ކުޑަކުދިންތަކަކަށް ޖިންސީ ގޯނާކުރި ކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުއްޓާ ދޫކޮށްލި މުޙައްމަދު ޔުނާން އަލުން ހައްޔަރުކޮށްދިނުމަށް ޕްރޮސެކިއުޓާ ޖެނެރަލްގެ އޮފީހުން އެދިއްޖެ އެވެ.

ކޯޓުގެ އަމުރާކާއެކު ޝަރުތުތަކާއެކު ޔުނާނު ދޫކޮށްލީ މި މަހުގެ 14 ވަނަ ދުވަހުގަ އެވެ.

އޭނާ ދޫކޮށްލީ ޒަރޫރީ ކަމެއްގައި ނޫން ގޮތަކަށް ގެއިން ބޭރަށް ނުދިއުމަށާއި ކޯޓުގެ ހުއްދައެއް ނެތި ފުރައިގެން ނުދިއުމަށް ޝަރުތުކޮށްފަ އެވެ.

ޔުނާނު އަނބުރާ ހައްޔަރުކުރުމަށް ޕީޖީ އޮފީހުން ހުޅުމާލޭ ކޯޓުގައި އެދުނީ، އޭނާއަށް ކުރި ޝަރުތުތަކާއި ޚިފާފުވެފައިވާތީ ކަމަށް ބުނެއެވެ. 

ބަންދުގައި ހުއްޓާ ޔުނާން ދޫކޮށްލި މައްސަލަ އިސްތިއުނާފުކުރަން ޕީޖީއިން މި މަހުގެ 18 ވަނަ ދުވަހު ވަނީ ހައިކޯޓަށް ވެސް ހުށަހަޅާފައެވެ. 

އެހެން ނަމަވެސް އެ މައްސަލަ ބަލައިގަތުމާއި މެދު މިހާތަނަށް އެ ކޯޓުން ގޮތެއް ނިންމާފައެއް ނުވެއެވެ.

ޔުނާނާއި އޭނާގެ އަނބިމީހާ ފާތިމަތު ރިހުލާ ހައްޔަރުކޮށް ޝަރީއަތް ނިމެންދެން ބަންދުގައި ބަހައްޓަން 2020 ވަނަ އަހަރުގެ އޮކްޓޫބަރު 14 ވަނަ ދުވަހު ކޯޓުން އަމުރެއް ނެރެދިނީ، އެމީހުންގެ މައްޗަށް، އާއިލާ ކުދިން ހިމެނޭހެން ކުޑަ ކުދިންތަކަކަށް ޖިންސީ ގޯނާކުރި ކަމުގެ ބޮޑު ތުހުމަތެއް ކުރެވިގެން ދިއުމާއި ގުޅިގެން ނެވެ.