ކާބޯތަކެތީގެ ރައްކާތެރިކަމަށް ޢާންމުން ހޭލުންތެރިކުރުވުމާ ގުޅޭ ޤައުމީ މީސް މީޑިއާ ކެމްޕޭން 'މުކައްބަ' އިފްތިތާޙު ކޮށްފިއެވެ.
މި ކެމްޕޭން އަކީ މޯލްޑިވްސް ފުޑް އެންޑް ޑްރަގް އޮތޯރިޓީއާއި، ޑަބްލިއުއެޗްއޯ ގުޅިގެން ކޮޑެކްސް ޓްރަސްޓް ފަންޑުގެ އެހީތެރިކަމާއެކު ކުރިއަށްގެންދާ ކެމްޕޭނެކެވެ.
މި ކެމްޕޭން މިއަދު އިފްތިތާހް ކޮށްދިނުމަށް ބޭއްވި ރަސްމިއްޔާތުގައި ހެލްތު މިނިސްޓަރ ޑރ. ޢަބްދުﷲ ޚަލީލު ގެ އަރިހުގައި ރައީސް ޑރ.މުއިއްޒުގެ އަނބިކަނބަލުން، ފަސްޓް ލޭޑީ މެޑަމް ސާޖިދާ މުޙައްމަދު ވެސް ބައިވެރިވެވަޑައިގެންނެވިއެވެ.
މިޖަލްސާގައި ވާހަކަފުޅު ދައްކަވަމުން ސިއްޙަތާ ބެހޭ ވަޒީރު ޑރ. ޢަބްދުﷲ ޚަލީލު ވިދާޅުވީ ރާއްޖޭގައި ދުޅަހެޔޮ ސިއްހަތެއް ބިނާ ކުރުމަށް މަސައްކަތް ކުރަމުން އަންނަ ކަމަށެވެ. އަދި ބަލިތަކުން ދުރާލާ ރައްކާތެރި ވުމަށް ފިޔަވަޅު އެޅުމުގެ ގޮތުން، "ޕްރިވެންޓް ހެލްތް" އަކީ ރައީސް ޑރ.މުއިއްޒުގެ މުހިންމު ސިޔާސަތެއް ކަންވެސް މިނިސްޓަރ ގެ ވާހަކަފުޅު ގައި ފާހަގަކުރެއްވިއެވެ.
މީގެ އިތުރުންވެސް މިނިސްޓަރ ޑރ. ޢަބްދުﷲ ޚަލީލު ވިދާޅުވީ މި ސިޔާސަތުގެ ދަށުން ރައްޔިތުންގެ މަޖިލީހުގައި އޮތް ކާބޯތަކެއްޗާ ބެހޭ ބިލު އަވަސްކޮށްދެއްވުމަށް އެދި ވަޑައިގެން، ރައްޔިތުންގެ މަޖިލީހަށް ސިޓީއެއް ފޮނުވާފައިވާ ކަމަށްވެސް ވިދާޅުވިއެވެ
މި ހަފްލާގައި ވާހަކަފުޅު ދައްކަވަމުން އެމްއެފްޑީއޭގެ ޑެޕިއުޓީ ޑިރެކްޓަރު ޖެނެރަލް ސަތީޝް މޫސާ ވަނީ މުކައްބަ ފަދަ ކެމްޕޭން އަކީ ރާއްޖޭގައި ކާބޯތަކެތީގެ ރައްކާތެރިކަން ކަށަވަރުކުރުމަށް ވަރަށް ބޭނުންތެރި ކެމްޕޭން އެއް ކަމަށް ވެސް ވިދާޅުވެފައެވެ.
ކޮންމެ ގޭބިސީއެއްގައިވެސް ކާބޯތަކެތީގެ ރައްކާތެރިކަމުގެ ސަގާފަތެއް އާލާކުރުމަށާއި ކާބޯތަކެތި ކަމުގެ ރައްކާތެރިކަމަށް ހޭލުންތެރި ކުރުވުމަށް ފެށި މި ކެމްޕޭނަށް ހުރިހާ ފަރާތްތަކުން ވެސް އެއްބާރުލުން ދިނުމަށް އެމްއެފްޑީއޭ އިން އެދެއެވެ.
Advertisement
This content is created and paid for by advertisers and does not involve Voice Journalists
