މެދުކެނޑުމެއް ނެތި އެންމެ ދިގު މުއްދަތަކަށް، އެންމެ ގިނަ ދުވަސްތަކަކަށް، ދެމިގެން ދިޔަ ލައިވް ޕްރޮގްރާމަކީ ސުނާމީ ކާރިސާއާ ގުޅިގެން ކުރިއަށް ގެންދިޔަ ލައިވް ޕްރޮގްރާމް ކަމަށް ނޭޝަނަލް އިންސްޓިޓުއުޓް އޮފް އެޑިއުކޭޝަންގެ ޑިރެކްޓަރ ޖެނެރަލް އަދި ޓީވީ ޕްރެސެންޓަރު އަހްމަދު ޝަކީބް ވިދާޅުވެއްޖެއެވެ.

އެބޭފުޅާ މިފަދައިން ވިދާޅުވީ އެއްބައިވަންތަ ކަމުގެ ދުވަސް ނިސްބަތްވާ 2004 ވަނަ އަހަރު ރާއްޖެއަށް އެރި ސުނާމީ ހާދިސާ އާއި ގުޅޭ ގޮތުން ކުރެއްވި ޕޯސްޓެއްގައެވެ.

މި ޕޯސްޓްގައި ޝަކީބް ވިދާޅުވީ މި ކާރިސާ އަކީ މީޑިއާގެ ދާއިރާގައި އެބޭފުޅާ ހޭދަ ކުރެއްވި ވިއްސަކަށް އަހަރުދުވަހުގެ ހަނދާންތަކުން މިއަދުވެސް ހިތަށް އެންމެ ބޮޑަށް އަސަރުކުރާ ހާދިސާކަމަށެވެ.

ޝަކީލް ވިދާޅުވި ގޮތުގައި އެދުވަހުގެ ހެނދުނު 8:30 ގައި އޮފީހުގައި ފެށި ބައްދަލުވުމެއް ނިންމައިލަން ޖެހުނީ މާލެއަށް ބޮޑު ރާޅު އަރައިގެން އުޅޭ ޚަބަރެއް ލިބިގެން ކަމަށާއި އަދި އެ ބޮޑު ރާޅު ރާއްޖޭގެ ބައެއް ރަށްރަށަށްވެސް އެރިކަމަށާއި ބައެއް ރަށްރަށުގައި ކަކޫތާފެނަށް ދިޔަގަނޑު އަރާފައިވާކަމަށް ޚަބަރު ލިބުމުން ކަމަށެވެ.

ޚަބަރު ލިބުމާއި އެކު އޭރު  ޓީވީ މޯލްޑިވްސްގެ އެނައުންސަރެއްގެ މަގާމުގައި ހުންނެވި ޝަކީބް ،ޚަބަރުތަކާގުޅޭ ޞައްޙަ މަޢުލޫމާތެއް ހޯދުމަށް ޓަކައި ދުރުވީ އެބޭފުޅާ ގެ އޮފީހާއި ދާދި ގާތުގައި ހުރި ޓީވީ މޯލްޑިވްސްއަށެވެ.

އެތަނަށް ޝަކީބަށް ދެވުނުއިރު، ޓީވީ މޯލްޑިވްސް ގައި ތިއްބެވި ބޭފުޅުން އުޅުއްވަނީ ވަގުތުން ޓީވީގެ ލައިވް ޕްރޮގްރާމް ފަށަން އިރުޝާދު ލިބިފައިވާތީ ލައިވް ކުރިއަށް ގެންގޮސްދޭނެ އެނައުންސަރެއް ހޯއްދެވުމުގެ މަސައްކަތުގައިއެވެ. ސުވާލެއް ކޮށްލާކަށް ފުރުޞަތެއް ނުލިބި ޝަކީބަށް ޖެހުނީ ޓީވީ މޯލްޑިވްސްގެ މައި ސްޓޫޑިއޯއަށް ވަންނާށެވެ. އޭގެ އިރުކޮޅެއްވެސް ނުވަނީސް މަޝްހޫރު އެނައުންސަރ ހީނާ ވަލީދު ވަޑައިގެން، ލަސްތަކެއް ނުވެ ލައިވް ޕްރޮގްރާމް އެ ފެށިގެން ދިޔަ ކަމަށް ޝަކީބުގެ ޕޯސްޓްގައި ވެއެވެ.

އެދުވަހު ރާއްޖެއަށް ކުރިމަތިވި ބިރުވެރިކަމުގެ މަޢުލޫމާތު ޝަކީބް މެންނަށް ލިބެންފެށީ އެހާތަނުންނެވެ. ފޯނުކޯލުތަކާއި ފޮޓޯތަކާއި ވީޑިއޯގެ ޒަރީޢާއިންނެވެ. މުޅި ރާއްޖެއަށް ކުރިމަތިވި ބިރުވެރި ކާރިސާގެ އަސަރު ދިވެހި މުޖުތަމަޢަށް ކުރި މިންވަރު ނިއުޅެމުން ދިޔައީ އެބޭފުޅުންގެ ލޯމަތީގައެވެ. ރުއިމާއި ގިސްލުމުގެ އަޑުތައް އޮހެންފެށީ އެއްވެސް ސުމާރެއް ނެތިކަމަށާއި އެބޭފުޅުން ތިއްބެވީ ލައިވް ކެެމެރާގެ ކުރިމަތީގައި ކަމަށް ވީތީ، ފެންނަ މަންޒަރުތަކާއި އިވޭ އަޑުތަކުގެ ސަބަބުން ކުރި އަސަރު އެއްވެސް ސިފައެއްގައި ނުދައްކައިވޭތޯ  "ޖަޒުބާތުތަކުގައި ފިސާރި ބާރަށް އަތްއަޅައި އޮބެހެއްޓޭތޯ" މަސައްކަތް ކުރެއްވިކަމަށް ޝަކީބް ވިދާޅުވިއެވެ. 

ޝަކީބް ވިދާޅުވީ އެދުވަހުގެ 10 ޖަހަން އުޅެނިކޮށް ފެށި ލައިވް ޕްރޮގްރާމުން ނުކުތީ އެރޭ ފަތިހު 5 ޖަހަން އުޅެނިކޮށްކަމަށެވެ.

އެއްބައިވަންތަކަމުގެ ދުވަސް ފާހަގަކުރަނީ 2004 ވަނަ އަހަރު ޑިސެންބަރު 26 ވަނަ ދުވަހު ކުރިމަތިވި ހިތާމަވެރި ސުނާމީ ކާރިސާގައި ދިވެހިން ދައްކައިދިން އެއްބައިވަންތަކަމުގެ ރަމްޒެއްގެ ގޮތުންނެވެ.

މި އަހަރަކީ މި ކާރިސާއަށް 19 އަހަރު ފުރުނު އަހަރެވެ. މިކާރިސާގައި 82 މީހުން މަރުވެ، 26 މީހަކު ވީނުވީއެއް ނޭނގި ވަނީ ގެއްލިފައެވެ.

ސުނާމީ ކާރިސާއަށް ފަހު ކޮންމެ އަހަރުވެސް ޑިސެމްބަރު 26 ވަނަ ދުވަސް ގައުމީ އެއްބައިވަންތަކަމުގެ ދުވަހުގެ ގޮތުގައި ރާއްޖޭގެ ހުރިހައި ރަށެއްގައި ފާހަގަކުރެއެވެ.