަފްސާނީ އަނިޔާގެ 15 މައްސަލައެއްގެ އިތުރުން އަޅައިނުލުމުގެ 22 މައްސަލައެއް ވަނީ ހުށަހެޅިފައެވެ.

Advertisement

ހަމަ މިއާއެކު ބްލެކްމެއިލިންގެ 3 މައްސަލައަކާއި ސައިބަރ ބުލީންގެ މައްސަލައެއް ވެސް ވަނީ ހުށަހެޅިފައެވެ.

މިނޫން ވެސް ކުޑަކުދިންނާއި ގުޅޭ އިތުރު މައްސަލަތައް ވަނީ ހުށަހެޅިފައެވެ. މީގެ ތެރެއިން ގިނަ މައްސަލަތަކުގެ ޝިކާރައަކަށް ވެފައިވަނީ އަންހެން ކުދިންނެވެ. އެއީ ޖުމުލަ 123 އަންހެން ކުއްޖެކެވެ.

ސީއެފްޕީސީ އަށް އެންމެ ގިނަ މައްސަލަތައް ހުށަހެޅިފައިވަނީ މާލެ ސިޓީ އިންނެވެ. މިދިޔަ މަހު އެއްވެސް މައްސަަލައެއް ހުށަހަޅާފައިނުވަނީ ވ. އަތޮޅާއި ދ. އަތޮޅާއި ފ. އަތޮޅުންނެވެ.

ސީއެފްޕީސީ އިން ބުނީ ނޮވެމްބަރު މަހާއި ހަމައަށް ދައުލަތުގެ ބެލުމުގެ ދަށުގައި ޖުމްލަ 164 ކުއްޖަކު އެބަތިބި ކަމަށެވެ.