ޝްރީލަންކާގެ ކެންޑީގައި މިހާރު ކުރިޔަށްދާ އެ ޤައުމުގެ ނެޝަނަލް އަދި ނެޝަނަލް ޖޫނިއަރ ޝޯޓްކޯސް މުބާރާތުގައި މިއަދު ރާއްޖޭގެ ކުރިއަރަމުން އަންނަ ފުރާވަރުގެ ފެތުންތެރިޔާ މެރާލް އައިން ލަޠީފު ރަން މެޑަލް ހޯދައިފިއެވެ.

ޝްރީލަންކާގެ ކެންޑީ ހިލްވުޑް ކޮލެޖް ސްވިމިންގ ޕޫލުގައި މިއަދު ހެނދުނު ކުރިއަށްދިޔަ 100 މީޓަރު ބަޓަފްލައި ރޭހުގެ ހީޓުގައި 14 ފެތުންތެރިން ބައިވެރިވިއިރު، މި އިވެންޓުގެ ފައިނަލުން މެރާލް ފަޚުރުވެރި ރަން މެޑަލް ހޯދީ 8 ފެތުންތެރިންނާއި ވާދަކޮށް ބޮޑު ތަފާތަކުން ކުރީގައި އޮވެގެންނެވެ.

މިމަހު 26 ން 30 އަށް ކުރިޔަށްދާ މިމުބާރާރުގައި ރާއްޖޭގެ ފެތުންތެރިން ވާދަކުރަނީ ޖޫނިއަރ ފިރިހެން އަދި އަންހެން، ނެޝަނަލް އަންހެން އަދި ފިރިހެން ބައިގައެވެ. މި 4 ބައިގައި ޖުމުލަ 25 ދިވެހި ފެތުންތެރިން މިމުބާރާތުގައި އަންނަނީ ވާދަކުރަމުންނެވެ.

އުމުރުން 14 އަހަރުގެ މެރާލް އަކީ ރާއްޖޭގައި ކުރިއަރަމުން އަންނަ ފުރާވަރުގެ ފެތުންތެރިއެކެވެ. އަދި މިމުބާރާތުގައި ރިލޭ ނުހިމަނައި އިންޑިވިޖުއަލް 5 އިވެންޓެއްގައި މެރާލް ވާދަކުރުމަށް ވަނީ ހަމަޖެހިފައިވާ އިރު މިމުބާރާތުގައި ރާއްޖޭގެ އިތުރުން ސްރީލަންކާގެ އެކި ކުލަބުތަކާ ކޮލެޖްތަކުން ޖުމުލަ 49 ޓީމު ބައިވެރިވެފައިވެއެވެ.