ބޭނުންވަނީ ކޮންސްޓްރަކްޝަން އިންޑަސްޓްރީ އަންހެނުން ވަރަށްމަތީ އިންސައްތައެއްގައި މަސައްކަތް ކުރައްވާ އިންޑަސްޓްރީއަކަށް ބަދަލުކުރައްވަން ކަމަށް ރާއްޖޭގެ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ރޭ ކޮންސްޓްރަކްޝަން އިންޑަސްޓްރީ އެވޯޑް ދެއްވުމުގެ ޙަފްލާގައި އެމަނިުކުފަނު ދެއްކެވި ވާހަކަފުޅުގައެެވެ.
ރައީސް ވިދާޅުވީއެމަނިކުފާނު ބޭނުންފުޅުވަނީ މި އިންޑަސްޓްރީ މިއަށްވުރެ މާ މަތީ ހަރުފަތަކަށް ގެންދަން ކަމަށާއި ވަރަށް އިންކްލޫސިވް އިންޑަސްޓްރީއަކަށްވާން ކަމަށެވެ.
“އަންހެން ބޭފުޅުން ވަރަށްމަތީ އިންސައްތައެއްގައި މަސައްކަތް ކުރައްވާ އިންޑަސްޓްރީއަކަށް، ޞިނާޢަތަކަށް، ރާއްޖޭގެ ކޮންސްޓްރަކްޝަން އިންޑަސްޓްރީ ބަދަލުކުރަން އަޅުގަނޑުމެން މަސައްކަތް ކުރަން އެބަޖެހޭ”
ރައީސް ޑރ މުޙައްމަދު މުއިއްޒު
ރާއްޖޭގައި ކިޔަވައިގެން ތިބި މީހުންނަށް ބަލާއިރުގައި ގިނައީ ފިރިހެން ބޭފުޅުންނަށްވުރެ އަންހެން ބޭފުޅުން ކަމަށާއި، އެކިއެކި ފަންނުތަކުގަޔާއި މަސައްކަތްތެރިންގެ ތެރޭގައިވެސް ކަން އޮތީ ހަމައެގޮތައް ކަމަށް އެމަނިކުފާނު ވިދާޅުވިއެވެ.
“އަޅުގަނޑުމެން ކީއްވެތޯ، ކޮންސްޓްރަކްޝަން އިންޑަސްޓްރީގައި އެކިއެކި ފަންނުތަކުގައި، އެކިއެކި ގިންތިތަކުގައި މަސައްކަތް ކުރުމުގައި އެކަމުގެ މަގުފަހިކަން އަންހެން ބޭފުޅުންނަށް ހޯދައިނުދޭންވީ. ހޯދައިދޭން އެބަޖެހޭ.”
ރައީސް ޑރ މުޙައްމަދު މުޢިއްޒު
އެހެންވީމާ، ސިޔާސަތަކަށްވާނީ މަސީއާ ގުޅިގެން އަދިވެސް މި ދާއިރާގެ ހުރިހާ ފަރާތްތަކާ ގުޅިގެން، ކުރިއަށް އޮތް އަހަރުތަކަކީ، ދިވެހި ކަނބަލުންނަށް މި ދާއިރާގައި މިހާރަށްވުރެ އެތައް ގުނައެއް ބޮޑަށް، ބައިވެރިވުމުގެ ފުރުޞަތު ހޯދައިދިނުމަށްޓަކައި ސިޔާސަތުތައް ބައްޓަންކޮށް، އެކަމަށް މަސައްކަތްކުރުން ކަމަށް ރައީސް މުޢިއްޒު ރޭގެ ޖަލްސާގައި ވިދާޅުވިއެވެ.
ރައީސް ވިދާޅުވީ އަންހެނުންގެ އެހީތެރިކަމާ އެކުގަައި އެކަން ހާސިލުކުރެވޭނެ ކަމަށެވެ.
“އަޅުގަނޑު އެދެނީ އެކަމުގައި ފުރިހަމަ އެއްބާރުލުން ދެއްވުމަށް. އަދި އެކަމުގެ ޔަޤީންކަން އަޅުގަނޑަށް އެބައޮތް. އަދި ހަމަ އެއާއެކީގައި، ނުކުޅެދުންތެރިކަން ހުންނަ އެކިއެކި ފަރާތްތައް އެބަތިބި. އެ ބޭފުޅުންގެ ތެރޭގައިވެސް މި އިންޑަސްޓްރީގައި މަސައްކަތް ކުރަން ބޭނުންވާ އެތައް ބަޔަކު ތިބޭނެ. އަޅުގަނޑުމެން އެބަޖެހޭ ރީޗްއައުޓްވާން. އެފަރާތްތަކާ ހަމަޔަށް ވާސިލްވާން. އެސްޕިރޭޝަންސް ހުރި ޒުވާން ކުދިން، އެކިކަހަލަ ޑިސްއެބިލިޓީޒް ހުރި ކުދިން އެބަތިބި. މި ދާއިރާގައި މަސައްކަތް ކުރަން ބޭނުންވާ ކުދިން އެބަތިބި”
ރައީސް ޑރ މުޙައްމަދު މުޢިއްޒު
“އިންކްލޫސިވް” އިންޑަސްޓްރީއަކަށް ހެދުމުގައި އަންހެން ބޭފުޅުންނާއި، އެކިއެކި ޑިސްއެބިލިޓީޒްތައް ހުންނަ ފަރާތްތަކަށް ދެވެންހުރި އެންމެ ފަހި ފުރުޞަތުތައް ދޭނެ ބަޔަކަށް ވާން އެބަޖެހޭ ކަމަށް ރައީސް ވިދާޅުވިއެވެ.
އަދި އެކަމުގައި ސަރުކާރާ އެކީގައި ވަރަށް އިސް ދައުރެއް "މަސީ"އިން އަދާކުރުމަކީ، އަދި މުޅި އިންޑަސްޓްރީގެ ހުރިހާ ފަރާތްތަކުން އަދާކުރުމަކީ، އެމަނިކުފާނުގެ އެދިލެއްވުމެއް ކަމަށްވެސް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
