އާ އަހަރު ފާހަގަކުރުމަށް "ދިވެހިންގެ ރާއްޖެ ފެސްޓިވަލް 2024" ގެ ނަމުގައި ހަވާ އެރުވުމާއި ލޭޒާ ޝޯއާއެކު، މިއުޒިކް ފެސްޓިވަލެއް ބޭއްވުމަށް މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް އިން ނިންމައިފި އެވެ.

މިފަދައިން އެމިނިސްޓްރީން ނިންމިކަން މިއަދު ބޭއްވި ނޫސްވެރިންގެ ބައްދަލުވުމުގައި ޔޫތު މިނިސްޓަރު އިބްރާހިމް ވަހީދު ވަނީ ވިދާޅުވެފައެވެ.

އެބޭފުޅާ ވިދާޅުވީ އާ އަހަރު ފާހަގަކުރުމަށް މިއުޒިކް ޝޯ ބޭއްވުމަކީ އަބަދުވެސް ކުރަމުން އަންނަކަމެއް ކަމަށެވެ. އެގޮތުން، މި ފަހަރު އާ އަހަރު ފާހަގަކުރުމަށް ބާއްވާ ހަރަކާތްތައް ބާއްވާނީ "ދިވެހިންގެ ރާއްޖެ ފެސްޓިވަލް 2024" ގެ ނަމުގައި ކަމަށެވެ. މި ފެސްޓިވަލަކީ ދެ ޖިންސުގެ ޒުވާނުންނާއި ކުޑަކުދިންނަށް ވެސް ބައިވެރިވެވޭ ގޮތަށް އިންތިޒާމު ކުރެވިގެންދާނެ ފެސްޓިވަލެއް ކަމަށް މިނިސްޓަރ ވިދާޅުވިއެވެ.

އެރޭ ބޭއްވުމަށް ހަމަ ޖެހިފައިވާ މިއުޒިކް ފެސްޓިވަލް ހާއްސަ ކުރާނީ ދިވެހި ފަންނާނުންނަށް ކަމަށް މިނިސްޓަރު ވިދާޅުވި އެވެ.

މި ޝޯ އަކީ މި ސަރުކާރުން ވެރިކަމާ ހަވާލުވުމަށް ފަހު ބާއްވާ ފުރަތަމަ އިވެންޓެވެ.

މީގެ އިތުރުންވެސް މި މަހުގެ 31 ވަނަ ދުވަހު އަހަރު ނިމުން ފާހަގަކުރުމަށް ކުޑަކުދިންނަށް އަމާޒުކޮށް ކުޑަކުދިންގެ ހަވީރެއް ބޭއްވުމަށް ވެސް ޔޫތު މިނިސްޓްރީން ވަނީ ނިންމާފައެވެ.