އައްޑޫ ސިޓީއަށް މިހާރު ކުރަމުން ގެންދާ ވިއްސާރައިގައި ފޭދޫ އަދި ހުޅުމީދޫގެ ބައެއް ގެތަކުގައި ފެން ބޮޑުވެއްޖެއެވެ.

ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނީ އައްޑޫ ސިޓީ ފޭދޫ އަދި ހުޅުމީދޫގައި ފެންބޮޑުވެ ހުރި ޖުމްލަ 31 ގެޔަކަާއި ބައެއް ގެސްޓްހައުސްތަކާއި ފިހާރަތަކަށް އެކިވަރުގެ ގެއްލުން ލިބިފައިވާކަމަށެވެ.

މިގޮތުން ފޭދޫގައި 21 ގެޔަކަށް ގެއްލުން ވެފައިވާއިރު ހުޅުމީދޫގެ 10 ގެޔަކަށް ވަނީ އެކިވަރުގެ ގެއްލުންތައް ލިބިފައި ކަމަށް އެންޑީއެމްއޭ ވަނީ ބުނެފައެވެ.

ސިފައިންނާއި އެެހެނިހެން ފަރާތްތައް ގުޅިގެން ފެން ހިއްކުމާއި ވެލިބަސްތާ ޖެހުމުގައި ހަރަކާތްތެރިވަމުން އަންނަކަމަށް އެއިދާރާއިން ވަނީ ބުނެފައެވެ.

މޫސުމާ ބެހޭ އިދާރާއިން ވަނީ ފުވައްމުލަކު ސިޓީން އައްޑޫ ސިޓީއަށް އޮރެންޖު އެލާޓު ނެރެފައެވެ. ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމަށް އެ އިދާރާ އިން ވަނީ ލަފާ ކޮށްފައެވެ.

މިހާރު ކުރަމުންދާ ވިއްސާރަޔަކީ އަރުވައި މޫސުން ފެށޭ ދުވަސްކޮޅު ރާއްޖެއަށް ކޮންމެ އަހަރަކުވެސް ކުރާ ވިއްސާރައެއް ކަމަށް އެއިދާރާއިން ވަނީ ބުނެފައެވެ.