ހަމައެކަނި ދިވެހިން މަސައްކަތް ކުރާނެ ދާއިރާތަކެއް ކަނޑައެޅުމަށް މިއަދު ވަޒީރުންގެ މަޖިލީހުން ނިންމަވާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިރޭ މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީޒް (މަސީ) އިން ބޭއްވި ކޮންސްޓްރަކްޝަން އެވޯޑު ހަފްލާގައި ވާހަކަފުޅުދައްކަވަމުން ރައީސް ވިދާޅުވީ ދެ އަހަރާއި ފަސް އަހަރުގެ ތެރޭގައި ދިވެހިންނަށް ޚާއްސަ ދާއިރާތަކުގައި ވަރަށް ގިނަ ދާއިރާތައް މިއަދު ކަނޑައަޅުއްވާފައިވާކަމަށެވެ.
"މިއަދު ކެބިނެޓްގައި މަޝްވަރާކޮށް ނިންމި މުހިންމު ނިންމުންތަކުގެ ތެރެއިން އެއްކަމަކީ ދިވެހިންނަށް ޚާއްސަ ދާއިރާތަކެއް ކަނޑައެޅުން. ކުރިއަށް އޮތް އަހަރުތަކަށް ބަހާލެވިގެން އެގޮތަށް ގޮސް އެހެން ކަނޑައެޅޭ ދާއިރާތަކެއް ކަނޑައަޅަން. ދެ އަހަރުން ގޮސް ފަސް އަހަރާއި ހަމައަށް."
ރައީސް ޑރ.މުއިއްޒު ވިދާޅުވިއެވެ.
އެމަނިކުފާނު ވިދާޅުވީ މި ދާއިރާތަކަކީ ކަމާބެހޭ ސްޓޭކް ހޯލްޑަރުންނާއި އެކީގައިވެސް މަސައްކަތް ކުރެވި އަދި ތަމްރީނުގެ ފުރުސަތުތައް ދީ އަދި މަސައްކަތް ލިބޭނެ ގޮތަށް ކަންކަން ބައްޓަން ކުރެވިގެންދާނެ ދާއިރާތަކެއް ކަމަށެވެ.
މިގޮތުން އެމަނިކުފާނު ވަނީ ކޮންސްޓްރަކްޝަން ސިނާއަތުގައި ހަމައެކަނި ދިވެހިން މަސައްކަތް ކުރާނެ ކަމަށް ކަނޑައެޅި ތިން ދާއިރާ އިއުލާން ކުރައްވާފައެވެ. މި ތިން ދާއިރާ އަކީ ބިލްޑިން އިންޕެކްޓަރުންގެ ދާއިރާ އާއި ސައިޓް ސުޕަވައިޒަރުންގެ ދާއިރާ އާއި ސާވޭއަރުންގެ ދާއިރާއެވެ.
ރައީސް ޑރ.މުއިއްޒު ވިދާޅުވީ މި ސަރުކާރުގެ 20 އަހަރުގެ މާސްޓާރ ޕްލޭންގެ ތެރޭގައި ވިސްނުމަކީ މުޅި އިންޑަސްޓްރީއަކީ ވެސް ހަމައެކަނި ދިވެހިން މަސައްކަތް ކުރާ އިންޑަސްޓްރީއަކަށް ބަދަލުވެގެން ދިއުން ކަމަށެވެ. އެހެންނަމަވެސް ފުރަތަމަ މި ތިން ދާއިރާއަކީ ދިވެހިން އެކަނި މަސައްކަތް ކުރާ ދާއިރާތަކަކަށް ހެދުމަކީ ކުރެވޭނެ ކަމެއް ކަމަށް ވިދާޅުވެ ކުރިއަށް އޮތްތާގައި ސިވިލް އިންޖިނިއަރުންނާއި އާކިޓެކްޓުންނާއި ދެން ތިބި ބަޔަކުވެސް ދިވެހިންނަށް ޚާއްސަ، ދިވެހިން އެކަނި މަސައްކަތް ކުރާ ދާއިރާތަަކަށް ވާނެކަމަށް ވެސް އެމަނިކުފާނު ވިދާޅުވިއެވެ.
މި ކަންކަމުގެ ބޭނުމަކީ ދިވެހިވަންތަކަން ހުރިހާ ކަމެއްގެ ތެރެއަށް ގެނައުމުގެ އިތުރުން ދިވެހިންގެ އަތް މައްޗަށް ހުރިހާ ކަމެއް ގެނައުން ކަމަށް ވެސް އެމަނިކުފާނު ވިދާޅުވިއެވެ.
މިއީ އެމަނިކުފާނު ތަންފީޒު ކުރާނެ އެންމެ މުހިންމު އެއް ސިޔާސަތު "ވަޒީފާ އެންމެންނަށް" މި ސިޔާސަތުގެ ދަށުން ކުރިއަށްދާ ކަމެއް ކަމަށާއި އެ ސިޔާސަތުގެ ތެރެއިން ދެވަނަ އަށް އެންމެ ބޮޑު ސިނާއަތް ކަމުގައިވާ ކޮންސްޓްރަކްޝަން ސިނާއަތުގައި މަސައްކަތް ކުރާ މީހުންނަކީ ދިވެހިންނަށް ޚާއްސަ ފީލްޑްތަކެއް ދެވިގެން މަސައްކަތް ކުރާ މީހުންނަށް ވެއްޖެނަމަ ވަޒީފާގެ ފުރުސަތު އިތުރުވެގެންދާ ކަމަށް ރައީސް ޑރ.މުއިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
