ހުޅުމާލޭގައި ހަދަމުންދާ ކޭޕާކް ރެޒިޑެންސްގެ އެޕާޓްމަންޓުތައް މަކަރާއި ހީލަތުން ވިއްކިކަމުގެ ތުހުމަތު ކޮށްފައިވާ ހަސަން މަމްދޫހު (މަންޑޭ) ގެ އަގުބޮޑު މުދާތައް ހިފެހެއްޓި މައްސަލަ އިސްތިއުނާފު ކުރުމަށް އޭނާ ހުށަހެޅުމުން އެ މައްސަލަ ބޭރުކޮށްލަން ރަޖިސްޓްރާ ނިންމި ނިންމުން ބާތިލްކޮށް، ހައިކޯޓުން އެ މައްސަލަ ބަލައިގަތުމަށް ނިންމައިފިއެވެ.

މީގެ ކުރިން ހައި ކޯޓުގެ ރަޖިސްޓްރާ ވަނީ އެމައްސަލަ ބަލައިގަނެވެން ނެތް ކަމަށް ބުނެ މައްސަލަ ބޭރުކޮށްލާފައެވެ.

މި މައްސަލަ އަލުން ބަލައިގަތުމަށް ނިންމާފައިވަނީ މައްސަލަ ބެލި ތިންފަނޑީޔާރުންގެ ތެރެއިން ހަތަރު ފަނޑިޔާރުންގެ ރައުޔުންނެވެ.

Advertisement

މި މައްސަލަ ބެއްލެވީ ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ސަލީމް ގެ އިތުރުން ފަނޑިޔާރު މުޙައްމަދު ޝަނީޒް އެވެ.

މީގެތެރެއިން ފަނޑިޔާރު ހަސަން ޝަފީއު ގެ ރައުޔުގައި ވަނީ ރަޖިސްޓްރާގެ ނިންމުން ބަދަލު ގެންނަން ޖެހޭ ފަދަ ސަބަބެއް ނެތީތީ ރަޖިސްޓްރާގެ ނިންމުން ބަދަލު ކުރުމަށް ނުފެންނަކަމަށެވެ. އެހެންނަމަވެސް މި އާއި ޚިލާފަށް ފަނޑިޔާރު މުހައްމަދު ސަލީމް ގެ ރައުޔުގައި ވަނީ އިސްތިއުނާފު ބަލައިގަތުމަށް ގާނޫނީ ބަހުސެއް އޮތް ކަމަށް ބެލެވޭތީ ރަޖިސްޓްރާގެ ނިންމުމަށް ބަދަލު ގެންނަން ޖެހޭ ކަމަށެވެ. އަދި މި ނިންމުމަށް  ފަނޑިޔާރު މުޙައްމަދު ޝަނީޒް ވަނީ ތާއީދު ކުރައްވާފައެވެ.

މީގެ ކުރިން އެ މައްސަލަ ބަލައި ނުގަތުމަށް ހައި ކޯޓުގެ ރަޖިސްޓްރާ ނިންމެވި ނިންމުމުގައި ވަނީ މަމްދޫހުގެ ފަރާތުން އެއްވެސް ގާނޫނަކާއި ނުވަތަ ގާނޫނީ އުސޫލަކާ ހަވާލާ ދީފައިނުވާތީ އާއި އިސްތިއުނާފް ކުރެވޭ މައްސަލަ އަކީ މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 51 ވަނަ މާއްދާގެ ދަށުން ނެރެފައިވާ އަމުރަކަށް ވާއިރު އެ މާއްދާގެ ދަށުން ނެރޭ އަމުރަކަށް ބުނެވުނު ސުޕްރިމް ކޯޓުގެ ގަޟިއްޔާ ޠަޠުބީގު ކުރެވޭ ގޮތެއް ސާފު ކޮށްދީފައި ނުވާތީ އެ މައްސަލަ ބަލައިގަނެވެން ނެތްކަމަށެވެ.

އޭރު ހައި ކޯޓުން މިފަދައިން ނިންމާފައިވަނިީ ދިވެހި ރާއްޖޭގެ ކޯޓުތަކުގެ ގާނޫނު ގައިވާ 43 ވަނަ މާއްދާ އާއި ހަވާލާ ދީއެވެ. މި މާއްދާ ގައި ދަށު ކޯޓުތަކާއި ޓްރައިބިއުނަލްތަކުގެ ނިންމުންތައް އިސްތިއުނާފުކުރެވޭނެ ދެ ހާލަތެއް އެ މާއްދާގައި ބަޔާންކޮށްފައިވެ އެެވެ.

މީގެ ތެރެއިން ފުރަތަމަ ހާލަތަކީ, އިސްތިއުނާފުކުރަން ހުށަހަޅާ ހުކުމް ނުވަތަ ނިންމުން ބިނާކުރެވިފައިވަނީ ގާނޫނާ ހިލާފަށް ކަމަށް ގަބޫލުކުރެވޭނެ ސަބަބުތަކެއް ހުރުން ނުވަތަ ގާނޫނު ތަތުބީގުކުރުމުގައި ނުވަތަ ގާނޫނު މާނަކުރުމުގައި ކުށެއް ހެދިފައިވާ ކަމަށް ގަބޫލުކުރެވޭނެ ކަންކަން ހުރުމެވެ. އަދި ދެވަނަ ހާލަތަކީ, ހުކުމުގެ ނުވަތަ ނިންމުމުގެ ކުރިއަށް އައި އިޖުރާއަތެއްގައި ހިމެނޭ ބާވަތްތަކުންކުރެ ބާވަތެއްގެ އައިބެއްގެ ސަބަބުން އެ ހުކުމަށް ނުވަތަ ނިންމުމަށް އަސަރު ފޯރުވި އިޖުރާއަތަކީ ބާޠިލު އިޖުރާއަތެއް ކަމުގައި ވުމެވެ.

ނޮވެންބަރު މަހުގެ 18 ވަނަ ދުވަހު މަންޑޭ ދިރިއުޅެމުންދިޔަ އެޕާޓްމެންޓް އަށް ފުލުހުން ވަދެ ފާސް ކުރީ ހުޅުމާލެ މެޖިސްޓްރޭޓް ކޯޓުން އަމުރެއް ހޯދައިގެންނެވެ. އެ އެޕާޓްމެންޓުން ފެނުނު އަގުބޮޑު މުދާތައް ފުލުހުންގެ ބެލުމުގެދަށަށް ގެންދިޔުމުގެ ސަބަބުން އެ މަހުގެ 24 ގައި މަންޑޭ ވަނީ އެމައްސަލަ ކޯޓަށް ހުށައަޅާފައެވެ.

އެ އެޕާޓްމަންޓުން ފެނުނު އެތައް މިލިއަން ރުފިޔާގެ އަގު ބޮޑު ތަކެތީގެ ފޮޓޯތަކަކާއި އެކު މަންޑޭގެ މި ދިރިއުޅުމުގެ ވާހަކަތަކެއް ޕްރޮސެކިއުޓާ ޖެނެރަލް (ޕީޖީ) އޮފީހުން މިދިޔަ މަހުގެ 30 ގައި ބޭއްވި ނޫސްވެރިންގެ ބައްދަލުވުމުގައި ވަނީ ހިއްސާ ކޮށްފައެވެ.

މިމަހުގެ 13 ވަނަ ދުވަހު މަންޑޭ ގެ މައްޗަށް 105 ދައުވާއެއް ކުރުމަށް ޕީޖީ ގެ އޮފީހުން ކްރިމިނަލް ކޯޓަށް ވަނީ ހުށައަޅާފައެވެ.