މި ސަރުކާރުން ކުރިއަށް ގެންދާ ބޯހިޔާވަހިކަމުގެ އެންމެ ބޮޑު މަޝްރޫއު ކަމުގައިވާ ރަސްމާލެ ހިއްކުމުގެ މަސައްކަތް ކުރިއަށް ދަނީ ގުޅީފަޅު، ގިރާވަރުފަޅު، ތިލަފުށި އަދި ހުޅުމާލެއިން ހިއްކާ ސަރަހައްދުން ވެލި ނަގައިގެން ނޫން ކަމަށް އާބަންކޯގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވެއްޖެއެވެ.

ފަޒުލް މި ފަދައިން ވިދާޅުވީ ރަސްމާލެ ހިއްކަމުން ދަނީ ކުރިން ހިއްކާފައިވާ ސަރަހައްދުތަކުން ވެލިނަގައިގެން ކަމަށް ބައެއް ފަރާތްތަކުން ބުނަމުންދާތީ އެކަން ސާފުކޮށްދެއްވުމަށް ކުރެއްވި ޓްވީޓެއްގައެވެ.

ފަޒުލްގެ ޓުވީޓުގައި ވަނީ ރައްޔިތުންގެ ހިތުގައި ނުތަނަވަސްކަން އުފެއްދުމަށް ކުރާ މަސައްކަތްތައް ކުށްވެރި ކުރައްވާފައެވެ.

ރަސްމާލެ މަޝްރޫއު ގެ ސަބަބުން މިހާރު ކުރިއަށް ދާ ބިން ހިއްކުމުގެ އެހެން މަސައްކަތް ތަކަށް އޭގެ އަސަރެއް ނުކުރާނެ ކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އަބްދުالله މުއްތަލިބް ވެސް ވަނީ ވިދާޅުވެފައެވެ.

އަދި އެންވާރަމެންޓް ޕްރޮޓެކްޝަން އެޖެންސީ (އީއައިއޭ) ގައި ފާހަގަކޮށްފައިވާ ގޮތަށް ރަސްމާލެ ހިއްކާ ސަރަހައްދަކީ މާލެ އަތޮޅުން ދެކުނު ކަމަށާއި ގުޅީފަޅު ހިއްކުމަށް ހަމަޖެހިފައިވާ ސަރަހައްދަކީ މާލެ އަތޮޅުން އުތުރު ކަމަށް ވެސް މިނިސްޓަރ ފާހަގަ ކުރެއްވިއެވެ.

މިމަހުގެ 18 ވަނަ ދުވަހު ހިއްކަން ފެށި ރަސްމާލޭ ގެ 10 ހެކްޓަރު ވަނީ މަޝްރޫއުއަށް ހަފްތާއެއް ވެގެން ދިޔައިރު ހިއްކާ ނިންމާފައެވެ.

ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އާ ހަވާލުކޮށްގެން ފުށިދިއްގަރުފަޅު ހިއްކުމުގެ މަސައްކަތް 8 މަސް ދުވަސްތެރޭ އެއްކޮށް ހިއްކައި ނިމޭނެ ކަމަށް ސަރުކާރުން ވަނީ ބުނެފައެވެ.

ރަސްމާލެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.

މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.