އދ ދިގުރަށު ކުނިގޮނޑުން ފެނުނު ކުއްޖާގެ ހަށިގަނޑާމެދު ކަންކުރާނެ ގޮތެއް ނިންމުމަށް ޢާއިލާއިން މަޝްވަރާ ކުރަމުން އަންނަ ކަމަށް ފުލުހުން ބުނެފިއެވެ. 

އދ. ދިގުރަށުގައި ވިހެއުމަށްފަހު ކޮތަޅަކަށްލައި ކުނިގޮނޑަށް އެއްލާލާފައި އޮތް ކުޑަކުއްޖެއް ފެނިފައި ވަނީ މި މަހުގެ ތިން ވަނަ ދުވަހު އެވެ.

ދިވެހި ފުލުހުންގެ ހިދުމަތުން މީގެކުރިން ބުނެފައި ވަނީ ކޮތަޅަކަށްލައި އެއްލާފައި އޮތް ކުއްޖަކު ދިގުރަށު ކުނިގޮނޑުން ފެނިފައިވާކަމުގެ މައުލޫމާތު ފުލުހުންނަށް ލިބިފައި ވަނީ އެ ދުވަހުގެ ހެނދުނު 9:20 ހާއިރު ކަމަށެވެ. 

ދިގުރަށުން "ވޮއިސް" އަށް މައުލޫމާތު ދިން ފަރާތެއް ބުނެފައިވާ ގޮތުގައި އެ ކުއްޖާ ފެނިފައި ވަނީ ބިދޭސީން ގޮނޑަށް ކުނި އަޅަމުން ދަނިކޮށް ކަޅުކުލައިގެ ޑަސްބިން ކޮތަޅަކަށް ލާފަ އޮއްވައެވެ. އަދި ފެނުމާއެކު، އެކަން ރަށު ކައުންސިލަށް އެންގި ކަމަށާ އެ މައްސަލަ ފުލުހުންނަށް ހުށަހެޅީ ރަށު ކައުންސިލުން ކަމަށް ވެސް މައުލޫމާތު ލިބިފައިވެއެވެ.

އެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ގެންދިޔުމަށްފަހު މިމަހު 24 ގައިވަނީ މާލެ ގެނެސްފައެވެ. 

އެކަމާއި ގުޅޭ އިތުރު މައުލޫމާތު ދެއްވަމުން މިއަދު މީޑިއާ އޮފިޝަލް ވިދާޅުވީ، ކުއްޖާގެ ހަށިގަނޑާމެދު ކަންކުރާނެ ގޮތެއް ނިންމުމަށް ޢާއިލާއިން މަޝްވަރާ ކުރަމުން އަންނަ ކަމަށެވެ. 

ފުލުހުން މި މައްސަލަ އަދިވެސް ތަހުގީގު ކުރަމުންދާއިރު، މައްސަލަ އާއި ގުޅިގެން 30 އަހަރުގެ ލަންކާއަށް ނިސްބަތްވާ އަންހެނެއް ހައްޔަރު ކޮށްފައިވާ ކަމަށް އެ އިދާރާއިން މައުލޫމާތު ދެއެވެ. 

އެ އަންހެން މީހާ އަކީ ކުއްޖާގެ މަންމަ ކަމަށް މަޢުލޫމާތު ދޭއިރު، އެއީ، އެ ރަށު ގެސްޓް ހައުސް އެއްގައި މަސައްކަތް ކުރާ މީހެއް ކަމަށްވެސް އެ ރަށުން މަޢުލޫމާތު ދެއެވެ. ނަމަވެސް ކުއްޖާގެ ބައްޕަ އާއި ގުޅޭ އެއްވެސް މައުލޫމާތެއް އެއްވެސް އިދާރާއަކުން ދީފައެއް ނުވެއެވެ.