ރ.އަތޮޅު ކައުންސިލް ފުޓްސަލް ޗެލެންޖު 2023 ގެ ސެމީ ފައިނަލް ފުރަތަަމަ މެޗުގައި މިއަދު ހަވީރު އެންމެ ފަހުގެ ރަނަރަޕް އިނގުރައިދޫ އާއި ރަސްމާދޫ ވާދަކުރި މެޗު 12-6 ގެ ތަފާތުބޮޑު ނަތީޖާއަކުން މޮޅުވެ އިނގުރައިދޫ އިން މުބާރާތުގެ ފައިނަލުގެ ފުރަތަމަ ޖާގަ ކަށަވަރުކޮށްފިއެވެ.

އިނގުރައިދޫ އިން މުބާރާތުގެ ސެމީ ފައިނަލުގެ ޖާގައެއް ހޯދީ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ 9 ޕޮއިންޓާއެކު ގުރޫޕް އޭގެ އެއްވަނަ ޓީމުގެ ގޮތުގައެވެ. އަދި ރަސްމާދޫ އިން ސެމީ ފައިނަލުގެ ޖާގައެއް ހޯދީ ގްރޫޕް ބީގައި ކުޅުނު ދެމެޗުގެ ތެރެއިިން އެއް މެޗުން ބަލިވެ، އަނެއް މެޗުން އެއްވަރުވުމުން ލިބުނު އެއް ޕޮއިންޓާއެކު ލަނޑުގެ ތަފާތުން ގްރޫޕްގެ ދެވަނަ ހޯދައިގެންނެވެ.

އިނގުރައިދޫ އާއި ރަސްމާދޫ ވާދަކުރި މެޗުގެ ތެރެއިިން

މިމެޗުގެ ފުރަތަަމަ ހާފުގައި އިނގުރައިދޫ ޓީމުން 8 ލަނޑު ކާމިޔާބުކުރި އިރު، މިހާފުގައި އެޓީމުގެ ކެޕްޓަން އަހުމަދު އައިހަމް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. މީގެ އިތުރުން އެޓީމުގެ އަލީ ޝާފިޢު ދެލަނޑު ކާމިޔާބު ކުރިއިރު މުހައްމަދު މަމްދޫހް، އަލީ ފާތިހް، ހަސަން މާއިލް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

އަދި މިހާފުގައި ރަސްމާދޫ ޓީމުން ތިން ލަނޑު ކާމިޔާބުކުރިއިރު، އެޓީމުގެ ކެޕްޓަން މުހައްމަދު ފަޒީމް، ތާސީން ސައީދު އަދި މުހައްމަދު ސާއިދު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 8-3 ގެ ނަތީޖާއަކުން އިނގުރައިދޫ ކުރީގައި އޮވެގެންނެވެ.

އިނގުރައިދޫ އާއި ރަސްމާދޫ ވާދަކުރި މެޗުގެ ތެރެއިިން

މެޗުގެ ދެވަަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި އިނގުރައިދޫ ޓީމުން އިތުރު ހަތަރު ލަނޑު ކާމިޔާބުކުރިއިރު، ރަސްމާދޫ ޓީމުން ވެސް ވަނީ ތިން ލަނޑުގެ ކާމިޔާބުކޮށްފައެވެ. އެގޮތުން މިހާފުގައި އިނގުރައިދޫ ޓީމުގެ ކެޕްޓަން އަހުމަދު އައިހަމް، މުހައްމަދު މަމްދޫހް، އަލީ ފާތިހުގެ އިތުރުން ހުސެއިން މުބްޝާމް މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

މިހާފުގައި ރަސްމާދޫގެ ލަނޑުތައް ކާމިޔާބުކޮށްދިނީ އެޓީމުގެ ކެޕްޓަން މުހައްމަދު ފަޒީމް، ތާސީން ސައީދު ގެ އިތުރުން މުހައްމަދު ނާހިލް އެވެ. މިއާއެކު މެޗުގެ ކުޅުން ނިމިގެންދިޔައީ 12-6 ގެ ނަތީޖާއަކުން އިނގުރައިދޫ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ އިނގުރައިދޫ ޓީމުގެ ކެޕްޓަން އަހުމަދު އައިހަމް އެވެ.

ޗެންޕިްއަން ޓީމަށް 30,000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު 7 ޓީމަކުން ބައިވެރިވެފައިވާއިރު، މުބާރަތް ކުރިއަށް ގެންގޮސްފައި ވަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު މުބާރާތުގެ ފައިނަލަށް ހޮވޭގޮތަށެވެ.