މިއަހަރުގެ މިހާތަަނަށް އެއް ދުވަހެއްގެތެރޭ އެންމެ ގިނަ ފަތުރުވެރިން ރާއްޖެއަށް އައިސްފައިވަނީ މިދިޔަ ހޮނިހިރު ދުވަހު ކަމަށް ފަތުރުވެރިކަމާއި ބެހޭ ވުޒާރާއިން ހާމަކުރައްވައިފިއެވެ.

އެވުޒާރާއިން ނެރޭ ޑެއިލީ ރިޕޯޓްސް ގައި ވާގޮތުން 23 ޑިސެންބަރު ވީ ހޮނިހިރުދުވަހު ރާއްޖެއަށް ވަނީ 8،054 ފަތުރުވެރިން ޒިޔާރަތްކޮށްފައެވެ.

މީގެކުރިން މިއަހަރުތެރޭ އެއް ދުވަހެއްގެތެރޭ އެންމެ ގިނަ އަދަދަކަށް ފަތުރުވެރިން އައިކަމަށް ރެކޯޑު ކުރެވިފައިވަނީ ފެބްރުއަރީ މަހުގެ 11 ވަނަ ދުވަހުއެވެ. މިދުވަހު ރާއްޖެއަށް 8،024 ފަތުރުވެރިން ވަނީ ޒިޔާރަތްކޮށްފައެވެ.

Advertisement

މިއީ ފަތުރުވެރިންގެ ޕީކް ސީޒަނަށް ވާތީ ވަރަށް ގިނަ ފަތުރުވެރިން މި ދުވަސްކޮޅު ދަނީ ރާއްޖެއަށް ޒިޔާރަތް ކުރަމުންނެވެ.

ރާއްޖެއިން މި އަހަރު އަމާޒު ހިފި 1.8 މިލިއަން ފަތުރުވެރިން ގެނައުމުގެ ރިކޯޑް މިވަނީ މިދިޔަ ހަފްތާ ތެރޭ ހާސިލު ކޮށްފައެވެ. އަދި ރާއްޖެއަށް ޒިޔާރަތްކުރި 1.8 މިލިއަން ވަނަ ފަތުރުވެރިޔާއަށް ވަނީ ހޫނު މަރުހަބާއެއްވެސް ކިޔާފައެވެ.

އެންމެ ފަހުގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް ރާއްޖެއަށްވަނީ ޖުމްލަ 1،821،338 ފަތުރުވެރިން ޒިޔާރަތްކޮށްފައެވެ. މި އަދަދަކީ މިިދިޔަ 2022 ވަނަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ 1،620،215 ފަތުރުވެރިންނާއި އަޅާ ބަލާއިރު 12.4 އިންސައްތަ އިތުރު އަދަދެއް ކަން ފާހަގަ ކޮށްލެވެއެވެ.

މީގެ ކުރިން މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރި އަހަރަކީ 2019 ވަނަ އަހަރެވެ. އެއަހަރު 1,702,887 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

ރާއްޖެއަށް މިހާރު އެންމެ ގިން ފަތުރުވެރިން އަންނަ ކަމަށް ރެކޯޑް ކުރެވިފައިވަނީ ރަޝިޔާ އިންނެވެ. ދެވަނައަށް ރާއްޖެއަށް ފަތުރުވެރިން އެންމެ ގިނައިން އަންނަ ގައުމަކީ އިންޑިއާ އެވެ.

ރާއްޖެއަށް ޒިޔާރަތް ކުރާ ފަތުރުވެރިންނަށް ޚިދުމަތް ދިނުމަށްޓަކައި މިވަގުތު 1140 ތަނެއް ވަނީ ހުޅުވާފައި ކަމަށާއި  ބެޑް ކެޕޭސިޓީއަކީ 61273 ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.