ކޮންސްޓްރަކްޝަން މަސައްކަތް ހުއްޓުމެއް ނެތި ކުރަމުންދާ ހުޅުމާލޭގެ ތިންވަނަ ފިޔަވައްސަށް އާންމުން ވަނުން މަނާކޮށްފިއެވެ.
މިކަން ބަޔާން ކޮށް އާބަންކޯ އިން ނެރެފައިވާ ބަޔާނުގައި ބުނެފައިވަނީ މިދުވަސްވަރަކީ މަދިރީގެ ޒަރިއްޔާއިން ފެތުރޭ ބަލިތައްގިނަވެ ހުޅުމާލޭގައިވެސް އާދަޔާ ހިލާފަށް މަދިރި ގިނަވެފައިވާ ދުވަސްވަރެއްކަމަށެވެ.
"ސިއްޚީ ދާއިރާގެ ޚިދުމަތްތެރިދަނީ ތަކުރާރުކޮށް މިކަމަށް ހާއްސަ ސަމާލުކަމެއް ދިނުމަށް އިލްތިމާސް ކުރަމުންނެވެ. އެހެންކަމުން ހުޅުމާލޭގެ ފޭސް 3 ސަރަހައްދަކީ ކޮންސްޓްރަކްޝަން މަސައްކަތުގެ އިތުރުން ހުސްބިންތަކުގައި ބޮޑެތި ގަސްތަކާއި ވިނަހުރި ސަރަހައްދަކަށްވެފައި އެސަރަހައްދުގައި މަސައްކަތްކުރާ ފަރާތްތަކުން މިކަމަށް އިތުރަށް ސަމާލުކަން ދިނުމަށް އާބަންކޯއިން އިލްތިމާސް ކުރަން" އާބަންކޯއިން ބުނެފައިވެއެވެ.
ފޭސް 3 ސަރަހައްދަކީ އާންމުންނަށް ހުޅުވާލެވިފައިވާ ސަރަހައްދަކަށްނުވިނަމަވެސް މަދުންނަމަވެސް އާންމުން މިސަރަހައްދަށް ވަންނަކަން އެކޯޕަރޭޝަނަށްވަނީ ފާހަގަކުރެވިފައި ވާ ކަމަށް އާބަންކޯއިން ބުނެއެވެ.
އަދި ތަކުރާރުކޮށް އެކި ފަހަރުމަތިން އެސަރަހައްދަށް ނުވަނުމަށް އެކޯޕަރޭޝަނުންވަނީ އިލްތިމާސްކޮށްފައި ކަމަށާއި، ވީމާ ހުއްދައެއްނެތި، ޒަރޫރީ އެއްވެސްބޭނުމަކާއި ނުލައި އެސަރަހައްދަށް ނުވަނުމަށް އަންގާ އިއުލާނު ކުރާ ކަމަށް އާބަންކޯއިން ބުނެފައިވެއެވެ.
މި ބަޔާނުގައި އެ ފަދަ ކަންކަމުގައި އެ ކޯޕްރޭޝަނަށް ލިބޭ އެއްބާރުލުން ފާހަގަކޮށް އެންމެހާ ރައްޔިތުންނަށް އެކޯޕަރޭޝަންއިން ޝުކުރު ދަންނަވައިފައިވެއެވެ.
Advertisement
This content is created and paid for by advertisers and does not involve Voice Journalists
