ތާއަބަދު އިސްލާމީ އަދި މިނިވަން މުޖްތަމަޢެއްގައި ތިބެން ބޭނުންނަމަ އަބަދުވެސް އެއްބައިވަންތަ ވާން ޖެހޭ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު އަލީ އިޙްސާން ވިދާޅުވެއްޖެއެވެ.

ވަޒީރު އިޙްސާން މިހެން ވިދާޅުވީ މިއަދު ފާހަގަ ކުރަމުންދާ ޤައުމީ އެއްބައުވަންތަ ކަމުގެ ދުވަހާއި ގުޅިގެން ދެއްވި މެސެޖު ގައެވެ.

ވަޒީރު އިޙްސާން ވިދާޅުވީ ސުނާމީ އެރި ދުވަހު ދިވެހި ރައްޔިތުން ގުޅިގެން އެކަކު އަނެކަކަށް އެއްބައިވަންތަވެގެން އެއްބައެއްގެ ގޮތުގައި ދެއްކެވި ހިތްވަރާއި ނަމޫނާ އަކީ އޭގެން މިއަދުވެސް ހިތްވަރު ލިބިގަންނަ ކަމެއް ކަމަށެވެ.

“އެދުވަހަށް ފަހުގަ އައި ކޮންމެ އެއްބައިވަންތަ ކަމުގެ ދުވަހަކީ އަޅުގަނޑުމެން އެހިތްވަރު އާ ކުރާ ދުވަހެއް”ވަޒީރު އިޙްސާން ވިދާޅުވެފައިވެއެވެ.

ވަޒީރު ވިދާޅުވީ ނަމަވެސް ހިތާމައަކީ ރާއްޖޭގެ މިވަގުތުި ހާލަތު އޮންނަ ގޮތުން ސިޔާސީ ބައިބައިވުމާއި ދޭދޭ މީހުންގެ ތެރޭގައި ޖެހޭ މައްސަލަތަކާއި ހިތް ނުތަނަވަސް ވާ ޙާލަތުގައި އަޅުގަނޑުމެންގެ ގުޅުންތަކަށް އަންނަ ބުރޫތަކާއި މިކަން ކަމުގެ ސަބަބުން އެއްބައިވަންތަކަމަށް އެއްދުވަހުން އަނެއް ދުވަހަށް މިދަނީ އަސަރު ކުރަމުން ދާ ދިއުން ކަމަށެވެ.

ދިވެހިންގެ ތެރެއަށް ނުކިއްސަރު ޙިޔާލުތަކާއި ބައިބައިވުން އުފެއްދުމުގެ މަޤްސަދުގައި ބޭރުގެ ޤައުމުތަކުންނާއި އެކިއެކި ޖަމާޢަތް ތަކުން ތާއަބަދު ދާނީ މަސައްކަތް ކުރަމުން ކަމަށް ވަޒީރު ވިދާޅުވިއެވެ. އަދި މިކަންކަމަށް ދިފާޢު ވުމުގެ ގޮތުން އޮތް އެންމެ ބޮޑު ހަތިޔާރަކީ އެއްބައިވަންތަކަން ކަމަށްވެސް ވަޒީރު ވިދާޅުވިއެވެ.