ސީލައިފް ގްލޯބަލްގެ ވެރިމީހާ އަހުމަދު މޫސާ މުހައްމަދު (އަންމަޓީ) ގެ ޕާސްޕޯޓު ވަގުތީ ގޮތުން ދޫކޮށްލުމަށް ހައި ކޯޓުން ކުރި އަމުރު އިސްތިއުނާފް ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ސުޕްރީމް ކޯޓަށް ހުށައަޅައިފިއެވެ.

މިއަދު އެ އޮފީހުން ނެރުނު ނޫސް ބަޔާނެއްގައި ވަނީ މި މައްސަލައިގައި ދިވެހިރާއްޖޭގެ ހައިކޯޓުގެ ނިންމެވުމާމެދު ޕީޖީ އޮފީހުން ހިތްހަމަ ނުޖެހޭތީ،ސުޕްރީމް ކޯޓުގައި އިސްތިއުނާފުކުރުމަށް ނިންމައި، އިސްތިއުނާފުކުރުމަށް މިއަދުގެ ވަގުތެއްގައި ހުށަހެޅޭނެ ކަމަށެވެ.

އަދި މީގެ އިތުރުން ޕީޖީ އޮފީހުން ބުނީ އައްމަޓީގެ ޕާސްޕޯޓް ވަގުތީ ގޮތުން ދޫކޮށްލުމަށް ކްރިމިނަލް ކޯޓުން ނިންމާފައި އޮތީ 06 ޑިސެންބަރު 2023 އިން ފެށިގެން 25 ޑިސެންބަރު 2023 އާ ހަމައަށް ކަމަށެވެ. އެހެންކަމުން މި މައްސަލަ ދިވެހިރާއްޖޭގެ ހައިކޯޓުން ނިންމިއިރު އަޙްމަދު މޫސާ މުޙައްމަދުގެ ޕާސްޕޯޓް ވަގުތީ ގޮތުން ދޫކޮށްލުމަށް ނިންމި މުއްދަތު އޮތީ ހަމަވެފައި ކަމަށްވެސް އެ އޮފީހުގެ ނޫސް ބަޔާނުގައި ވަނީ ބުނެފައެވެ.

މި މައްސަލަ ދިވެހިރާއްޖޭގެ ސުޕްރީމް ކޯޓުގައި އިސްތިއުނާފުކުރުމަށް ޕީޖީ އޮފީހުން ނިންމާފައިވަނިކޮށް އަޙްމަދު މޫސާ މުޙައްމަދުގެ ޕާސްޕޯޓް އަމުރު މުރާޖަޢާކުރުމުގެ އަޑުއެހުމެއް މިއަދު ގެ 13:00 ގައި ކްރިމިނަލް ކޯޓުގައި ތާވަލުކޮށްފައިވީ ނަމަވެސް އަޙްމަދު މޫސާ މުޙައްމަދުގެ ޕާސްޕޯޓާ ގުޅޭ މައްސަލައިގައި ދިވެހިރާއްޖޭގެ ސުޕްރީމް ކޯޓުން ގޮތެއް ނިންމަވަންދެން އަޙްމަދު މޫސާ މުޙައްމަދުގެ ޕާސްޕޯޓް ހިފެހެއްޓުމުގެ އަމުރު މުރާޖަޢާކުރުމުގެ އަޑުއެހުން ކުރިއަށް ނުގެންދެވުމަށް ޕީޖީ ކްރިމިނަލް ކޯޓުގައި އެދިފައި ވާނެ ކަމަށް އެ އޮފީހުން ވަނީ ބުނެފައެވެ.

ކްރިމިނަލް ކޯޓުން އޭނަގެ ޕާސްޕޯޓު ވަގުތީ ގޮތުން ދޫކޮށްލުމަށް ކުރި އަމުރުގެ ރައުޔުގައި ބުނެފައިވަނީ އޭނާގެ މައިބަދައިގެ އޮޕަރޭޝަނެއް ކުރުމަށް ޑޮކްޓަރު ލަފާދީފައިވާކަމަށް ކޯޓަށް ހުށަހަޅާފައިވާ މެޑިކަލް ރިޕޯޓު ތަކުން އެނގެން އޮންނަ ކަމަށެވެ. އެއީ ސީރިއަސް އޮޕަރޭޝަނަކަށް ވުމާއިއެކު ސްރީލަންކާގައި ދިރިއުޅޭ އޭނާގެ އާއިލާ ކައިރީގައި ހުރެގެން ފަރުވާ ލިބުމުގެ ފުރުސަތު ފަހިކޮށްދިނުމަށް، އޭނާ ފުރުން މަނާކުރަން ނެރެފައިވާ އަމުރު ވަގުތީ ގޮތުން ސަސްޕެންޑްކުރަން ނިންމާފައިވާ ކަމަށް އެ އަމުރުގައި ބުނެފައިވެއެވެ.

އަންމަޓީގެ މައްޗަށް ވަނީ ހުޅުމާލޭގައި ފްލެޓްތަކެއް އަޅަން، އެޑްވާންސަށް އެ ފުލެޓް ގަންނަން ބޭނުންވާ މީހުން އަތުން ފައިސާނަގާ، އެ ފައިސާއަށް ހިޔާނާތްތެރިވިކަމުގެ ދައުވާ ކޮށްފައެވެ.އަންމަޓީގެ މައްޗަށް ހިޔާނާތުގެ 42 ދައުވާއެއް ވަނީ ކޮށްފައިވީނަމަވެސް މިހުރިހާ ދައުވާއަކަށް އޭނާ ވަނީ އިންކާރު ކޮށްފައެވެ.