މިހާރު މިފެންނަ ސަރުކާރުގެ މަޝްރޫއުތައް ކާމިޔާބު ކުރުމުގައި ކޮންމެވެސް ގޮތަކުން ބޭރު ކުންފުނިތަކުން ޑޮމިނޭޓް ކުރާ ކުރުން ނިމުމަކަށް ގެނައުމަށް ބުރަ މަސައްކަތްތަކެއް ކުރަން ޖެހޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މަސީގެ ބިލްޑާޒް އެވޯޑު ދިނުމަށް މިރޭ މާގިރި ހޮޓަލުގައި ބޭއްވި ކޮންސްޓްރަކްޝަން އިންޑަސްޓްރީގެ އެވޯޑް ހަފްލާގައި ވާހަކަފުޅު ދައްކަވަމުންނެވެ.
މިގޮތުން އެމަނިކުފާނު ވިދާޅުވީ ދިވެހިންގެ ގައުމިއްޔަތު ކުރިއަރުވައި ދިރުވޭނީ ފަންނުވެރިކަމާއި ސިނާއަތްތައް ވެސް ދިވެހިންގެ އަތް މައްޗަށް ފުރޮޅާލައި ދިވެހިން އެކަމުގައި ބަސްކިޔާ ގޮތަށް ކަންކަން ބަދަލުވެގެން ދިޔުމުން ކަމަށެވެ.
"އަޅުގަނޑުމެން ދިވެހި ރާއްޖޭގެ މިނިވަންކަން ދިފާއުކޮށް ހިމާޔަތްކުރާ ވާހަކަ ދައްކާއިރުގައި އެއީ ހުރިހާ މާނައެއްގައި މިނިވަންކަން ދިފާއު ކުރުމުގެ ވާހަކަ. އަޅުގަނޑުމެންގެ ގައުމިއްޔަތު ކުރިއަރުވައި ދިރުވާ ވާހަކަ ދެއްކުމަކީ ފަންނުވެރިކަމާއި ސިނާއަތްތައް ވެސް އޭގައި ދިވެހިންގެ އަތް މައްޗަށް ފުރޮޅާލައި ދިވެހިން އެކަމުގައި ބަސްކިޔާ ގޮތަށް ކަންކަން ބަދަލު ވެގެން ދިޔުމުން ނޫނިއްޔާ ހާސިލް ނުވާނެ ކަމެއް"
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ ބޭރު ކުންފުނިތަކުން މަސައްކަތް ކުރެވިދާނެކަމަށާއި ހާއްސަކޮށް އެކި ކަހަލަ ސްޕެޝަލައިޒް މަސައްކަތްތަކުގައި ބޭރު ކުންފުނިތައް އުޅޭނެ ކަމަށާއި އުޅެން ވެސް ޖެހޭ ކަމަށެވެ. އެހެންނަމަވެސް ދިވެހި ކޮންސްޓްރަކްޝަން އިންޑަސްޓްރީގައި މަސައްކަތްކުރާ ފަރާތްތަކަކީ އެކަމުގައި ލީޑް ރޯލް އަދާކުރާ ފަރާތްތަކަށް އަނެއްކާވެސް ބަދަލުވާން ޖެހޭކަން އެމަނިކުފާނު ފާހަގަކުރެއްވިއެވެ.
މިކަން ކުރުމަށް ޓަކައި ގަވާއިދުތަކާއި ގާނޫނަށް ގެންނަން ޖެހޭ ބަދަލެއް ގެންނަން ޖެހޭނަމަ އެކަން ކުރައްވާނެ ކަމަށާއި އެވޯޑް ކުރުމުގައާއި ޕޮއިންޓް ދިނުމުގައި ގެންނަން ޖެހޭ ބަދަލެއް ވިއްޔާ އެކަން ވެސް ކުރައްވާނެ ކަމަށް ރައީސް ޑރ.މުއިއްޒު ވިދާޅުވިއެވެ. އަދި ކޮންސްޓްރަކްޝަން އިންޑަސްޓްރީގެ މަސައްކަތްތަކަށް މި ފަހިކަން ގެނެސްދެއްވާނެ ކަމުގެ ޔަގީންކަން ރައީސް ދެއްވިއެވެ.
Advertisement
This content is created and paid for by advertisers and does not involve Voice Journalists
