ރާއްޖެއަށް ދިގު މުއްދަތަކަށް އެތެރެވާ ބިދޭސީން، މެޑިކަލް ޗެކަޕް ހަދަން ޖެހޭގޮތަށް ސަރުކާރުން އުސޫލުތައް ވަރުގަދަ ކޮށްފިއެވެ.

އިއްޔެ ބޭއްވި ވަޒީރުންގެ މަޖިލީހުގައި ނިންމެވި މުހިއްމު ނިންމެވުންތަކުގެ މައުލޫމާތު ހިއްސާކުރުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޡިމް އިބްރާހީމް ވިދާޅުވީ، މީގެ ފަހުން ހެލްތު މިނިސްޓްރީން ކަނޑައަޅާ ތަނަކުން ރާއްޖެއަށް ދިގު މުއްދަތަކަށް އެތެރެވާ ބިދޭސީން މެޑިކަލް ޗެކަޕް ހަދަން ޖެހޭނެ ކަމަށެވެ.

މީގެ އިތުރުންވެސް އޭނާ ވިދާޅުވީ ޑިޕެންޓެންޓް ވިސާގައިއާއި ވޯކް ވިސާގައިއާއި ރެޒިޓެންޑް ވިސާގައިއާއި ސްޓޫޑެންޓް ވިސާގައި އާއި ކޯޕަރޭޓް ވިސާގެ އިތުރުން މެރިޖް ވިސާގައި އަންނަ ހުރިހާ ބިދޭސީންވެސް ރާއްޖެ އަންނަ އިރު އޮން އެރައިވަލް އަދި އަހަރަކު އެއް ފަހަރު މެޑިކަލް ޗެކަޕް ހެދުން ލާޒިމް ކުރުމަށް އިއްޔެގެ ވަޒީރުންގެ މަޖިލީހުގައި ނިންމަވާފައިވާކަމަށެވެ.

Advertisement

ސަރުކާރުން މި އުސޫލުތައް ވަރުގަދަކޮށްފައި މިވަނީ ރާއްޖޭގައި ފައިލޭރިޔާ ފެތުރެމުންދާ ދުވަސްވަރެއްގައެވެ. މިހާތަނަށް މި ބައްޔަށް ފައްސި ވެފައި ވަނީ ރާއްޖެއަށް މަސައްކަތްކުރުމަށް އައިސްފައިވާ ބިދޭސީންނެވެ. މިގޮތުން މާލެ، ހުޅުމާލެ އަދި ގުޅިފަޅު ހިމެނޭހެން 7 ބިދޭސީއަކު ވަނީ މި ބައްޔަށް ފައްސި ވެފައެވެ. އަދި މިހާތަނަށް ކުޅުދުއްފުށިން ފައިލޭރިއާ އަށް 25 ބިދޭސީ އަކު ވަނީ ފައްސި ވެފައެވެ.

މި ފަރާތްތަކަށް ދޭން ޖެހޭ އިތުރު ފަރުވާތައް ދެމުން އަންނަ ކަމަށާއި ބަލި ހުރިތޯ އިތުރު ފަރާތްތައް ޓެސްޓް ކުރަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެއެވެ. އަދި މިއީ މަދިރިން ފެތުރޭ ބައްޔަކަށް ވާތީ މަދިރި ނައްތާލުމަށް ތަފާތު ޕްރޮގްރާމްތަކެއް ކުރިއަށް ގެންދިއުމަށް ހަމަޖެހިފައިވާކަމަށް ވެސް އެޗްޕީއޭއިން ވަނީ ބުނެފައެވެ.