ރާއްޖޭގެ އޮތޮރައިޒްޑް ޑިސްޓްރިބިޔުޓާކަން ދިވެހި ކުންފުންޏަކުން ހޯދާފައި ވަނިކޮށް އޮތޮރައިޒްޑް ނޫން ބަޔަކު ގެނައި މުދަލެއް އެތެރެކޮށް އެއިން ވިޔަފާރިކުރުން ހުއްޓުވަން ސިވިލް ކޯޓުން ވަގުތީ އަމުރެއް ނެރެފި އެވެ.

މިގޮތުން އެތެރެކޮށް އެއިން ވިޔަފާރިކުރުން ހުއްޓުވި މުދަލަކީ "ކެމަލް" ބްރޭންޑުގެ ސިނގިރޭޓެވެ.

މިއަހަރުގެ ޑިސެންބަރު މަހުގެ 21 ވަނަ ދުވަހު އެމުދާ އެތެރެކުރުން ހޯދާފައިވާ ރާއްޖޭގެ ކުންފުނި ކަމުގައިވާ ސީޖީޓީ ޕްރައިވެޓް ލިމިޓެޑުން ސިވިލް ކޯޓަށް ހުށަހެޅި މައްސަލާގައި ބުނީ "ކެމަލް" ބްރޭންޑުގެ ސިނގިރޭޓުގެ އޮތޮރައިޒްޑް ޑިސްޓްރިބިޔުޓާގެ ގޮތުގައި އެ ބާވަތް ފާއިތުވި 20 އަހަރު ރާއްޖެ އަށް އެތެރެކުރާ މުދަލެއް ކަަމަށެވެ. އެހެންނަމަވެސް އެގްޒޮޓިކް އެންޓަޕްރައިޒަސް ނަމަކަށް ކިޔާ ކުންފުންޏަކުން ދާދިފަހުން އެ ބްރޭންޑުގެ ކައުންޓަފިޓު (ފޭކް) މުދާތަކެއް ރާއްޖެ އަށް ގެނެސްފައިވާ ކަމަށެވެ.

އެގްޒޮޓިކް އެންޓަޕްރައިޒަސް އިން ވަނީ ސީޖީޓީން ގެންނަ މި މުދަލުގެ ނަމާ ވައްތަރުގެ ނަމެއް ބަޔާންކޮށްގެން އޮޅުވާލައިގެން އެ ބްރޭންޑުގެ މުދާތަކެއް ރާއްޖެއަށް ގެނެސްފައި ކަމަށް އެ މައްސަލައިގައި ބުންޏެވެ. މިގޮތުން އެގްޒޮޓިކް އެންޓަޕްރައިޒަސް އިން ގެންނަ މުދަލުގެ ބޭރުގައި އެއީ ޖީޓީ އިންޓަނޭޝަނަލް ގެ މުދާތަކެއް ކަމަށް ބަޔާން ކޮށްފައި ހުންނަ ކަމަށާއި އެ ކުންފުންޏާއި އެއްވައްތަރު ނަމެއް ގެ ގޮތުގައި ސީސީޓީ/މާލެ މިހެން ޖަހާފައި ހުންނަ ކަަމަށް ވެސް ސީޖީޓީންވަނީ ފާހަގަކޮށްފައެވެ. އަދި ސީސީޓީ އަކީ ރާއްޖޭގައި ރަޖިސްޓްރީ ކޮށްފައިވާ ވިޔަފާރިއެއްތޯ ބެލި އިރު އެފަދަ ނަމެއް ކިޔާ އެއްވެސް ވިޔަފާރިއެއް ރާއްޖޭގައި ނެތް ކަމަށް ވަނީ ބަޔާން ކޮށްފައެވެ.

މި ކަމުގެ ބޭނުމަކީ އެއީ ލޮލަށް ފަސޭހައިން އަޅައިނުގަންނަ ނަމެއް ޖެހުމުގެ ބޭނުމުގައި، ސީޖީޓީ އަކީ އޭގެ އޮތޮރައިޒްޑް ޑިސްޓްރިބިއުޓާ ކަން އެނގި ހުރެ އޮޅުވާލުމުގެ ތެރެއިން އެ މުދާ ރާއްޖެ އެތެރެކޮށް ވިއްކުން ކަމަށާއި،އެފަރާތަކީ ސީޖީޓީ އަށް އަށް ނިސްބަތްވާ ބައެއް ކަމުގައި ދެއްކުން ކަމަށް ވެސް ސީޖީޓީން ސިވިލް ކޯޓަށް ހުށައެޅި ބަޔާނުގައި ވެއެވެ.

އެފަދަ ބޮޑު އޮޅުވާލުމެއްގެ ތެރެއިން، އޮތޮރައިޒްޑް ޑިސްޓްރިބިޔުޓާކަން ލިބި 20 އަހަރު ވަންދެން ވިއްކި މުދަލެއްގެ ފޭކު ބާވަތެއް އެހެން ބަޔަކު ރާއްޖެ އަށް ގެނެސް ވިއްކަމުންދާތީ ސީޖީޓީ އަށް ކަސްޓަމަރުން ކުރާ އިތުބާރު ގެއްލި، އިޔާދަނުކުރެވޭ ގެއްލުން ލިބެމުންދާކަމަށް ވެސް މައްސަލައިގައި ވަނީ ބުނެފައެވެ.

ސީޖީޓީން ހުށަހެޅި މައްސަލާގައި ބުނެފައި ވަނީ، އެގްޒޮޓިކް ކުންފުނިން އެ ފޭކު މުދަލުގެ 200 ކޭސް އެތެރެކޮށް، ބޮންޑަޑް ވެއާހައުސެއްގައި ބަހައްޓާފައިވާއިރު، މިހާތަނަށް އޭގެ ތެރެއިން 10 ކޭސް ކްލިއާކޮށްފައިވާ ކަމަށެވެ. އެހެންކަމުން ސީޖީޓީން ސިވިލް ކޯޓުގައި އެދުނީ ބާކީ 190 ކޭސް ކްލިއާކުރުން ހުއްޓުވުމަށް ކަމާ ގުޅޭ އިދާރާތަކުގެ މައްޗަށް ވަގުތީ އަމުރެއް ނެރެދިނުމަށެވެ.

މިނުކުތާތަކަށް  ރިއާޔަތްކޮށް މައްސަލަ ބެއްލެވި ގާޒީ އައިޝަތު އަޒުފާ އަބްދުލްޣަފޫރު ނެރުއްވި އަމުރުގައި ރާއްޖެ އަށް އެތެރެކޮށްފައިވާ މުދަލުގެ އަސްލުކަމާ މެދު ސުވާލު އުފެދިފައިވާތީ އެ މުދަލުން އެއްވެސް މުއާމަލާތެއް ނުކުރުމަށް އެގްޒޮޓިކް ކުންފުންޏަށް ވަނީ އަމުރުކޮށްފަ އެވެ.

އަދި މި މުދަލުން އެއްވެސް ބައެއް ކްލިއާނުކޮށް ހުރި ނަމަ، އެ މުދާ ކްލިއާ ކޮށްދިނުން ވަގުތީ ގޮތުން މަޑުޖައްސާލުމަށް ކަސްޓަމްސްގެ މައްޗަށް އަމުރުކޮށް، އެ މުދާ ރާއްޖޭގައި ވިއްކާ ނަމަ އެކަން ހުއްޓުވައި ދިނުމަށް ފުލުހުންގެ މައްޗަށް ވެސް ސިވިލް ކޯޓުން ވަނީ އަމުރުކޮށްފަ އެވެ.