ކިންގްސް ކެޕިޓަލް ހޯލްޑިންގްސް ކުންފުނިން ޕޮންޒީ ސްކީމަށް އިންވެސްޓުކުރި ތިން މީހަކަށް ހަ ލައްކައަށްވުރެ ގިނަ ރުފިޔާ ދޭން ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ މައްޗަށް ސިވިލް ކޯޓުން އިއްޔެ ހުކުމްކޮށްފި އެވެ.

އިއްޔެ ސިވިލް ކޯޓުން އަލްހާންގެ މައްޗަށް ކުރި ހުކުމުގައި ވަނީ 25 ޑިސެންބަރުން ފެށިގެން 15 ދުވަހުގެ ތެރޭގައި ތިން މީހަކު ސްކީމަށް އިންވެސްޓު ކުރި ފައިސާ އާއި، އެ ފައިސާ ބޭނުންކޮށްގެން ލިބުނު ފައިދާ އަދި ކޯޓު ހަރަދު ގެ ޖުމުލަ 715،250 ރުފިޔާ ދައްކަންޖެހޭނެ ކަމަށެވެ.

މި ތިން މައްސަލަ ކުރިއަށް ގެންގޮސްފައިވަނީ ވަކި ވަކިންނެވެ. މި  މައްސަލަތަކަށް ސިވިލް ކޯޓުން ހުކުމް ކުރީ ކިންގްސް ކެޕިޓަލްގެ ޣައިރު ހާޒިރުގައެވެ.

Advertisement

ފުރަތަމަ މައްސަލައިގައި މައްސަލަ ހުށައެޅި ފަރާތް ކަމުގައިވާ ޝަހުދާ ނަސީރު، ހުސްނުހީނާގެ/ހއ. ހޯރަފުށި އަށް ޖުމްލަ 557،750 ރުފިޔާ ދެއްކުމަށް ކޯޓުން އަމުރު ކުރި އެވެ. އެއީ އޭނާ އިންވެސްޓު ކުރި ފައިސާ އާއި ފައިދާގެ ގޮތުގައި ދޭންޖެހޭ 485،500 އާއި ޝަރީއަތުގެ ހަރަދަށްވާ 72،750 ރުފިޔާ އެވެ.

ދެވަނަ މައްސަލިައގައި މައްސަލަ ހުށައެޅި ފަރާތް ކަމުގައިވާ މަރްޔަމް ޒާނާ މުހައްމަދު، ޖަންބުގެ/ޅ. ހިންނަވަރު އަށް އޭނާ ސްކީމަށް ހޭދަ ކުރި ފައިސާ ކަމުގައިވާ 50،000 ރުފިޔާ އާއި ކޯޓު ހަރަދުގެ ގޮތުގައި ހޭދަވި 7،500 ރުފިޔާ ދިނުމަށް ސިވިލް ކޯޓުން ހުކުމްކުރި އެވެ.

ތިންވަނަ މައްސަލައިގައި 25،000 ރުފިޔާ އާއި ފައިދާގެ ގޮތުގައި ލިބެން ޖެހޭ 75،000 ރުފިޔާ އާމިނަތު ރިޝްފާ، ރޯޒީ/ކ. ތުލުސްދޫ އަށް ދިނުމަށް ކިންގްސް ކެޕިޓަލްގެ މައްޗަށް ސިވިލް ކޯޓުން ވަނީ ހުކުމް ކޮށްފައެވެ.

މިދިޔަ ނޮވެމްބަރު މަހުގެ ތެރޭގައި ކިންގްސް ކެޕިޓަލްސް ހޯލްޑިންގްސް ކުންފުނިން ދިވެހިރާއްޖޭގެ ގާނޫނާ ހިލާފަށް ޕޮންޒީ ސްކީމެއް ހިންގި ކަމުގެ ތުހުމަތުގައި އަލްހާން ފަހުމީ އާއި އޭނާގެ ދެ ކޮއްކޮ ކަމުގައިވާ މީޑިއާ ކައުންސިލުގެ ކުރީގެ ރައީސް ސަހުބާން ފަހުމީ އަދި ޝަޒުބާން ފަހުމީގެ މައްޗަށް ދައުވާކުރަން ދައުލަތުން ވަނީ ކްރިމިނަލް ކޯޓަށް ހުށައަޅާފައެވެ.

މިކަމާ ގުޅޭގޮތުން ޕީޖީ އޮފީހުން ބުނީ މި މައްސަލާގައި އަލްހާންގެ އިތުރުން އޭނާގެ ކޮއްކޮ ޝަހުބާން ފަހުމީ އާއި ޝަޒްބާން ފަހުމީގެ މައްޗަށް ޓެކުމުގެ 13 ދައުވާއެއް ކުރަން ފޮނުވާފައިވާ ކަމަށެވެ. އަދި މި މައްސަލައާ ގުޅިގެން އެމީހުންގެ މައްޗަށް މިހާތަނަށް ޖުމްލަ 39 ދަޢުވާއެއް ކޮށްފައިވާނެ ކަމަށް ވެސް އެ އޮފީހުން ބުނެއެވެ.