އައްޑޫ ސިޓީއަށް މިހާރު ކުރަމުން ގެންދާ ވިއްސާރައިގައި އެ ސިޓީގެ 92 ގެޔަކަށް ފެންވަދެ 1 ގެޔަކުން ކަރަންޓުގެ ޚިދުމަތް މެދުކެނޑިއްޖެއެވެ.

ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނީ މިހާރު ކުރަމުންދާ ވިއްސާރައިގައި އައްޑޫ ސިޓީގެ ފަސް ރަށެއްގައި ފެން ބޮޑުވެފައިވާކަމަށެވެ.

މިގޮތުން މަރަދޫގައި ހުރި 13 ގެއެއްގައި ފެން ބޮޑުވެފައިވާއިރު އެ ގެތަކުން ފެން ހިއްކައި އާންމު ހާލަތަށް ގެނައުމުގެ މަސައްކަތް ކުރަމުން އަންނަ ކަމަށް އެ އިދާރާއިން ބުނެއެވެ.

Advertisement

މަރަދޫގެ އިތުރުން މަރަދޫފޭދޫ ގެ 5 ގެޔެއް ގައި ފެން ބޮޑުވެ 1 ގެޔަކުން ވަނީ ކަރަންޓުގެ ހިދުމަތް މެދު ކެނޑިފައެވެ.ކަރަންޓު ކެނޑުނު ގެޔަށް ކަރަންޓު ދިނުމުގެ މަސައްކަތް ދަނީ ކުރަމުންނެވެ. މީގެ އިތުރުންވެސް ފޭދޫއިން 60 ގެއަކާއި ހުޅުދޫގެ 10 ގެއެއްގައި ފެންބޮޑުވެ ހިތަދޫގެ 9 ގެއެއްގެ ގޯތި ތެރޭގައި ފެން ބޮޑުވެ، ފެން ހިންދުމުގެ މަސައްކަތް ކުރެވިފައި ވާކަމަށް އެންޑީއެމްއޭ އިން ބުނެއެވެ.

މި ހާދިސާ ގެ ސަބަބުން އެއްވެސް ގެޔަކުން މީހުން ހުސްކޮށް އިންސާނީ އެހީތެރިކަން ފޯރު ކޮށްދެން ޖެހޭ ފަދަ ހާލަތަކަށް އައިސްފައި ނުވާ ކަމަށާއި، ރަށްތަކުގެ ފެން ހިއްކުމާއި ކޯރު ކެނޑުމާއި، ވެލި ބަސްތާ ޖެހުމުގައި ކަމާބެހޭ ފަރާތް ތަކުގެ އިތުރުން، އާންމު ފަރުދުންވެސް ހަރަކާތްތެރި ވަމުން އަންނަ ކަމަށް އެންޑީއެމްއޭ އިން ބުނެއެވެ.

މީގެ އިތުރުން އެންޑީއެމްއޭ އިން ބުނީ ލިބުނު ގެއްލުން ވަޒަން ކުރާނީ ފެން ހިނދި އާންމު ހާލަތަށް ރުޖޫއަ ވުމުން ކަމަށެވެ.

މި ވިއްސާރައިގައި ފުވައްމުލަކުގެ މަގުތަކުގައި ފެންބޮޑުވި ނަމަވެސް ގޭގޭގައި ފެންބޮޑު ވެ ގެއްލުން ލިބޭ ހާލަތަކަށް އައިސްފައި އެއް ނުވެއެވެ.

މޫސުމާ ބެހޭ އިދާރާއިން ވަނީ ފުވައްމުލަކު ސިޓީން އައްޑޫ ސިޓީއަށް އޮރެންޖު އެލާޓު ނެރެފައެވެ. ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމަށް އެ އިދާރާ އިން ވަނީ ލަފާ ކޮށްފައެވެ.

މިހާރު ކުރަމުންދާ ވިއްސާރަޔަކީ އަރުވައި މޫސުން ފެށޭ ދުވަސްކޮޅު ރާއްޖެއަށް ކޮންމެ އަހަރަކުވެސް ކުރާ ވިއްސާރައެއް ކަމަށް އެއިދާރާއިން ވަނީ ބުނެފައެވެ.