ދިވެހިންގެ ހިތްތަކަށް ރަޙުމާއި ކުލުނާއި އޯގާވެރިކަމުގެ މޫސުމެއް އަންނަން ޖެހޭ ކަމަށް ރައީސުލްޖުމްހޫރިއްޔާ ޑރ.މުޙއްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިރޭ ބޭއްވި އެއްބައިވަންތަ ކަމުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޑރ.މުއިއްޒު ވިދާޅުވީ ދިވެހީން އެކަކު އަނެކަކުގެ އަބުރަށް ޢިއްޒަތަށް ޙުރުމަތްތެރިކޮށް ހިތުމަށް ވެސް މަގުދައްކައިދޭން ޖެހިފައިވާ ކަމަށެވެ.

Advertisement

މީގެ އިތުރުންވެސް އާއިލީ ގުޅުންތަކަށާއި ދޭދޭ ކުލުނުވެރިކަމާއި އެއްބަނޑުއެއްބަފާކަން ގާއިމުކުރުމަށް އެހީ ބޭނުންވާކަން ވެސް ރައީސް ޑރ.މުއިއްޒުގެ ވާހަކަފުޅުގައި ފާހަގަކުރެއްވިއެވެ.

އެމަނިކުފާނު ދެކެން ބޭނުންވަނީ މާޒީން ދެކެފައިވާ ގުޅުންތެރިކަމުގެ ދުވަސް ކަމަށާއި ފާހަގަކުރަމުން މިދާ ޤައުމީ އެއްބައިވަންތަކަމުގެ ދުވަސް ދޭ ފިލާވަޅަކީ އެއީ ކަމަށްވެސް ރައީސް ޑރ.މުއިއްޒު ވިދާޅުވެއްޖެއެވެ.

ހަމައެހެންމެ ރައީސް ޑރ.މުއިއްޒު ވިދާޅުވީ ޤައުމެއް ފިކުރީ ގޮތުން ފުދުންތެރިވެ، ޢިލްމީ ގޮތުން ހޭލުންތެރިވާންޖެހޭ ކަމަށާއި އިޤުތިޞާދީ ގޮތުން ފޯރުންތެރިވެ، ހުނަރުގެ ގޮތުން އުފެއްދުންތެރިވާންޖެހޭ ކަމަށެވެ. އަދި މި ހުރިހައި ބަހާތަކަކާއެކު ޤައުމީ ގޮތުން އެއްބައިވަންތަ ވާންޖެހޭ ކަމަށްވެސް އެމަނިކުފާނު ވިދާޅުވިއެވެ.

ދިވެހީންގެ މާޒީ ދިވެހީންނަށް ދިން ފިލާވަޅަކީ ކުލުނުވެރިކަމާއި އިޙްސާންތެރިކަމާއި އިޚްލާޞްތެރިކަން ރައްޔިތުންގެ ކިބައިގައި ހަރުލެއްވުން ކަމަާއި އެއްބައިވަންތަކަމުގެ ދުވަހު ދިވެހިން ޢަމަލީ ގޮތުން ދަސްކޮށް އުނގެނުނީ މި ފިލާވަޅު ކަމަށް ވެސް ތަކުރާރުކޮށް ރައީސް ޑރ.މުއިއްޒު ވިދާޅުވިއެވެ.

އެއްބައިވަންތަކަމުގެ ދުވަސް ފާހަގަކުރަނީ 2004 ވަނަ އަހަރު ޑިސެންބަރު 26 ވަނަ ދުވަހު ކުރިމަތިވި ހިތާމަވެރި ސުނާމީ ކާރިސާގައި ދިވެހިން ދައްކައިދިން އެއްބައިވަންތަކަމުގެ ރަމްޒެއްގެ ގޮތުންނެވެ.

މި އަހަރަކީ މި ކާރިސާއަށް 19 އަހަރު ފުރުނު އަހަރެވެ. މިކާރިސާގައި 82 މީހުން މަރުވެ، 26 މީހަކު ވީނުވީއެއް ނޭނގި ވަނީ ގެއްލިފައެވެ.

ސުނާމީ ކާރިސާއަށް ފަހު ކޮންމެ އަހަރުވެސް ޑިސެމްބަރު 26 ވަނަ ދުވަސް ގައުމީ އެއްބައިވަންތަކަމުގެ ދުވަހުގެ ގޮތުގައި ރާއްޖޭގެ ހުރިހައި ރަށެއްގައި ފާހަގަކުރެއެވެ.